Read South Giziga EXO 23 Bible Online

EXO 23 - South Giziga bible

EXO 23

¹Ɓi misi a ɓam na, a ɓam na, manja virzi naŋ na, ki tiɓaka ta. Da mbur a zluɓ ɓi le na, ki jinamˀis aseˀe ti slir ta.

²Gi malambaˀa, ki gaka asi vendeke ngi mizli ara gaka ya ta. Angi kiita, ki gaka sedewo ti slir vur vendeke ngi mizli ara ɓam kanah ya ta.

³Ki jinam mbur ar kiita neˀ ta, ko misi murga.

⁴Da sla malla zungu ngi mesene kum a zizi le, yo ki lumaka le na, makaŋ di.

⁵Mbur mazlir ti kum ta, da zungu naŋ a diɗ le ti jijir a jiviɗe na, ki pulakaŋ ta, jinakaŋ ar li slikiɗ naŋ.

⁶Ki hiryaka kiita ta, ko i mbur misi murga macufuɗukum tekeɗe kwana, ki hiryaka ta.

⁷Ziram kileŋ avu ɓi ngi slireye. Mbur migi gwat ta, malla mbur mijeŋŋe na, ki gakaŋ kiita ngi muco ta. Asi ya Bumbulvuŋ, da mbur a gi gwat le na, y'anta pura kaɓa i mbur mijeŋŋe a mbuŋ ɗu ta.

⁸Ki pulaka vu kumo, ɓa mizli a hiriyukum ti gwat ngi vul ngatara ta, asi gwat ngi vul ngatara na, a hulufo mizli mapuram kweŋ kweŋ, yo a hirya ɓi ngi mizli mikaslslahay a ma.

⁹Ki guzuvuraka moholoyoy misi asi ruwuy kumo ta. Vur kum vuna kwana, ki sinaka cifi ngi mbur moholoyo le, asi kum vuna ki cifam moholoy le ɗaˀ a hirwuy Ezipte ya.

¹⁰Angi vi merkeɗ na, kisa zligaka guva kumoyo, yo ki gaka sifi taŋ.

¹¹Amma vi mitarnaˀ naŋ na, kisa kuruwaka kraw kraw mbak arleˀeŋ. Misi murga ngi si kumoyo, a sa zumam, is naŋ, taŋ masa pulaka na ya kwana, gwat ngi ɓuhoy a sa zumaka ya. Ki sa gam ti guva ngi gudubun waɗ ngi tutumbur kumoyo kanah ma.

¹²Gwat ngi gi ngi gi gar na, kisa gaka angi hin merkeɗ, amma hin mitarnaˀ naŋ na, ki gam slra ta, ɓa sla kumoy ati zungu kumoy a musukam vu, ɓa gawla kumoy ati moholoyoy misi asi hirwuy kumo, a fam himiɗi.

¹³Yo kam slimiɗ kuy kuy ar gwatay ya muɓukum taŋ na gar. Ki zilam kulihey ta, anja mizli a cinaka slimiɗ taŋ avu mi kumo ta wãˀ.

¹⁴Angi vi gar na, kisa zuɓam mulak vur slimiɗ ɗu is makir nga giy muguzlumo.

¹⁵Micikiɗeffe i muguzlum ngi ɗaf manja ˀis ara. Angi hin tarnaˀ, ya muɗuvukum di angi kiya ngi Abip na, kisa zum ɗaf manja ˀis ara. Asi kum muboko ti Ezipte na, angi kiya nah. Yo kum anta sa soko ng'ar hay ɗu manja gwat a haŋ ta.

¹⁶Yo ma na, kisa gam muguzlum ngi zuma gwat mutukuzo mudumbuŋ ngir guva kumoyo. Yo angi kiɗa mi ngi vi, kum migaka sifi ngi gwatay a le gar ma na, kisa gam muguzlum ngi sifi.

¹⁷Vur vi gar na, mizli mizilehey gar a sa soko ng'avi ya Bumbulvuŋ Buymisemuŋ kumo is makir.

¹⁸Ginew waɗ ɗaf misi ˀis ara na, kum anta sa gikiy di mikuli ta. Mungul ngi ginew kum migam di mikuli na, ki pulaka taŋ a wunam li ta.

¹⁹Ki sa soko ti gwat ngi migam mudumbuŋ ngir guva kumoyo nga mbuŋ ɗu ya Bumbulvuŋ Buymisemuŋ kumo. Amma ki da ka zuŋ ˀawa ti ɗuwa ngi madiya naŋ tehhe a muŋ ta.

²⁰«I ra slin modro ɗu a mbuŋ kumo, ɓa a jiginukum a jiviɗe, a sa ci ti kum nga hirwuy ya ɗiyukum di.

²¹Jam lesl kuy kuy ɓa ki cinakaŋ mi, ki gakaŋ gwat ngi ji mevel ta, da ki slikiɗam ɓi le na, naŋ anta sa ɓusa ta, asi a ga gwata ti slimiɗ ɗu.

²²Da ki ra cinakaŋ mi, ki ra gaka gwat ya maɓukum di gar na, yi sa tiri mesene ngi mesene ɗikey, mbur ɗik ta na, yi mbur naŋ ta ya.

²³Modro ɗu a sa ki ɓaˀ a mbuŋ kumo, yo a sa ci ti kum nga hirwuy ngi Amorihey, Hitihey, perizihey, Kanaˀanay, Hivihey, waɗ angi hirwuy ngi Zebusihey. I mizli ya masa ngizla taŋ a mbuŋ kumo.

²⁴Ko ki huruk hurukam a mbuŋ kuli taŋhay na ta, yo ko ki gaka taŋ mezegweley ta, ki gaka gwata kaɓa nga taŋ na ta. Amma kuli taŋ tayna mindira ti ndir ati miciɗa ti ciɗey na, wahaka taŋ avra jaka.

²⁵Da ki ra gikiy slra da ya Bumbulvuŋ Buymisemuŋ kumo na, naɓa i sa ɗuwulukum mi, gwat ngi zum ati gwat ngi si kumo, a sa gi haɗa, yo i sa ɓula jiji kileŋ avu kumo.

²⁶Asi ruwuy kumo, ngwas masa pi zuŋ ti pi malla dirlay, a sa so anta mata, i sa jukum hutuŋ subur.

²⁷I sa ga ɓa mizli micinam ɓi kum le gar na, a zluwunam kirkir, sukwi ngi mizli, kum miram le a hay taŋ gar na, i sa pa taŋ haŋ, mesene kumoy gar a sa mbiɗam duba, a kilam ti kumo.

²⁸I sa slin ti mengevel a mbuŋ kumo, ɓa a ɓula Hivihey, Kanaˀanay waɗ Hitiheye daf le ar kum masa ndilama.

²⁹Y'anta sa ɓula taŋ angi vi purla ta, naɓa hirwuy a sa tiri ɓuh, yo gwat ngi ɓuhoy a sa jam mbele kum.

³⁰I sa ɓula taŋ neˀ neˀ a mbuŋ kumo. Sey da kum misikam le haɗa so na, i sa vulukum hirwuyo da kum wãˀ muduba.

³¹I sa ɗuva hirwuy kumo zle a mi mubuliy lavaɗ, hã sesẽŋ a mi mubuliy Mediterane, zle a wuzla ɓuh mikirɗak kirɗak ngi Sinaya, hã sesẽŋ a mizaw Efrata, asi i sa vulukum mizli ngi digahaya asi haŋ kum, ɓa ki ɓulaka taŋ a mbuŋ kumo.

³²Ki jumomˀay ati taŋ waɗ ati kuli taŋhaya ta.

³³Ki pulaka taŋ jiviɗ ɓa a pam asi ruwuy kumo ta, vur taŋ mahizigiɗukum, kisa gam mungra avu ya, kisa gam kuli taŋhay, naɓa ki cam le ar kwar ngi kuli taŋhaya.»