Read South Giziga EXO 31 Bible Online

EXO 31 - South Giziga bible

EXO 31

¹Akẽh na, Bumbulvuŋ a ɓa Moyise:

²«Cina ɗi, Besalel mbur Zuda, mangal ngi Uri, dideˀ ngi Huro, i wunaŋ le da ya.

³I nahaŋ le ti ˀUf ɗu, ɓa a tiri misi sinmijileŋ, yo misi lesle. A si na ɗiya gwataya le gar ti jiviɗ naŋ ti jiviɗ naŋ.

⁴A si na wulka gwat ngi sa gi tumbuŋ le, a si na ɗiya gwat ti ɓiri tapasl tapasl, ti ɓiri bara waɗ ɓiri gaza le.

⁵A si na ciɗa ɗugur mupuɗaw puɗaway ngi gi wuya da gwataya le, a si na ciɗa dumo le, na zle, a si na gwataya le gar si.

⁶Ani ma na, Oholiyap mbur Daŋ, mangal ngi Ahisamaka, i vulaŋ di le, ɓa a jumom cuwa, yo ma na, i vula sin le haɗi da misina gwatay mbeˀ mbeˀ, ɓa taŋ jom gar na, a sa kiɗaka mi ngi gwatay ya muvuluw taŋ ngi gi na gar:

⁷guɗuk ngi zlir ti ya Buymisemuŋ, akoti misi ɗerewol ngi jumoˀay araŋ, mi ngi akoti, gwat misi ar guɗuk gar,

⁸tabul, li ɗuva lampe misi ti ɓiri tapasl tapasl pal naŋ ati gwat ngi slra naŋhay gar, li gi mikuli ti urdi,

⁹li gi mikuli vuna jom ati gwat ngi slra naŋhay, kisa ati li ɗuv naŋ,

¹⁰zana ngi slrahay, zana ngi gi mezegweley, ɓa masay Aroŋ maka taŋ, zana ziri naŋhay masa kaka taŋ ngi gi mikuli.

¹¹Mal ngi vula slra waɗ urdi ngi zlum ar hay ngi Bumbulvuŋ. Misina gwatay a sa gaka kasl kasl kaɓa ya muɓuw di na.»

¹²Bumbulvuŋ a ɓa Moyise:

¹³«Ɓa Israyeleye na: Sey ki ɗuvaka hirnga da hin ngi sabata , asi i gwat masa biga kum jom ati ya ngi caˀa, yo ɓa a sinaka i ya Bumbulvuŋ muwunukum ɓa ki tiram da ya.

¹⁴Ɗuvaka hirnga da hin ngi sabata so, anja ki puraka kaɓa i hin ho gar ta. Mbur misa gi di le lambaˀ lambaˀ, yo a gi slra le tapasa na, a sa bam di ti wuzla mizli avra, a kiɗaka vagay.

¹⁵Vur luuma gar na, hin ngi gi slra ada merkeɗ, amma hin mitarnaˀ naŋ na, i sabat, pas musuka vu, hin muvula le da ya. Ko wa gar migi slra le tapas sabat na, a sa kiɗaka vagay.

¹⁶Dideˀ ngi Israyeley nga mbuŋ nga mbuŋ, sey a sa ɗuvaka hirnga da pas sabata, ɓa a tiri i jumoˀay masa ndir hã ngi set.

¹⁷Hin nah na, i gwat masa biga Israyeley mujom ati ya vuna. Naŋ kine, i ga muŋ ati gwat ngi raˀahay gar, yo hirwuy ati gwat ngi raˀahay gar na, angi hin merkeɗe, amma angi hin mitarnaˀ naŋ na, i cica slra ɓa i musuk vu.»

¹⁸Akẽh na, Buymisemuŋ mikiɗa mingiɓi naŋ ati Moyis a muwã Sinay muduba na, belelerey mucuw, naŋ mutoho ɓimuɗuvahay ti haŋ naŋ ar taŋ na, a vula taŋ da Moyise.