Read South Giziga EXO 29 Bible Online

EXO 29 - South Giziga bible

EXO 29

¹«Jiviɗ ɓa ki ca Aroŋ ati ziri naŋhay i masayay ɓa a gikiy mikuli na, anihĩ: ji gusoŋ waɗ zlengerekey cuw manja hereweɗey.

²Fukuɗ hapa ngi alkamari ngi di ɗaf manja ˀis ara, maɗaf manja ˀis ara fukaɗ fukaɗ ti mal, helelem mikefer kefer manja ˀis ara waɗ kwic kwic mal ava.

³Ki sa pa taŋ sek ar gadagar, kisa zuɓa gadagara, gusoŋ waɗ zlengerekey mucuw tuwa, kisa ru taŋ ng'ar guɗuk ngi Buymisemuŋ.

⁴Ki sa kisa Aroŋ ati ziri naŋhaya ng'avi miviŋ ngi guɗuk ngi zlir ati Buymisemuŋ, joˀ kisa buna taŋ kaɓa mezegwel mawuɗo.

⁵A dirba nah, kisa hila zanahaya, kisa ka taŋ da Aroŋ: dawra, jibe maka ka jampa a hirnga naŋ, jampa waɗ jiiba ngi didak, joˀ ki hirzliga zeweɗ ngi jampa.

⁶Akẽh na, kisa tuwuɗaŋ hirnga ti loppol, waɗ gwat mabiga i ngi Buymisemuŋ na kupaˀ avu loppolo.

⁷Dar kisa wuɗ mal ngi vula slra, ki paŋ di a hirnga, ɓa a tiri masay.

⁸A dirba nah, kisa ɓa ziri ngi Aroŋhoy a kirohoko, kisa ka taŋ jibeheye.

⁹Ki sa juwa taŋ kanda wak wak, waɗ jiiku a hirnga. Zle ar nah na, a sa tiram masayay ngi sete kaɓa ɓimujuwa miɓa. Gwat masa biga ki ca taŋ le ar slra na, i hana:

¹⁰Ki sa ru ti gusoŋ ng'avi miviŋ ngi guɗuk ngi zlir ati Buymisemuŋ, Aroŋ ati ziri naŋhay a sa jaka haŋ kaw kaw avu hirnga ngi gusoŋ.

¹¹Ki sa sla ˀay ngi gusoŋ a mbuŋ Bumbulvuŋ, avu miviŋ ngi ci ng'ar guɗuk ngi zlir ati Buymisemuŋ.

¹²Ki sa wuɗ pumbus ngi gusoŋ tuwa, ki njufo ti muzuŋ haŋ da gwat muyoŋ yoŋ kaɓa durum misi a mivay ngi li gi mikuli tuwa. A dirba nah, kisa pa is ngi pumbuso ng'asi virzi ngi li gi mikuli.

¹³Ki sa hila mal ngi hur kwacaya, mevele hor wãˀ, ɗugur dubahaya cuw taŋ jom ti mal naŋ, ki zluma taŋ ar li gi mikuli.

¹⁴Amma useˀ naŋ, garak waɗ hur kwacaya, kisa zluma taŋ a duba gala, nah na i mikuli ngi puya mungra.

¹⁵A dirba nah, kisa ja zlengerek mudumbuŋ, Aroŋ ati ziri naŋhay a sa jaka haŋ kaw kaw avu hirnga ngi zlengereke.

¹⁶Ki sa sla ˀay ngi zlengereke, ki tiɓa pumbus naŋ, joˀ ki kuca li gi mikuli gunno ti naŋ.

¹⁷Ki sa wursluka useˀe wurslak wurslak, ki buna hur kwacay naŋ waɗ poprokoyo ceɗ ceɗ, ki pa taŋ ng'ar li gi mikuli, useˀ naŋ ati hirnga naŋ ti seˀe.

¹⁸Ki sa zluma useˀ ngi zlengereke gar zlam zlam ar li gi mikuli. I mikuli mizlam zlam wãˀ da ya Bumbulvuŋ, misi zĩˀĩ naŋ matisliy mevel.

¹⁹A dirba nah, kisa ja zlengerek mucuw naŋ: Aroŋ ati ziri naŋhay a sa jaka haŋ kaw kaw avu hirnga ngi zlengereke.

²⁰Ki sa sla ˀay ngi zlengereke, ki tiɓa pumbus naŋ, ki sõhõ da Aroŋ avu mukutuk ngi slimiɗ naŋ vay hazum, waɗ mukutuk ngi slimiɗ ngi ziri naŋhaya, kisa sõhõ taŋ di avu muzuŋ haŋ taŋ madiɗa, vay hazum, avu muzuŋ sar taŋ madiɗa vay hazum. A dirba nah, kisa kuca pumbus da li gi mikuli gun gun zlar.

²¹Ki sa wuɗ pumbus misi ar li gi mikuli neˀ waɗ mal ngi vula slra, dar ki kuca da Aroŋ waɗ da zana naŋhay, yo da ziri naŋhay ati zana taŋhaya. Naŋ kine, Aroŋ ati zana naŋhaya, a tiram ngi Buymisemuŋhoy le, yo ziri naŋhay ati zana taŋhay a tiram ngi Buymisemuŋhoy le.

²²Mikuli ti tumuŋ mucuw naŋ na, a bigi zli slra ngi masayay. Useˀ ngi tumuŋ tuwa, kisa hila misi mal naŋhaya, dangwal naŋ, mal ngi hur kwacay, mevele, hor ɗugur dubahaya cuw taŋ jom ti mal naŋ, waɗ sar naŋ vay hazumo paw.

²³Angi gadagar ngi ɗaf manja ˀis ara mitaˀ a mbuŋ ɗu ya Bumbulvuŋ na, kisa hil ɗaf mugudurak gudurak manja ˀis ara, maɗaf mufukuɗa ti mal waɗ helelem mikefer kefer.

²⁴Ki sa pa taŋ cek a haŋ Aroŋ waɗ a haŋ ziri naŋhaya, kisa ɓa taŋ ɓa a vulikiy di ti gi mezegwel ngi vula gwat da ya Bumbulvuŋ.

²⁵A dirba nah, kisa tiɓa tisi haŋ taŋ, ki zluma taŋ ar li gi mikuli jom ati useˀ tuwa, i mikuli misi zĩˀĩ naŋ matisliy mevel da ya Bumbulvuŋ, mikuli vu mazluma da ya Bumbulvuŋ.

²⁶Ki sa zuɓa didak ngi tumuŋ mucuw naŋ, ki giy di mikuli ti haŋ ɗike, ki vuliy di ti mezegwel ngi vula gwat da ya Buymisemuŋ, useˀ naŋ a sa ndir da ka.

²⁷Ki sa ɓi: didak ati sar mipaw ngi zlengereke, muvula da Bumbulvuŋ ti mezegwel na, i ngi Aroŋ ati ziri naŋhay.

²⁸Vurˀe, da Israyeley ara gam mikuli ngi luuma zuy gar na, a sa zuɓaka didak ati sar paw ngi ginewe, a vulaka da Aroŋ ati dideˀ naŋhay nga mbuŋ nga mbuŋ.

²⁹A dirba Aroŋ mumuc le na, a sa vulaka zana ngi mezegwel tuwa da dideˀ naŋhay, a sa kaka tapas mezegwel ngi vul taŋ da Buymisemuŋ, pas macaka taŋ masayay.

³⁰Masay masa ci ar li ngi Aroŋ na, a sa ka zana nah avu vu hã hin tarnaˀ, i mbur masa ci ng'ar guɗuk ngi zlir ati Buymisemuŋ, ɓa ngi gi mikuli ar guɗuko.

³¹Ki sa ja tumuŋ mucuw naŋ, mabigi zli slra ngi masayay tuwa, kisa da useˀ naŋ ar guɗuko.

³²Aroŋ ati ziri naŋhay a sa zumaka useˀ ngi tumuŋ waɗ ɗaf manja ˀis misi ar gadagar tuwa, a miviŋ ngi guɗuk ngi zlir ati Buymisemuŋ.

³³Gwat migam di mezegwel ngi pula mungra le, ngi vul taŋ da ya Buymisemuŋ, ɓa a tiram masayay na, i taŋ pal taŋ masa zumaka. Mbur lambaˀ a zuma ta, asi i ngaya.

³⁴Put ti miprik naŋ, da useˀ malla ɗaf a ndir le na, kisa zliɗa taŋ ng'ar vu, a zumaka mata, asi inga ya Buymisemuŋ.

³⁵Ki sa gi ti Aroŋ ati ziri naŋhaya kasl kasl kaɓa ya muɓuw di ɗaˀ le na. Mezegwel ngi ci masay a zik hin tarnaˀa.

³⁶Vur hin gar na, kisa gi mikuli ngi pula mungra ti gusoŋ, kisa ɓula dili misi ar li gi mikuli. A dirba nah, kisa pa mal a hirnga mikuli ngi vul da ya Buymisemuŋ.

³⁷Ki sa gi hin tarnaˀ ar li gi mezegwel ngi pula mungra, li gi mikuli a sa tiri nga ya Buymisemuŋ, naŋ kine, li gi mikuli a sa tiri guɗuk nga ya Buymisemuŋ, gwat muduk di vu le gar na, a sa tiri ngaya.»

³⁸«Vur hin gar na, mikuli ka masa ga ngi caˀ ani: ziri tumuŋhoy cuw, ngi vi pal palay.

³⁹Mikuli ti tumuŋ mudumbuŋ ti mipriki, mucuw naŋ ti li zuyyo.

⁴⁰Hapa kilo makir, mufukuɗa ti mal miɗelele litir pal ti reta, waɗ mbaazla ngi pusl, litir pal ti reta bac ng'avu tumuŋ ngi gi mikuli ti miprik tuwa.

⁴¹Tumuŋ mucuw naŋ, kisa gi di mikuli ti li zuyyo, kisa ga ti gwat mupurlahay: mbaazla ngi pusl, kaɓa ka miga ngi miprik tuwa. I mikuli matisl mevel, vu mazluma da ya Bumbulvuŋ.

⁴²Mikuli mizlam zlam kum masa gaka a mizlingre ngi guɗuk ngi zlir ati Buymisemuŋ na, i nah so. Ki sa gaka ngi caˀa vur vi vur vi a mbuŋ ɗu, ya masa zlir ti ka ɓa i ɓuw ɓi na, a diga so.

⁴³I sa zlir ti Israyeley ar li misi y'ada deŋ ti dudoko, li nah a tiri nga ya Buymisemuŋ ti dudok ɗu.

⁴⁴Guɗuk ngi zlir ati ya Buymisemuŋ waɗ li gi mikuli, i sa tiri taŋ da ya ti haŋ ɗu, kaɓa ya mitiri ti Aroŋ ati ziri naŋhay, ɓa a gikiy mikuli na.

⁴⁵I sa ndir a wuzla Israyeleye, i sa tiri Buymisemuŋ taŋ.

⁴⁶A sa sinaka, yi Bumbulvuŋ, Buymisemuŋ taŋ mubo ti taŋ ti hirwuy Ezipte, ɓa i ndir a wuzla taŋ. «I ya Bumbulvuŋ Buymisemuŋ taŋ.»