Read South Giziga EXO 21 Bible Online

EXO 21 - South Giziga bible

EXO 21

¹Bumbulvuŋ a ɓa Moyise ma: Pura ɓi micica mekelemey ani, ɓa ki ɓa taŋ njah njah da mizli:

²Da ki hiɗik beke le i mbur Heber na, a sa gi beke vi merkeɗe, vi mitarnaˀ naŋ na, a bi, i beke mata, ko a wuruk neˀ ta.

³Da i mikila zleˀe na, naɓa a bi pal naŋ, da naŋ zleˀe ti ngwas na, a bam ati ngwas naŋ.

⁴Da muɗuvaŋ ngwasa i buy naŋ zleˀe, yo ngwas naŋ a yi ziri mizile malla mongosohoy le na, ngwas naŋ ati ziri, a sa ndiram da buy taŋ, amma naŋ, a sa bi pal naŋ ɓula.

⁵Na da beke a ɓi le njah: «I wuɗ buy ɗu, ngwas ɗu ati ziri ɗuwoyo, y'anta bi ɓa i tiri diimu ta na,

⁶buy naŋ a sa ga sedewo naŋ a mbuŋ Buymisemuŋ, a sa cica gumbaˀ da miviŋ, malla da dum ngi miviŋ ngi hay, a slinaŋ slimiɗe ti sumuŋ. Akẽh na, a tiri le i beke naŋ ngi sete.

⁷Yo da mbur a hiɗika zuŋ naŋ mongoso le na, anta sa bo kaɓa beke mizilehey na ta.

⁸Da buy naŋ a hiɗika zleˀe ngi gi di ngwasa, na da a ɓulaŋ mi le muduba na, sey a pula cine a mbiɗa hirnga nah, jiviɗ ngi hiɗik naŋ da mulakay anta, kite a njikaŋ ti njiki.

⁹Yo da a hiɗika da mangal naŋ na, sey a gi di weˀe kaɓa magam ti ziri mongosohoyo.

¹⁰Da ko buy naŋ a zuɓ ngwas mekelem le kwana, gwat ngi zum, zana malla cifi ati zile a ndir nga naŋ nga naŋ.

¹¹Da zil anta gaŋ gwat mimakir hanayna ta na, a bi ngataraŋ, ko a vul dala ta.

¹²«Mbur mikiɗ mbur le vagay na, a sa kiɗaka vagay aya.

¹³Amma da naŋ anta ti wuluk ngi kiɗ naŋ zleˀe ta, i Buymisemuŋ muzuwulaŋ di na, i sa bugukum li naŋ masa kil ng'araŋ.

¹⁴Amma da mbur a ro ti mevel fõh fõh ar mbur cil naŋ, a gi wer, a kiɗa le vagay, ko da a ɗum le ti li gi mikuli ɗu kwana, jakaŋ, ara kiɗaka vagay.

¹⁵Mbur makiɗ cine malla mumuŋ na, a sa kiɗaka vagay.

¹⁶Mbur muhul mbur titira le na, ko da a hiɗika le avra, malla naŋ da a hay naŋ aruŋ kwana, a sa kiɗaka vagay.

¹⁷Mbur maza cine malla mumuŋ na, a sa kiɗaka vagay.»

¹⁸Da kaɓa ani, mizli a tiram, mekelem a kiɗa numuŋ ti haŋ turɓus malla a hiziga ti ɗugur, amma a muc ta, a hina le tup a ruwuy ɓula,

¹⁹da a slikiɗ, a puluk ti mejegeɗe ng'avra gu na, naɓa mbur mikiɗ naŋ a bi himiɗ le. Mindir sey a wurkaŋ hin naŋ migi slra ta na, yo a vulaŋ slalaka, sey da naŋ mumbul le.

²⁰Yo da mbur a kiɗa beke naŋ mizile malla mongoso le vagay ti ganday na, a sa pulaka cuwal naŋ avu naŋ vuna tehhe.

²¹Amma da a muc ar hin mudumbuŋ malla mucuw naŋ mata na, anta sa pulaka cuwal naŋ mata, asi i zlili naŋ zleˀe.

²²Yo da ziley makiɗam vu, a mbuzlam ngwas misi ti hur le, a yi le kiya horof, mungra mekeleme anta na, mbur mumbuzl naŋ a wurka gwat zil macufuɗ ava na, a wurka a mbuŋ migi kiitahay.

²³Amma da mungra mekelem a gi le na, mumbuzl naŋ na, a sa wurka siifa ti siifa ya.

²⁴Hiri ti hiri aya, sliŋ ti sliŋ aya, haŋ ti haŋ aya, sar ti sar aya,

²⁵wur ti vu ti wur aya, waˀa ti waˀa ya, kiɗe ti kiɗ aya.

²⁶Yo da mbur a zuro hiri ngi beke naŋ mizile malla mongoso le na, a sa pulaŋ i diimu, ar deɗe ngi hiri naŋ tuwa.

²⁷Yo da a ngilaŋ di i sliŋ na, a sa pulaŋ i diimu, ar deɗe ngi sliŋ naŋ tuwaŋ.

²⁸Yo da sla a kiɗ mbur mizile malla ngwas le vagay ti durum na, a sa kuyupaka sla nah ti ɗugur, a zumaka useˀ naŋ ta, naɓa buy ngi sla a bi himiɗ le.

²⁹Na, da sla a sirik le gi kiɗa vu zleˀe, a ɓaka le ɗaˀ ɗaˀ le da buy naŋ, yo a jigina ta. Da a sa kiɗ mbur le vagay na, a kuyupoko sla nah ti ɗugur, a kiɗaka buy naŋ vuna vagay aya.

³⁰Da a tikakaˀay le da buy ngi sla ɓa a mbiɗa hirnga naŋ na, micakaŋ wuruk le gar na, a wurka.

³¹Da a kiɗ di i mangal mizile, ko i zuŋ mongoso kwana, a sa gakaŋ di i gwat misi purla.

³²Da a kiɗ di i beke zil malla ngwas na, buy ngi sla a wuruk suloy kukur makir da buy ngi beke vuna, a kuyupoko sla ti ɗugur.

³³Da mbur a li vigiɗ ngi yam malla vigiɗ ngi zay le, a gica mi naŋ ta, da sla malla zungu ngi mbur a diɗ le ara na,

³⁴mbur mila vigiɗe, a wurka ginewe ti dala, a zuɓa vagay ngi ginewe da naŋ.

³⁵Da sla ngi mbur a zliga sla ngi cil naŋ le na, buy ngi shalay a sa hiɗikaka sla misi titiri na, cuw taŋ, a wunkaka dala nah, a wunkaka useˀ ngi sla mumuca na ma.

³⁶Da sla nah a sirik le ngi kiɗa vu zlezle, mizli a sinaka le, yo buy naŋ a jigina ta na, a ji sla kaw ar deɗe ngi mikiɗa na, a zuɓa sla mumuca da naŋ.

³⁷Da mbur a hul sla le, tumuŋ malla ˀaw, a sla ˀay naŋ le malla a hiɗika le avra na, a sa wurka sla, sla zlum, tumuŋ, tumuŋ mufaɗ, ˀawa, ˀaw mufaɗ.