Read South Giziga EXO 24 Bible Online

EXO 24 - South Giziga bible

EXO 24

¹Bumbulvuŋ a ɓa Moyise na: «Jiɗoko ng'avi ya Bumbulvuŋ ati Aroŋ, Nadap, Abihu waɗ mizli micawwa ngi Israyeley kukur tarnaˀ mikileŋ aruŋ si na, kisa hurukom huruk huruk a ruwuy.

²I ka Moyis pal ɗik masa kiroho ng'avi ya, amma taŋ a kiroko ta ɓula, yo zigiduw anta sa jiɗoko nga muwã asi ka ta.»

³Moyis ara sipa ɓi ati jiviɗ ngi gwat ngi gi Bumbulvuŋ miɓaŋ taŋ na gar da Israyeleye. A mbiɗakaŋ di misi purla, a ɓakaŋ: «Mingiɓi Bumbulvuŋ miɓaŋ taŋ gar na, i sa gam taŋ slra.»

⁴Moyis a toho mingiɓi Bumbulvuŋ miɓaŋ taŋ na gar ti tuhu. Li naŋ muwun na, a slikiɗ cẽẽt, a ɗiyi li gi mikuli a sar muwã, a ngi ɗuguroy kuruˀ nga cuw, tiɗeˀe ar sukwi Israyel mukuruˀ nga cuw na ya.

⁵Dar a slina gawla Israyeley, ɓa a gam mikuli ti ginew zlam zlam, waɗ mikuli ti gusoŋhoy da Bumbulvuŋ ɓa ngi luuma zuy.

⁶Moyis a wuɗ reta ngi pumbus ngi gineweye, a pa taŋ ar sikiɗey, a kuca li gi mikuli ti is ngi pumbus tuwa.

⁷A zuɓa ɗerewol ngi jumoˀaya, a slufa ˀay paɗ a muŋ a mbuŋ mizli. Mizli Israyeley a ɓam: «Ɓi Bumbulvuŋ miɓa gar na, i sa cinakaŋ, i gam taŋ slra.»

⁸Akẽh na, Moyis a zuɓa pumbus ngir sikiɗey tuwa, a kuca da Israyeleye, a ɓa taŋ: «Hana i pumbus ngi jumoˀay Bumbulvuŋ mujumo ati kum, ti naŋ muvulukum ɓimuɗuva naŋhay na.»

⁹A dirba nah, Moyis a jiɗam nga muwã ati Aroŋ, Nadap, Abihu, waɗ mizli micawwa ngi Israyeley mizli ngir tarnaˀa.

¹⁰A puraka Buymisemuŋ ngi Israyele le. Li ɗigar midirka ti ɗugur mupuɗaw ngil ngil, cay asi sar naŋ, naŋ ngil ngil kaɓa birngiŋ.

¹¹Buymisemuŋ a ga malambaˀ neˀ le da mizli mugop gop ngi wuzla Israyeleye ta. A singilaka Buymisemuŋ, a zumam, a sam gwata.

¹²Bumbulvuŋ a ɓa Moyise na: Jiɗo ng'avi ya a muwã aka, ndir aka. I wuɗ i vuluw beleler misliprak sliprakay, misi ɓimuɗuvahay toh toh ar taŋ, ɓa ki ra dubuna taŋ da Israyeley.

¹³Moyis a jiɗam nga muwã ngi Buymisemuŋ ati gawla naŋ Zozuwe.

¹⁴Naɓa Moyis a ɓa mizli micawwahaya le: «Kutukom ndra aka, sey da ndra mumoko le. Amma Aroŋ ati Hur a ndiram ati kum aka. Da ɓi a luuma mburo le na, aru ng'avi taŋ.»

¹⁵Moyis a jiɗ nga muwã tuwa, akẽh gazlavay a sirta muwã sirit wãˀ.

¹⁶Bumbulvuŋ a po sar nga muwã Sinaya ti dudok naŋ, yo gazlavay a ro sirit hã hin merkeɗ. Hin mitarnaˀ naŋ na, Bumbulvuŋ a zila Moyise ti wuzla gazlavaya.

¹⁷Bumbulvuŋ ti dudok naŋ a biga vu da Israyeley a hirnga muwã, kaɓa vu matiɓi njilim njilim.

¹⁸Moyis a ci ng'ar gazlavaya, a jiɗ nga muwã, a ndir a muwã a diga, papas papas kukur mufaɗ, duvuɗ duvuɗ kukur mufaɗa.