Read South Giziga EXO 30 Bible Online

EXO 30 - South Giziga bible

EXO 30

¹Yo kisa ɗiyi li gi mikuli ti dum ngi ngalalay, ɓa ngi zluma urdi.

²Jek naŋ ati sliprik naŋ i misi purla, saŋtimetir kukur zlum, yo gil naŋ metir pal. Mivay naŋhaya yoŋ yoŋ kaɓa durum, sirlim jom ati vu naŋ.

³Ki sa kuroŋ ɓiri tapasl tapasl pal naŋ, vay hirnga naŋ, mivay naŋhay miyoŋ yoŋ tuwa waɗ vay huroˀo gun gar, yo kisakaŋ ɓiri tapasl tapasl gilaɗ gilaɗ a mi naŋ gun.

⁴Ki sa ɗiyi ɓalaŋhay cuw ti ɓiri tapasl tapasl, kisa nga taŋ ar cakay naŋhaya ti ka ti ka, asi virzi ngi ɓiri tapasl tapasl migilaɗɗa tuwa, ngi sa ci ɓeɓele anga ngi jijir naŋ.

⁵Ki sa ɗiyi ɓeɓele ngi ngalalayay cuw, ki kuro taŋ ɓiri tapasl tapasl.

⁶Ki sa ɗuva li gi mikuli misenna tuwa, taˀ a mbuŋ zana minjar matika hiri ngi akoti misi ɗerewol ngi jumoˀay anga a mbuŋ mi ngi akoti ngi jumoˀaya, ar li ndra masa zliram na.

⁷Ti miprik gar na, Aroŋ muru le nga sumuɗo lampehey misi ar guɗuko na, a zluma urdi ngi vul da ya Buymisemuŋ.

⁸Yo ti li zuyyo gar, naŋ masa ra bula vu avu lampehey na, a sa zluma ma. I urdi mazlumaka hã ngi set a mbuŋ ɗu.

⁹Urdi ngi zlum anga, naŋ taˀ ti ɗuf. Ko mikuli mizlam zlam wãˀ, ko gwat ngi migam ngi vul, yo ko pusla mbaazla anta sa gam anga ta ma.

¹⁰«Sar pal angi vi gar na, Aroŋ a sa zuɓa hiryi ngi li gi mikuli avra, a sa gica pumbus ngi gwat ngi mikuli da mivay naŋhay muyoŋ yoŋ na, ngi pula mungra ngi mizli. A sa mahiri ngi mikuli nah na vur vi vur vi hã ngi set. Li gi mikuli nah na, a sa ndir da ya Bumbulvuŋ, i li mipal wãˀ.»

¹¹Bumbulvuŋ a ɓa Moyise ma:

¹²«Ti ka masa slufa Israyeley na, mbur gar a sa vul gwat da ya Bumbulvuŋ ngi mbiɗa hirnga ngi siifa naŋ, ɓa ko mendere a lumukum ar li slufa vu ta.

¹³Mbur ngi sluf gar na, a sa vul suloy zlum, i reta ngi buutu mawurkaka ar hay nga ya Buymisemuŋ. Ki sa tiɓaka dala nah ti slimiɗ ɗu.

¹⁴Mbur masa slufaka gar, mindila le vi kukur cuw malla a funa le gar na, a wuruk buutu da ya Bumbulvuŋ.

¹⁵Mbur misi zlili a vul fineˀ nah ta, na misi murgahay kwana, a wurkam keɗec ta, mbur gar a wuruk suloy zlum da ya Bumbulvuŋ ngi mbiɗa hirnga ngi siifa naŋ.

¹⁶Ki sa tiɓa dala ngi mbiɗa hirnga ngi Israyeleye, ki vula ngi gi slra ar guɗuk ngi zlir ati Buymisemuŋ. Israyeley mimbiɗaka hirnga ngi siifa taŋ na, wuluk naŋ a sa so keŋ a hirnga.»

¹⁷Bumbulvuŋ a ɓa Moyise ma:

¹⁸«Ki sa ɗiyi kisa ngi ɓiri gaza jom ti li ɗuv naŋ, ɓa ngi buna haŋ ati saray, kisa ɗuva taˀ ar wala ngi guɗuk ngi zlir ati Buymisemuŋ ati li gi mikuli waɗ yam cer cer ara.

¹⁹Aroŋ ati ziri naŋhay a sa bunam di haŋ ati saray.

²⁰Taŋ masa cam ng'ar guɗuk ngi zlir ti ya Buymisemuŋ malla taŋ masa kiraham ng'ar li gi mikuli, ɓa ngi giy mikuli na, a sa bunam ti yam nah ɗagay.

²¹Naŋ kine, a sa bunaka haŋ ati saraya vur taŋ mamicam. Hana i ɓimujuwa vur taŋ ati dideˀ taŋhay nga mbuŋ nga mbuŋ.»

²²Bumbulvuŋ a ɓa Moyise ma:

²³«Wi vu ti urdi hirngahay: urdi mikuler mazilaka mir , kilo zlum, sinamom mazĩˀĩ ndum, kilo cuw ti reta, kanel mazĩˀĩ ndum, kilo cuw ti reta,

²⁴waɗ urdi mazilaka kas , kilo zlum, kaɓa mawam gwat wurenna ar hay ngi Buymisemuŋ, waɗ mal ngi tutumbur litir merkeɗ.

²⁵Mbur misina vurɗo urdi, a sa jihiɗa taŋ, ɓa a tiri di mal ngi vula slra, i mal ngi gi mezegwel ngi wini mbur ngi slra.

²⁶Ki sa pa da guɗuk ngi zlir ti ya Buymisemuŋ, da akoti misi ɗerewol ngi jumoˀay anga,

²⁷da tabul ati gwat ngi slra naŋhay, da li ɗuva lampe ati gwat ngi slra naŋhay, da li gi mikuli ti urdi,

²⁸da li gi mikuli ti ginew zlam zlam ati gwat ngi slra naŋhay, da kisa ati li ɗuv naŋ.

²⁹Ki sa vula taŋ ɓa a tiram i gwat muvuku vu taŋ wãˀ, gwat muduk di vu le gar na, a tiri le inga ya Buymisemuŋ.

³⁰Ki sa pa mal nah da Aroŋ ati ziri naŋhay aya. Ki sa tiri taŋ nga yahay ɓa a gikiy mikuli.

³¹Ki sa ɓa Israyeleye na: hana i mal ngi Buymisemuŋ, ngi wini mbur ngi slra. Angi pas wanaka gar na, sey a sa gam di slra nga ya Buymisemuŋ.

³²Mbur masa ga avu vu anta, ko ki lihiɗam mal ɓa a bam vu ati naŋ ta, asi i mal ngi mezegwel, yo anja a ndir avu kum i ngi mezegwel.

³³Mbur mijihiɗ urdi misi purla kahana le, yo a puya le da mbur ho gar na, a sa ɓulaka ti wuzla muy naŋhay avra.»

³⁴Bumbulvuŋ a ɓa Moyise ma: «Wi vu ti yam ngi gwat mazãˀãm ndum: Sitorak , onik , waɗ galbanum , wuɗ mukuturɓuy ngi zlum ti zlum pal naŋ, jihiɗa taŋ rak rak ati urdihey tuwa.

³⁵Mbur misina di urdi, a sa jihiɗa taŋ ti mandaŋ, ɓa a tiri leɗeɗe ngi gi mezegwel.

³⁶Cahha, a sa tiri di hapa hapa, kuɗ kuɗ, ɓa a sa gam di slra ar guɗuk ngi zlir ti ya Buymisemuŋ, a mbuŋ akoti nga ya Buymisemuŋ, ar li ya masa wuw haŋ anga. A sa gi avu kum i urdi mipal wãˀ.

³⁷Anta sa jihiɗam urdi mubam vu ati hana, ɓa a gam di slra lambaˀ ta, anja a ndir avu kum i ngi gi slra ɗu tewle.

³⁸Mbur misa jihiɗ urdi mibam vu le ati hana, ɓa a mumul ti zĩˀĩ naŋ mundum na, a sa ɓulaka ti wuzla muy naŋhay avra.»