Read South Giziga EXO 27 Bible Online

EXO 27 - South Giziga bible

EXO 27

¹«A dirba nah, ki ɗiyi li gi mikuli ti dum ngi ngalalay. Sliprik naŋ ati jek naŋ misi purla: metir cuw ti reta, yo gil naŋ metir pal ti reta.

²Ki sa ga mivay naŋhaya mufaɗ taŋ yoŋ yoŋ kaɓa durum, surlum jom ati tabul vuna si, waɗ ɓiri gaza kor kor ava.

³Gazlanga ngi gi slra ngi mikuli gar na, kisa ɗiya taŋ ti ɓiri gaza: taasa ngi hila fucuhoy, gwat ngi hiric naŋhay, ziri taasa ngi kuca lihey, fursetey waɗ gwat ngi zluma urdihey.

⁴Ki sa ɗiyi griyaz ti ɓiri gaza, waɗ ɓiri gaza loˀ loˀ a mivay naŋhaya mufaɗ taŋ.

⁵Ki sa tiɗa griyaza guzlum a hur li gi mikuli, giw a wuzla, tak mi naŋ ti muŋ.

⁶Ki sa ɗiyi ɓeɓele ngi dum ngi ngalalayay cuw, ki kuro taŋ ɓiri gaza kor kor,

⁷a sa caka taŋ ar ɓalaŋhay misi ar cakay ngi li gi mikuli tuwa, ɓa a zuɓaka ti naŋ.

⁸Ki sa ɗiya li gi mikuli nah ti dum, huroˀo njoŋ kine, sey kisa ɗiya heˀ kaɓa ya mubuguw di a hirnga muwã akaka na.»

⁹«A dirba nah, kisa ɗiyi wazlaray gunno a hirnga guɗuko. Ki sa ɗiya ti zana mija ti gugumay mislirkeɗ. Tir vay ruwuy, ngir ti Negeve, kisa njir zana ar deɗe ngi zlavaɗ naŋ, jek naŋ metir kukur zlum.

¹⁰Ɓiri mingindaɗ ngi njira zana ati ɓiri ngi hingaˀa zana ti naŋ, i ɓiri barahay. Dumoy mizli ngir cuw ngi njira zana ava na, virzi naŋhay mizli ngir cuw na gar i ngi ɓiri gazahay.

¹¹Tir vay muŋ kwana, jek ngi zana i misi purla ati vay ruwuyo, metir kukur zlum, yo ngi naŋ gar i ɓiri misi purla.

¹²Tir sliprik ngi wazlaray tisi pas madiɗe, zlavaɗ ngi zana, jek naŋ metir kukur cuw nga zlum. A sa njiraka avu ɓamtalay kuruˀ, mikaˀ kaˀ ar virzi taŋhay mukuruˀ tuwa.

¹³Tivi mizlingre, tisi pas ngi miprike, sliprik ngi wazlaraya, metir kukur cuw nga zlumo ma.

¹⁴Avi mizlingre, tir vay numuŋ, ɓamtalay makir, virzi taŋhay kaˀ kaˀ ar li ngi taŋhay makir, jek ngi zlavaɗ ngi zana metir tarnaˀ ti reta.

¹⁵Yo tir vay mekeleme kanah ma.

¹⁶A mizlingre ngi ci nga wazlaraya, kisa njir zana misi jek naŋ metir kuruˀ, miga wuya ava kuy kuy ti gugumay mislirkeɗ, lahaɗ ti ngwic ngi tumuŋ munduva wit wit, micihhe waɗ gagaza ndezze, a sa njiraka avu ɓamtalay mufaɗ, mikaˀ kaˀ ar li ngi taŋhay na.

¹⁷Ɓamtalay ngi guno wazlaray gar na, masa ja hirnga taŋhaya, i ɓiri bara migilaɗ gilaɗ ar taŋ na, gwat ngi juw naŋhay avu ɓamtala, i ɓiri bara, amma li ngi taŋhay, i ɓiri gaza.

¹⁸Wazlaraya so na, jek naŋ metir kukur zlum, yo sliprik naŋ metir kukur cuw nga zlum, gil ngi zlavaɗ ngi zana minjara, metir cuw ti reta. Sivirzi ngi ɓamtalaya, i ɓiri gazahay.

¹⁹Gwat magam taŋ slra ngi ɗiya guɗuko gar, gwat mikaˀ kaˀ ar guɗuk vuna waɗ mikaˀ kaˀ gun wazlaray gar na, i gwat ngi ɓiri gazahay.»

²⁰«Ka Moyise, kisa ɓa Israyeleye, ɓa a vulukuw mal ngi tutumbur, mal mezle mileɗeɗeɗe, ɓa lampe a ndir njahha ngi caˀa.

²¹Aroŋ ati ziri naŋhaya, a sa ɗuvaka taˀ ar guɗuku, a mbuŋ zana minjar a mihiri ngi akoti ngi jumoˀaya, lampehey a sa ndiram njahha zle ti hiikuɗ hã li daŋ daŋ a mbuŋ ɗu. Ɓi hana i ɓi micica le avu Israyeleye nga mbuŋ nga mbuŋ, anta mbiɗi ta wãˀ.»