Read South Giziga EXO 28 Bible Online

EXO 28 - South Giziga bible

EXO 28

¹«Moyis, sukum ɗik Aroŋ waɗ ziri naŋ mizileheye, ti Nadaŋ, Abihu, Elazar waɗ Itamara, zilo taŋ nga ciki ɗiki, baˀ pal avu Israyel mekelemeye, ɓa a gikiy mikuli.

²Ki sa tufa zana ngi mezegwel da sukum ɗik Aroŋ, ɓa ngi bigi dudok ati wuya.

³Vurˀe, kisa ɓa mizli misi sinmijileŋhey, ya minaha taŋ ti lesl ngi sinmijileŋ, a tufaka zana da Aroŋ, ɓa a sa ka tapas taŋ masa cakaŋ i masay, yo ɓa a sa ga mikuli ti naŋ ɓaˀ avu vu.

⁴Zanahay masa tufaka taŋ, t'ani: jiiba ngi didak, jampa, jibe, dawra midira le ti gugumay, loppol waɗ kanda. A sa tufaka da sukum ɗik Aroŋ ati ziri naŋhaya, i zana ngi mezegwel, ɓa a gikiy mikuli ti taŋ ɓaˀ ɓaˀ avu vu.

⁵Midira zanahaya, a sa diraka ti gugumay mislirkeɗ, ti ngwic ngi tumuŋhoy munduva wit wit, cihhe, gagaza ndezze, waɗ ti gugumay ngi ɓiri tapasl tapasl.»

⁶«A sa tufaka jampa ti gugumay mislirkeɗ lahaɗ ti ngwic ngi tumuŋ munduva wit wit, cihhe, gagaza ndezze, waɗ dar dar ti gugumay ngi ɓiri tapasl tapasl.

⁷Gwat ngi luw naŋhaya cuw, taf taf a mivay naŋhaya ti ka ti ka.

⁸Gwat ngi juwa jampa i mutufa ti gugumay misi purla jom ati zana nah: mutufa ti ɓiri tapasl tapasl, ti gugumay mislirkeɗ lahaɗ ti ngwic ngi tumuŋhoy munduva wit wit, cihhe waɗ gagaza ndezze.

⁹Ki sa wuɗ ɗugur mupuɗaw kakayak kakayakay cuw, kisa toho slimiɗ ngi ziri ngi Zakopoyo nguɗ nguɗ ar taŋ:

¹⁰slimiɗ merkeɗ ar ɗugur mudumbuŋ waɗ merkeɗ ar ɗugur numuŋ ma. Toho taŋ vur mijingaˀ vur mijingaˀ.

¹¹Masa toho slimiɗ ngi ziri ngi Zakopoy avu ɗuguroy mucuw na, i mbur misina nguɗo slimiɗe le avu ɗuguro, kaɓa maslaam gwat ngi ɗuva slimiɗ ngi mbur ar ɗerewol, kisa gbaˀa li luw naŋhaya, cuw taŋ i ɓiri tapasl tapasl.

¹²Ki sa luwa ɗuguroy mucuw tuwa avu mi ngi jampa tuwa, a sa wulkaka sukwi Israyel mukuruˀ nga cuw na, ava. Naŋ kine, Aroŋ a sa luwa slimiɗ taŋhay a ciki, law ti ka law ti ka ar guɗuk nga ya Bumbulvuŋ, kanah na, y'anta sa puyuk hirnga ti kum ta.

¹³Gwat ngi luw naŋhay mucuw na, kisa ga taŋ ti ɓiri tapasl tapasl,

¹⁴ki luwaŋ sen memeɗehey cuw ngi ɓiri tapasl tapasl pal naŋ kine, sar sar kaɓa zeweɗe.»

¹⁵«A dirba nah, misina gwatay, a sa tufam jiiba avu jampa law a didaka, ngi gi kiita, a sa tufaka ti gugumay mislirkeɗ, lahaɗ ti ngwic ngi tumuŋ munduva wit wit, cihhe gagaza ndezze waɗ dar dar ti gugumay ɓiri tapasl tapasl kaɓa jampa tuwa.

¹⁶Masl na, jek naŋ ati sliprik naŋ misi purla, saŋtimetir kukur cuw nga zlum.

¹⁷Ki sa gaŋ wuya ti ɗugur hirngahay, jobol mufaɗa. Jobol mudumbuŋ i ɗugur mupuɗaw gagaza ndez, ɗugur mupuɗaw tapasl tapasl waɗ ɗugur mupuɗaw meɗelek meɗelek.

¹⁸Jobol mucuw naŋ i ɗugur mupuɗaw gagaza los los, ɗugur mupuɗaw ngil ngil waɗ ɗugur mupuɗaw gingiliw gingiliw.

¹⁹Jobol mimakir naŋ i ɗugur mivirziŋŋe, ɗugur muwuy wuy, waɗ ɗugur miwit wit.

²⁰Yo jobol mumufaɗ naŋ i ɗugur kalaf kalaf, ɗugur mupuɗaw kakayak kakayak waɗ ɗugur kalaf kalaf gagaza zlop zlop, ɗugur gar na, gwat ngi luw naŋ i ɓiri tapasl tapasl.

²¹Ɗuguroyo tiɗeˀe a hirnga sukwi Israyeley mukuruˀ nga cuw na, a sa tohoko taŋ slimiɗe avu ɗuguroyo, ngi mburo ngi mburo, nguɗ nguɗ kaɓa gwat ngi ɗuva slimiɗ ngi mbur ar ɗerewol.

²²Ki sa ɗiyaŋ sen memeɗehey da jiiba ngi didaka ti ɓiri tapasl tapasl pal naŋ, jirgiɗ jirgiɗ, slap slap kaɓa zeweɗe.

²³Ki sa ɗiyi ɓalaŋhay cuw ti ɓiri tapasl tapasl, joˀ kisa luwa taŋ avu mi ngi jiiba ngi didak tuwa ti ka ti ka.

²⁴Ki sa luwa seney mucuw tuwa avu ɓalaŋhay mucuw misi avu mi ngi jiiba tuwa.

²⁵Seneye, mi naŋhay mucuw mekelemeye, kisa luwa taŋ ti mbuŋ avu gwat ngi luw naŋhay mucuw misi avu jampa tuwa.

²⁶Ki sa ɗiyi ɓalaŋ mekelemey cuw ti ɓiri tapasl tapasl, kisa luwa taŋ ti ruwuy, a mivay ngi jiiba, ti huroˀo, tivi jampa.

²⁷Ki sa ɗiyi dangwahay cuw ti ɓiri tapasl tapasl ma, kisa luwa taŋ ti ruwuy, avu mi ngi jampa, ti mbuŋ, gweˀ avu li tuf naŋ, ti hirnga gwat ngi luwa jampa.

²⁸A sa juwaka ɓalaŋ ngi jiiba avu ɓalaŋ ngi jampa, ti zeweɗ ngi gugumay miwitwit, ɓa jibe, a ndir ti hirnga gwat ngi luwa jampa, ɓa a kirih ti hirnga naŋ ta.

²⁹Naŋ kine, ti Aroŋ masa ci ng'ar guɗuk na, a sa ka zana ngi kiita misi slimiɗ ngi sukwi Israyel tuwa sirit a didaka, ɓa ya Bumbulvuŋ i puyuk hirnga ti kum ta ndiɗaˀ.

³⁰Ka Moyise, kisa pa urim ati tumime ng'ar jiiba ngi didak zana ngi kiita tuwa, ɓa Aroŋ masa ru nga mbuŋ ɗu na, naŋ ti taŋ a didaka. Naŋ kine, Aroŋ masa ru nga mbuŋ ɗu gar na, sey naŋ da ti taŋ a didaka ndrehhe, ɓa a si na gwat ya mawuɗ avu Israyeleye.»

³¹«A dirba nah, kisa tuf jibe asi jampa, ti ngwic ngi tumuŋhoy munduva wit wit pal naŋ, ɓa Aroŋ a ka jampa tuwa, a hirnga naŋ.

³²ˀAy naŋ a wuzla, i midira vah vah kuy kuy, a ngir ta wãˀ, kpingbiriŋ kaɓa libiti.

³³Ki sa wuɗ ngwic ngi tumuŋhoy munduva wit wit, cihhe waɗ gagaza ndezze, kisa ja laŋ laŋ kaɓa yi ngi hunduruk, kisa ga wuya da sivirzi ngi jibe gun ti naŋ, waɗ mawiyer ngi ɓiri tapasl tapaslay gunno ma,

³⁴mawiyer ngi ɓiri tapasl tapasl pal, mawuyer misi kaɓa yi ngi hunduruk pal, hana pal, hana pal, hã gun mi ngi jibe zlar.

³⁵Aroŋ a sa ga mikuli ti jibe nah ɓaˀ avu vu, naŋ masa so nga mbuŋ ɗu, ya Bumbulvuŋ ar guɗuko, yo naŋ masa bi gar na, a sa cinam hurum ngi mawiyereye, naɓa naŋ anta sa muc ta.

³⁶«Yo kisa ɗiyi gwat ngi wuya, kaɓa mufuyuku, ti ɓiri tapasl tapasl pal naŋ, a sa tohom gwat nguɗ nguɗ, kaɓa matohom gwat ngi ɗuva slimiɗ ngi mbur ava: ‹Muvula le da Bumbulvuŋ.›

³⁷«Ki juwa ti mbuŋ, ti lawarje miwitwit, a hirnga loppol ngi mezegwele.

³⁸Aroŋ masa ru nga mbuŋ ɗu gar na, naŋ ti gwat ngi wuya nah a midibiɗ. Vurˀe, gwat Israyeley masa vulikiy di gar, da ko a vulikiy di kasl kasl ta tekeɗe kwana, i sa tiɓa mbele gwat nah.

³⁹A dirba nah so na, kisa tufa dawra ti gugumay mislirkeɗ, dar dar ˀay naŋ da Aroŋ, waɗ loppol ngi gugumay mislirkeɗe ma, waɗ kanda mutufa dar dar kuy kuy ngi bigi dudok ati wuya.

⁴⁰Ki sa tufa zana ngi slimiɗey da ziri ngi Aroŋhoyo: dawrahay, kandahay waɗ jiikuhoy.

⁴¹Ka Moyise, kisa ka zana hanayna, da sukum ɗik Aroŋ ati ziri naŋhaya. Ki sa pa taŋ mal a hirnga ngi vula taŋ slra. Naŋ kine, kisa ca taŋ i masayay, ɓa a gikiy mikuli.

⁴²Tufa taŋ gejere ngi gugumay mislirkeɗ ngi ɗumo taŋ virzi, zle ar li juwa sirla hã sesẽŋ ar tuwal.

⁴³Aroŋ ati ziri naŋhaya, da ara cam ng'ar guɗuk ngi zlir ati Buymisemuŋ, malla da ara kiraham ng'ar li gi mikuli ar li guɗuk ngi zlir ati Buymisemuŋ na, a sa caka gajereheye a virzi, da kine ta na, naɓa a micam, vur taŋ mugulndiŋ gulndiŋ kine na. I ɓimuɗuva makiɗ mi ta, avu Aroŋ ati dideˀ naŋhay a nga mbuŋ nga mbuŋ.»