Read South Giziga EXO 32 Bible Online

EXO 32 - South Giziga bible

EXO 32

¹Israyeley a puraka keɗ keɗ na, Moyis a zum vu le ngi po sar ti muwã, a kusom timbiɗim a ciki Aroŋ, a ɓakaŋ: «Slikiɗi! Ga ndra buymisemuŋ maki ɓaˀ a mbuŋ ndra, asi Moyis mbur mubo ti ndra ti hirwuy Ezipte tuwa, da i mi migi ava ka na, i si na ka ta

²Aroŋ a mbiɗa taŋ di: «Cukoko gwat ngi ɓiri tapasl tapasl ngivi slimiɗ ngi ngwas kumoy, ngi ziri mizile kumoy waɗ ngi ziri mongoso kumoyo, sikiy taŋ.»

³Israyeley gar a cukoko gwat ngi slimiɗ taŋhay ngi ɓiri tapasl tapasla cek, a soko taŋ da Aroŋ.

⁴Aroŋ tuwa, a tiɓa taŋ, a luwusla taŋ, a zluro ng'ar gwat ngi ndira zuŋ sla, a bo ti zuŋ sla mindira deŋ. Akẽh Israyeley a ɓam so na: «Hana i buymisemuŋ ndra mubo ti ndra ti hirwuy Ezipte tuwa!»

⁵Aroŋ mupura keɗ keɗ na, a ɗiyi li gi mikuli a mbuŋ zuŋ sla tuwa, dar a til mi, a ɓi na: «Ti prike, i muguzlum ngi hunuma Bumbulvuŋ!»

⁶Li naŋ muwuno, ceɗ hiri si na, mizli a gam mikuli mizlam zlam wãˀ, waɗ mikuli ngi luuma zuy, mizli a cifam jojoˀ, a zumam gwat, a sam mbaazla, a slikiɗam ɓa a gam dungur.

⁷Akẽh Bumbulvuŋ a ɓa Moyise na: «Pi sar kutum so, asi mizli ɗikey, ka mubo taŋ ti Ezipte tuwa, a gam mungra madiɗa le.

⁸A ngizlam le kutum mbak jiviɗ ya mibiga taŋ di na, a luwuslam ɓiri tapasl tapasl, a gam di zuŋ sla, a huruk hurukam a mbuŋ naŋ, a gakaŋ mikuli, a ɓam: Ndra Israyeleye, buymisemuŋ ndra mubo ti ndra ti hirwuy Ezipte n'anihĩ!

⁹Bumbulvuŋ a ɓaŋ ma: Yi pura mizli hanayna keɗ keɗ na, kay! I sukwi macin mi ta!

¹⁰Yo wurenna, puliy i ga gwat ya mawuɗo: mevel a jiy le ar taŋ, i sa ngizla taŋ kuɗup, i sa ɗuv sukwi madiɗa taˀ mabo tivi ka.»

¹¹Amma Moyis a tisla mevel da Bumbulvuŋ Buymisemuŋ naŋ, a ɓaŋ: «Bumbulvuŋ, sukwi ɗik ka mubo di ti hirwuy Ezipte ti gidaŋ ɗik mihaɗi, yo ti hirbazla ɗik migidaŋ na, ki ji mevel ar taŋ vur mike?

¹²Da ki ga le kahana na, Eziptehey a sa ɓam: Bumbulvuŋ mibi ti Israyeley ti hirwuy ndra na, a bi ti taŋ ngi moˀore, a wuɗ ɓa ara kiɗa taŋ vagay vagay a ruwuy muwãhay, a ngizla taŋ kuɗup wãˀ asi ruwuyo. Buymisemuŋ ɗu, tisla mevele, pula gi malambaˀ da sukwi ɗike.

¹³Wuluk ar gawla ɗikey Abraham, Izak waɗ Zakop na kwaɗay ayɗi, ki hudum le a mbuŋ taŋ ti slimiɗ ɗik tehhe a muŋ, ki ɓi na: I sa ga ɓa dideˀ kumoy a yam haɗi kaɓa wurzlaŋhay a muŋ. Hirwuy ya miɓa ɗaˀ le, i sa vula taŋ di tuwa, a sa ndir wãˀ da taŋ.»

¹⁴Dar Bumbulvuŋ a pula malambaˀ, naŋ mawuɗ a ga da mizli naŋhay zleˀe tuwa.

¹⁵Akẽh na, Moyis a po sar baɗ a muwã a muŋ. Naŋ kaw ti belelerey mucuw, Buymisemuŋ mutoho ɓimuɗuva ara nguɗ nguɗ ti ka ti ka tuwa.

¹⁶Beleler tayna, i slra ngi Buymisemuŋ, i Buymisemuŋ ti haŋ naŋ mutoho nguɗ nguɗu.

¹⁷Ti Zozuwe micina mizli majam salalay na, a ɓa Moyise: «Cina hurum ngi vurum ar walahay guɗuko!»

¹⁸Amma Moyis a mbiɗaŋ di: «Aˀa, i salalay asi a lumam bugawla le ta, asi a hĩhĩyam le ta ma. Ya macina na, i ˀay ngi dimis!»

¹⁹Ti taŋ mindiloko gweˀ avu walahay guɗuko muduba na, Moyis a pur zuŋ sla waɗ mizli maɓurgam. Mevel a jaŋ haɗi: a zliɗa belelerey mikaw a haŋ naŋ tuwa, a waham meɗ meɗ a sar muwã.

²⁰A zuɓa zuŋ sla taŋ mipaka ti pi ar vu tuwa, a hiziga ng'ar vu, a musukuɗo kuɗ kuɗu, a futo fut fut ar yam, a vula da Israyeley a sakaŋ.

²¹Dar a ɓa Aroŋ na: «sukwi hana vuna, a guw mi ɓa ki ci ti taŋ ng'ar mungra madiɗa kahana ka?»

²²Aroŋ a mbiɗaŋ di: «Ambuh ki ji mevel ta! Ka vuna ti haŋ ɗike, ki si na le, mizli hanayna a wusam vu haɗi ngi gi malambaˀa.

²³A ɓikiy na: Ɗiya ndra buymisemuŋ maki ɓaˀ a mbuŋ ndra, asi Moyis mbur mubo ti ndra ti hirwuy Ezipte tuwa, da i mi migi ava ka na, i si na ka ta

²⁴Yi cufuɗa taŋ na: mbur misi ɓiri tapasl tapasl ava i waka? A cukoko taŋ avu slimiɗ taŋhaya, a vulikiy taŋ. Yi luwusla taŋ ar vu, joˀ yi bo ti zuŋ sla misenna.«

²⁵Moyis a pura keɗ keɗ na, Aroŋ a pula mizli zlaɗ, a gam ka taŋ mawuɗam, ɓa mesene taŋhay a singiram ar taŋ.

²⁶Akẽh na, Moyis a cici deŋ a mizlingre ngi walahaya, a ɓi: «Mizli mawuɗam Bumbulvuŋ, soko ng'avi ya aka!» Dideˀ ngi Levihey gar a kusoko ng'ava.

²⁷A ɓa taŋ: «Bumbulvuŋ, Buymisemuŋ ngi Israyel a ɓi na: Ko wa gar asi kumo, a zuɓa maslalam naŋ. Bulaka walahaya vur hay vur hay, kiɗaka sukum kumoy, ngama kumoy, midigwi kumoyo.»

²⁸Dideˀ ngi Levihey a cinaka mi da Moyise, hã Israyeley mumicam tapasa, a gam gwat ngi durmuk makir gu.

²⁹Dar Moyis a ɓa Leviheye: «Zle dana, kum i muwunahay le ngi gi slra ngi Bumbulvuŋ, asi ko ki murom ngi kiɗa ziri kumoy malla sukum kumoyo ta. Yo anja Bumbulvuŋ a ɗuwulukum mi pas dana.»

³⁰Ngi miprik naŋ na, Moyis a ɓa mizli: «Ki gam mungra madiɗa le, amma wurenna, i wuɗ i jiɗ nga muwã, avu Buymisemuŋ, asinta, i sa lum jiviɗ ɓa a pulukum mungra kumoyo kwani.»

³¹Moyis a mi ng'avu Bumbulvuŋ, a ɓaŋ: «ˀEy ehe! Mizli, a gam mungra madiɗa le, a ɗiyam zuŋ sla le ti ɓiri tapasl tapasl ar deɗe ngi buymisemuŋ taŋ.

³²Amma wurenna, ambuh takwa, pula taŋ mungra taŋhaya! Da kine ta na, slimiɗ ɗu ka mutoho ar ɗerewol ngi siifa na, vuvuyo avra.»

³³Bumbulvuŋ a ɓaŋ: «Kanah ta, ya masa vuvuy avra na, sey slimiɗ ngi mizli migam mungra le avu ya.

³⁴Wurenna, aru so, aru ti mizli ng'ar li ya mubuguw di na, i modro ɗik masa ki ɓaˀ a mbuŋ ɗike. Amma tapas ya misa ndil le a wuzla taŋ na, i sa kuta taŋ ti bonoy vur mungra taŋ na.»

³⁵Dar Bumbulvuŋ a kuta Israyeley ti bonoyoyo, asi taŋ mucufuɗaka Aroŋ ɓa a ɗiya taŋ zuŋ sla na.