Read South Giziga EXO 25 Bible Online

EXO 25 - South Giziga bible

EXO 25

¹Bumbulvuŋ a ɓa Moyise na:

²«Ɓa Israyeley a cikilikiy gwat ngi migidaŋ taŋ, kisa, cikiloko di avu mizli masa vulaka ti mevel purla.

³Gwat kum masa cikiloko di anihĩ: Ɓiri tapasl tapasl, ɓiri baraŋ, ɓiri gaza,

⁴ngwic ngi tumuŋ munduva naŋ wit wit, gagaza, mindezze, gugumay mufucu fucu, ngwic ngi ˀaway,

⁵garak ngi zlengerek, munduva naŋ gagaza, garak ngi kilif madiɗahay, dum ngi widis ngalalay,

⁶mal ngi lampe, urdi ngi pi ar mal ngi vula slra, waɗ urdi ngi zlum ti zlum,

⁷ɗugur mupuɗaw gagaza ndez, waɗ ɗugur ngi tupuˀ avu jampa waɗ avu jiiba ngi masay madiɗa.

⁸Israyeley a sa ɗiyikiy hay da ya Bumbulvuŋ, ɓa yi ndir a wuzla taŋ.

⁹Ki sa ɗiyaka guɗuk ati gwat ngi huroˀhoyo, heˀ kaɓa ya mawuɗ i buguw di ani na.»

¹⁰«Ki sa ɗiyam akoti ti dum ngi ngalalay, jek naŋ, metir pal ti saŋtimetir kukur cuw nga zlum, sliprik naŋ, saŋtimetir kukur tarnaˀ nga zlum, waɗ gil naŋ, saŋtimetir kukur tarnaˀ nga zlum.

¹¹Ki sa kuroŋ ɓiri tapasl tapasl pal naŋ, sirit wãˀ, ti vra ti huroˀo gar, waɗ kisakaŋ di gilaɗɗa avu mi naŋ.

¹²Ki sa pi ɓalaŋhay mufaɗ ti ɓiri tapasl tapasl, kisa ngbaˀa taŋ: cuw ti ka, cuw ti ka.

¹³Ki ɗiyi ɓeɓele ti dum ngi ngalalay, kisa kuro taŋ ɓiri tapasl tapasl.

¹⁴Ki sa ca taŋ ar ɓalaŋhay misi avu akoti tuwa ti ka ti ka, ɓa ngi jijir naŋ.

¹⁵Da a caka ɓeɓeleheye le ar ɓalaŋ ngi akoti na, a muɗaka taŋ mata.

¹⁶Ki sa ka ɗerewol ngi jumoˀay, ya masa vuluw di na ɓaˀ ar akoti tuwa.

¹⁷Dar ki ɗiya mi naŋ ti ɓiri tapasl tapasl pal naŋ, jek naŋ metir pal ti saŋtimetir kukur cuw nga zlum, sliprik naŋ saŋtimetir kukur tarnaˀ nga zlum.

¹⁸Ki sa ɗiyi kerubeŋhey cuw ti ɓiri tapasl tapasl, kisa ngbaˀa taŋ a mivay ngi mi naŋ, deŋ ti ka deŋ ti ka.

¹⁹Kerubeŋ mucuw tayna, taŋ surlum ati mi naŋ, pal a mivay vay ka, pal a mivay vay ka.

²⁰Ki sa ngbaˀa taŋ, hiri pulaˀ ng'ar cala ng'ar cala, hiri tataˀ avu akoti, ara jiginakaŋ, kirpasl nga muŋ nga muŋ.

²¹Ki sa ka ɗerewol ngi jumoˀay, ya masa vuluw di na ɓaˀ le nga hur akoti ɗagay, a dirba nah kisa tiɗa mi naŋ.

²²I sa buguw vu a hirnga akoti, a wuzla kerubeŋhey mucuw na. Mingiɓi ɗu vur Israyeley gar na, i sa vuluw di a diga.»

²³«A dirba nah, kisa ɗiyi tabul ti dum ngi ngalalay, jek naŋ metir pal, sliprik naŋ reta metir, gil naŋ saŋtimetir kukur tarnaˀ ti zlum.

²⁴Ki sa kuroŋ ɓiri tapasl tapasl pal naŋ, yo kisakaŋ di gilaɗɗa avu mi naŋ ma.

²⁵Wuɗ dum misi sliprik naŋ, saŋtimetir dangafaɗ, kisakaŋ di ar cakay naŋhaya gun, waɗ ki kaŋ ɓiri tapasl tapasl tuwa gilaɗɗa avu mi naŋhaya ma.

²⁶Ki sa paŋ ɓalaŋhay mufaɗ ti ɓiri tapasl tapasl, dar ki ngbaˀa taŋ a cikisaraya mufaɗ taŋ.

²⁷Ɓalaŋhaya taŋ gweˀ gweˀ avu dum miɓaˀa ngir cakay naŋhay tuwa, a sa caka ɓeɓele ngi zuɓ naŋ araŋ.

²⁸Ki sa ɗiyi ɓeɓele ngi dum ngi ngalalayay, ki kuro taŋ ɓiri tapasl tapasl, ɓa a sa zuɓaka akoti ti naŋ.

²⁹Ki sa ɗiyi taasa mupuɗaˀa puɗaˀahay ti ɓiri tapasl tapasl pal naŋ: taasa ngi ɗafay, kopoy, gwat memeɗehey waɗ taasa ngi yamay ngi sa pusla mbaazla.

³⁰Peŋ hay le muvula da ya na, kisa pa taŋ ar tabul hana ndrehhe mbak le ta.»

³¹«A dirba nah, kisa vuɗ li ɗuva lampe ti ɓiri tapasl tapasl pal naŋ, sar naŋ, ganday naŋ, taasa naŋ, li wus naŋ waɗ mufuyuk naŋhay gar na, i muvuɗa sumburlum ar li purla.

³²Haŋ ava ɓaˀ ɓaˀ merkeɗ, a zla avu ganday naŋ ngi wuzla tuwa, ɓaˀ ɓaˀ makir ti ka, makir ti ka.

³³Angi haŋ purla gar na, sikiɗ mipitikay pitikay makir, ti li wus naŋhay waɗ mufuyukoy.

³⁴Ar ganday naŋ ngi wuzlaˀa, sikiɗ mipitikay pitikay mufaɗa, ti li wus naŋhay ati mufuyukoy.

³⁵Haŋ naŋhay mujumom cuw cuw makir ng'avi ganday ngi wuzla na, asi virzi taŋ, li wus naŋ ada gara ma.

³⁶Li wus naŋhay ati haŋ naŋhay gar na, i muvuɗa ti ɓiri tapasl tapasl pal naŋ, simbirlim arleˀe ati mekelemeye.

³⁷Ki sa ɗiyaŋ lampehey tarnaˀ, ɓa a ɗuvaka vu avu taŋ, ɓa a pusluɗaka li ngir tumbuŋ.

³⁸Gwat mekelemey, kaɓa megec ati gwat ngi tiɓa fucu naŋ kwana, i muvuɗa taŋ ti ɓiri tapasl tapasl pal naŋ.

³⁹A sa tikam kilo ngi ɓiri tapasl tapasl kukur makir ngi ɗiya li ɗuva lampe ati gwat mekelemeye.

⁴⁰Ka Moyise, kisa pura slra, ɓa a gi heˀ kaɓa ya mubuguw di a muwã aka.»