Read South Giziga EXO 3 Bible Online

EXO 3 - South Giziga bible

EXO 3

¹Moyis ara jigin ginew ngi jomo naŋhay Zetro, masay ngi hirwuy Madiyan. Aru ti gineweye tuwaɗ wuzla ɓuh, a ndila muwã ngi Buymisemuŋ a Horep.

²Modro ngi Bumbulvuŋ a bigaŋ vu ar irne vu, a wuzla sisim. A pura ngrimme: Sisim ara tiɓi vu ɓula, amma naŋ anta wur ta.

³Moyis a ɓi: «I ru balla ɓa i ra pura gwat ngi zuma hirnga nah vuna: Sisim mawur ta na vur mike?»

⁴Bumbulvuŋ a pura na, Moyis ara ru balla ɓa a puraŋ, joˀ Buymisemuŋ a zilo di ti wuzla sisime: «Moyis! Moyis!» Moyis a zilaŋ mi: «Y'ani!»

⁵Bumbulvuŋ a ɓaŋ: «Ki kiroho ng'aka ta! Cuko tarak ngi sar ɗikey avra, asi li ka mideŋ ara na, i li ngi Buymisemuŋ.»

⁶Buymisemuŋ a ɓaŋ: «Yi Buymisemuŋ ngi dideˀ ɗikey, Abraham, Izak, waɗ Zakop.» Moyis a sirta hiri sirit, asi a zluwun ti Buymisemuŋ.

⁷Bumbulvuŋ a ɓi: «I pura bonoy ngi mizli ɗuwoy misi a Ezipte na le, yo i cine widi taŋ, asi buy ngi slrahay makiɗaka taŋ na le. Haˀaw i si na bonoy taŋ le.

⁸I po sar le ɓa i laha taŋ tisi haŋ ngi Ezipteheye, yo ɓa i ru ti taŋ tir hirwuy hana, nga hirwuy mezle mikirngiŋ, ngir ti ruwuy misi ɗuwa ati mam, ara ɓulom ara, ngir tivi hirwuy Kanaˀanay, Hitihey, Amorihey, Perizihey, Hivihey waɗ Zebusihey misi araŋ.

⁹Ani wurenna, widi ngi Israyeley, a ndilo le sesẽŋ avu ya, i pura bonoy Eziptehey magaka taŋ di na le?

¹⁰Wurenna, aru, yi slinuw ng'avu buy madiɗa ngi Ezipte, ara bo ti mizli ɗuwoy, Israyeley ti hirwuy Ezipte avra.»

¹¹Moyis a ɓa Buymisemuŋ na: «Yi wa ɓa i ru ng'avu buy madiɗa ngi Ezipte, yo ɓa i bo ti Israyeley ti hirwuy Ezipte ka?»

¹²Buymisemuŋ a mbiɗaŋ di: «Y'ada ati ka, yo gwat masa biga i ya mislinuw na, anihĩ: Da ki bo ti Israyeleye le ti hirwuy Ezipte na, kisa huruk hurukam a mbuŋ ɗu, ya Buymisemuŋ a muwã hana.»

¹³Moyis a mbiɗa da Buymisemuŋ na: «Pura ɗi! I sa ru ng'avi Israyeleye so, i sa ɓa taŋ: Buymisemuŋ ngi dideˀ kumoy a slino ya le ng'avu kum. Da a ɓikiy le: Slimiɗ naŋ mbrike na, i sa ɓa taŋ mbrike?»

¹⁴Buymisemuŋ a mbiɗa da Moyise: «Kisa ɓa taŋ, a zilikiy Y'ADA YA YAHHA.» A ɓi: «Ki sa mbiɗa da Israyeleye kahana: Y'ADA mislino ya ng'avu kum.»

¹⁵Buymisemuŋ a ɓa Moyise ma: «Ki sa ɓa Israyeleye na: BUMBULVUŊ, Buymisemuŋ ngi dideˀ kumoy, Abraham, Izak, waɗ Zakop, a slino ya le ng'avu kum. Slimiɗ ɗu i hana ngi caˀa, a sa zilikiy nga mbuŋ nga mbuŋ ndrehhe kahana.

¹⁶Aru, cikila mizli micawwa ngi Israyeleye, ɓa taŋ na: Bumbulvuŋ, Buymisemuŋ ngi dideˀ kumoy, Abraham, waɗ Zakopo, a bigiy vu le, a ɓiy na: I juwa le a mevel ɗu ɓa i kil widi kumo, asi gwat magukum di a Ezipte na.

¹⁷Yo yi ɓi: I sa bi ti kum tir bonoy kum a Ezipte na nga hirwuy ngi Kanaˀanay, Hitihey, Amorihey, perizihey, Hivihey ati Zebusihey misi araŋ, nga hirwuy misi ɗuwa ati mam maɓulom araŋ.

¹⁸A sa cinaka mi ɗike, kisa cam ngi hay buy madiɗa ngi Ezipte, ka ati mizli micawwa ngi Israyeleye, kisa ɓakaŋ: Bumbulvuŋ, Buymisemuŋ ngi Heberey a biga ndra vu le deŋ a mbuŋ ndra, yo wurenna, sey i ram hiipas hiipas hin makir nga wuzla ɓuh, nga gi mikuli da Bumbulvuŋ Buymisemuŋ ndra.

¹⁹Amma i si na le, buy ngi Ezipte anta sa pulukum jiviɗ ɓa ki ram ta, sey tak ˀay ti gidaŋ.

²⁰I sa zuɓa haŋ ɗu, i sa ga bonoy da Eziptehey ti gi cekenehey wal wal a wuzla taŋ. A dirba nah, a sa pulukum, ki ram.

²¹I sa ga ɓa Eziptehey a gaka mezle da mizli ɗuwoyo, yo da ki ra ram so na, ki ram haŋ kavbar kine ta:

²²gwat ngi ɓiri gaza, ɓiri tapasl tapasl waɗ godo, ngwas Israyel gar, a sa cufuɗ avu mbur cil naŋ, malla avu ngwas migi slra ngi hay naŋ. Ki sa vulaka taŋ da ziri mizile ati mongoso kumoy a jijiraka taŋ. Ki sa tiɓaka gwat ngi Ezipteheye kahana.»