Read South Giziga EXO 26 Bible Online

EXO 26 - South Giziga bible

EXO 26

¹«Guɗuk ngi Buymisemuŋ, kisa wuɗ godohoy kufulah kufulah kuruˀ, mija ti gugumay misira mislirkeɗ, lahaɗ ti ngwic ngi tumuŋ munduva naŋ wit wit, gagaza cihhe waɗ gagaza ndezze. Ki sa gaŋ wuya ti kerubeŋhey miɗiya dingal dingal kuy kuy.

²Godo mikifilih kifilih tayna, taŋ rak rak, gil ngi godo gar na metir kuruˀ nga mufaɗ, sliprik naŋ metir cuw.

³Ki sa juɓo muzlumoy na kifilih arleˀe, waɗ muzlum mekelemeye kifilih arleˀe ma.

⁴A mivay ngi gabaga mujuɓo mudumbuŋ, kisa caŋ lawarje mija ti ngwic ngi tumuŋ munduva naŋ wit wit, kisa ca da mujuɓo ngi dirba wãˀ, yo kisa ga a mivay ngi godo mujuɓo mucuw naŋ kanah ma.

⁵Godo mujuɓo mudumbuŋ, kisa caŋ lawarje kukur zlum, waɗ a mivay ngi godo mujuɓo mucuw naŋ, lawarje kukur zlumo ma, lawarje misi purlahay.

⁶Ki sa ɗiyi gwat ngi kilik naŋ kukur zlum ti ɓiri tapasl tapasl, kisa kilika godo mujuɓohoy tuwa, cuw taŋ arleˀe ti gwat ngi kilik naŋ, ka miɗiya tuwa, joˀ guɗuk ngi Buymisemuŋ tuwa, a tiri kiɓiŋ kiɓiŋ arleˀeŋ.

⁷Yo ki ji godo mikifilih kifilih kuruˀ ngaŋ kaˀ, ti ngwic ngi ˀaway, ɓa ki ɗiyi guɗuk mekelem ti muŋ, ngi sirta guɗuko.

⁸Ki sa ja taŋ rak rak, gil taŋ metir kuruˀ nga zlum zlum, yo sliprik taŋ, metir cuw cuw.

⁹Ki sa juɓo godo muzlumoyo kifilih arleˀe, waɗ merkeɗ mekelemeye kifilih arleˀe ma, joˀ kisa muslo gabaga mujuɓo mimerkeɗ naŋ na, cap ngir tumbuŋ guɗuko.

¹⁰Ki sa ji lawarje kukur zlum ngi ci a mivay ngi gabaga mujuɓo mudumbuŋ, kisa ca avu mujuɓo ngi dirba wãˀ, waɗ kukur zlum ngi ci da gabaga mujuɓo mucuw naŋ ma.

¹¹Ki sa ɗiyi gwat ngi kilik naŋ kukur zlum ti ɓiri gaza, kisa kilika lawarjeheye kilak kilak avu ɓiri gaza tuwa, ɓa guɗuk a tiri purla.

¹²Gabaga ngi ɗiya guɗuk mucuw naŋ, sliprik naŋ a sa ndir cirip, reta ngi mi naŋ micirip tuwa, kisa musla cap ngir ti dirba guɗuko.

¹³Yo tir jek ngi godo kwana, mi naŋhay a sa ndiram cirip cirip, metir pal pal ti ciki guɗuko, ɓa ngi sirta guɗuko.

¹⁴Ki sa sirita ti garak ngi zlengerek, munduva naŋ gagaza, waɗ garak ngi kilif madiɗahay, sirit a hirnga guɗuko.

¹⁵Ki sa ɗiyi ɓamtal ngi dum ngi ngalalay, kisa cica taŋ deŋ deŋ ngi jaha guɗuko.

¹⁶Ɓamtal gar na, jek naŋ metir zlum, ɓiɓir naŋ saŋtimetir kukur tarnaˀ nga zlum.

¹⁷Sar avu taŋ cuw cuw, gweˀ avu cala avu cala,

¹⁸kisa ɗiyi kanah kanah kukur cuw, tir vay ruwuy ngi guɗuko.

¹⁹Ki ɗiyi li ngi naŋhay kukur mufaɗ, ti ɓiri gaza, ngi ɓamtalay mizli ngir cuw tuwa. Asi virzi ngi ɓamtalay gar na, li ngi naŋ cuw, vur sar naŋhay mucuw tuwa.

²⁰Tir vay muŋ ngi guɗuko, ɓamtal kukur cuwo ma,

²¹waɗ li ngi naŋhay kukur mufaɗa, i ɓiri gazahay. Asi virzi ngi ɓamtal gar na, li ngi naŋhaya cuw.

²²Ng'asi hay, tisi pas madiɗe, ɓamtalaya merkeɗ.

²³Ki sa wuɗ ɓamtalay cuw ngi jaha mivay ngisi haya ti ka ti ka.

²⁴Sivirzi taŋ faw, amma hirnga taŋ jom arleˀeŋ avu ɓalaŋ mudumbuŋ: a sa gam cuw taŋ rak rak, i taŋ masa jahaka mivayaya.

²⁵Vay dirba ngi guɗuko, ɓamtalay dangafaɗ, waɗ li ngi naŋhaya kuruˀ nga merkeɗ ti ɓiri baraŋ, asi virzi ngi ɓamtal gar na, li ngi naŋhaya cuw cuw.

²⁶Yo kisa ɗiyi ɓeɓele ngi ngalalay: ɓeɓele zlum ngi cica ɓamtal mudumbuŋhoy ngi guɗuko,

²⁷zlum ngi cica ɓamtal ngi mivay mucuw naŋ, zlum ngi cica ɓamtalay vay ngisi hay mikini ti vu mubuliye.

²⁸Ki sa ki mbal a wuzlaˀa, giw ti didak ngi ɓamtalay, zle a mivay hã sesẽŋ a mivay mekelem.

²⁹Ɓamtalay ati ɓeɓelehey gar na, kisa kuro taŋ ɓiri tapasl tapasl, waɗ ɓalaŋ ngi ɓiri tapasl tapaslngi ca ɓeɓelehey anga.

³⁰Moyise, a dirba nah, kisa ɗiya guɗuko, heˀ kaɓa ya mabuguw di a hirnga muwã ani na.

³¹Ki sa tuf zana ngi njir a mihiri, ti gabaga ngi gugumay mislirkeɗ lahaɗ ti ngwic ngi tumuŋ munduva, gagaza wit wit, micihhe waɗ gagaza ndezze, yo wuya geˀ geˀ ava ti kerubeŋ miɗiyahay le kuy kuy.

³²Ki sa luwa avu ponti ngi ɓiri tapasl tapasl, kaˀ kaˀ avu ɓamtal ngi ngalalayay mumufaɗ, mupuyaka taŋ ɓiri tapasl tapasl, ming'aka taŋ a hirnga ɓiri gazahay mufaɗ tuwa.

³³Ki sa luwa zana asi ponti, kisa ka akoti ngi jumoˀaya ɓaˀ a duba zana minjar tuwa. Yo masa wunka li mipal ati li mipal wãˀa i zana minjar na.

³⁴A dirba nah, kisa tiɗa mi ngi akoti miɓaˀ ar li mipal wãˀa tiɗeˀ.

³⁵Ki sa ɗuva tabulo taˀ ar li mipala, yo li ɗuva lampe kwana, taˀ tir vay ruwuy ngi guɗuko, sek duba cakay ati tabul tuwaŋ.

³⁶Akẽh na, midiraˀay ngi zanahay a sa tufam zana mekelem midirahay gijaw gijaw ngi njir avu miviŋ ngi guɗuko, gabaga ngi gugumay mislirkeɗ, gagaza miwitwit, micihhe, waɗ gagaza ndezze.

³⁷Ki sa ɗiyi ɓamtalay zlum ngi njira zana, ɓamtal ngi dum ngi ngalalay. Ki sa kuro taŋ ɓiri tapasl tapasl, ponti ngi luw naŋhaya i ɓiri tapasl tapasl, yo virzi ngi ɓamtalay i mipa ti ɓiri gaza.»