Read South Giziga EXO 22 Bible Online

EXO 22 - South Giziga bible

EXO 22

¹Da a jaka muhulo le kasl ar li slina dalam ti duvuɗo, a kiɗaka le vagay na, anta slufaka kaɓa kiɗa hirnga ta.

²Amma da i papas na, naɓa i kiɗa hirnga ɓula. Da muhul a mbiɗa hirnga naŋ gu ta na, a sa hiɗikakaŋ, a gam di beke.

³Da sla, zungu, tumuŋ malla ˀaw, a lumaka le asi haŋ ngi muhulo, a sla ˀay naŋ t'aruŋ na, a sa wurka makaw cuw.

⁴Da mbur a pula ginew naŋ le ng'ar fat ngi mbur, malla guva ngi gudubun na, sey a wurka ti gwat ngi migam migi le kuy kuy, malla gudubun ngir guva naŋ miyi le kuy kuy.

⁵Da mbur a ɗuva vu le da bilngas ar guva naŋ, yo vu a nduvuɗ le avu daw ngi mbur minih le, aro a mizer malla naŋ a muŋ aruŋ kwana, sey a wurkaŋ, asi mubula vu i naŋ.

⁶Da mbur a ɗum dala malla gwat le avu mbur cil naŋ, yo da a huloko le a hay naŋ, da a lumaka muhulo le na, sey a wurka makaw cuw.

⁷Da a lumaka muhul naŋ ta na, mbur misi hay a sa ga sedewo naŋ a mbuŋ Buymisemuŋ, a hudum ɓa a sinaka, naŋ a ji haŋ avu gwat ngi mbur ta.

⁸Asi gwat misi ti jiviɗ naŋ ta gar, ko vur ɓi ngi sla, zungu, tumuŋ, ko gwat wanaka gar mizizi le, da mizli ara ɓam: «I naŋ vuna si na», a ram ti ɓi taŋ cuw taŋ nga mbuŋ Buymisemuŋ, mbur, Buymisemuŋ misa ɓi le, muzluɓa i naŋ na, a sa wurka mucuw naŋ makaw cuw.

⁹Kaɓa ani, mbur a ki zungu, sla, tumuŋ, ˀaw malla ko ginew wanaka gar a hay mburu, da a muc le, malla a lum mendere le, malla ta a huloko le, sedewo kini anta na,

¹⁰a sa hudumoko mizli mucuw tayna ti slimiɗ ngi Buymisemuŋ, ɓa a biga mbur numuŋ tuwa, a wusa gwat ngi cil naŋ na ta, buy ngi ginewe, a sa tiɓa hudumo, yo mbur numuŋ tuwa, anta sa wuruk minjeˀe mata.

¹¹Amma da a huloko a hay na, a wurka buy ngi ginewe.

¹²Da i gwat ngi ɓuh mija na, a so ti is naŋ ngi ga sedewo nah, naɓa a wurka ginewe mata.

¹³Da mbur a didiɗ ginew le avu mbur, ɓa a sa maŋ di a muŋ, da gwat a gaŋ le, malla a muc le manja buy naŋ a pura na, anja a wurkaŋ.

¹⁴Amma da a gi mur buy naŋ na, a wurka ta. Da a wuɗ a gi di slra zleˀe ngi wuruk na, a wurka dala ngi slra nah.

¹⁵Zuŋ diili manja juwa sar, da mbur a tikinaŋ, a hin di le na, anja a vula zlili, ɓa a tiri ngwas naŋ.

¹⁶Da cine a ngum vulaŋ di ta kwana, a vula zlili kaɓa mavulaka ar zuŋ diili mungbuˀo.

¹⁷Ki pulaka ngwas mijuri ti siifa ta.

¹⁸Mbur mihin ti gwat misãmi le na, sey a kiɗaka vagay.

¹⁹A gaka mikuli sey da Bumbulvuŋ pal naŋ, da mbur miga le da kulihey na, sey a kiɗaka vagay.

²⁰Mulakay mipam le asi ruwuy kum na, ki gaka taŋ bonoy ta, ki zumaka taŋ gwataya ta. Asi ki pam le zleˀe asi ruwuy mulak a Ezipte ya.

²¹Ki gaka bonoy da wudigahay ati mutuhuhoyo ta ma.

²²Da ki ra gaka taŋ bonoy, yo a tilikiy mi le na, i sa cine widi taŋ,

²³mevel a sa jiy, i sa ngumukum ti maslalam. Ngwas kumoy a sa tiram wudigahay, yo ziri kumoy a sa tiram mutuhuhoy.

²⁴Da ki vulam duvus le da mbur misi murga a wuzla kum na, anja ki gam di kaɓa muvula duvus ngi yamay na ta, ki tikakaŋ ˀay ɓa a vul yam ara ta.

²⁵Da mbur a jukukum godo naŋ le na, makaŋ di manja pas a diɗi.

²⁶Asi godo naŋ ngi sirite, i nah purla kine, yo a ɗumo kwacaya ti naŋ ma. Da ki makaŋ di ta na, a sa hin ti mike? Asinta, da a tiliy mi le na, i sa cinaŋ di, asi ya, yi mbur mapur ircece.

²⁷Ki zaka Buymisemuŋ ta, yo ki nisaka buyɓihey misi a wuzla kumo ta.

²⁸Gwat ngi migam kumoy ati yam ngi yi ngi gudubun kumoyo, ki vulaka taŋ da kulihey ta. Ki sa vulikiy mangal modogom ngi wuzla ziri kumoyo da ya.

²⁹Da i modogom ngi sla, ngi tumuŋ malla ngi ˀaw na, ki pulaka a gi hin tarnaˀ asi mumuŋ, hin midangafaɗ naŋ na, kisa gikiy di mikuli tapasa.

³⁰Ki sa tiram avu ya, kum i mizli ɗuwoy, kum pal. Ki zumaka maara, gwat ngi ɓuh mija ta, hizigaka da kirihey.