Read South Giziga EXO 34 Bible Online

EXO 34 - South Giziga bible

EXO 34

¹Bumbulvuŋ a ɓa Moyise na: «Ciɗ beleler mekelemey cuw, kaɓa numuŋhoy ka muwaha taŋ na. I sa tuh di ɓi misi purla ati misi ar beleler mudumbuŋhoyo.

²Wi vu ngi tiprik, ti miprik priki, kisa jiɗ prik prik nga muwã Sinaya, kisa kutikiy a hirnga muwã a diga.

³Anja mbur a jiɗ asi ka ta, hirnga muwã kurzluˀ gar, anja a puram mbur loŋ ara ta, anja ko ginew: tumuŋ, ˀaw malla sla a zum gweˀ a cikeˀe akẽh ta.»

⁴Moyis a ciɗ belelerey cuw ka naŋ miciɗa mudumbuŋhoy tuwa ma. A slikiɗ cẽẽt ngi miprik prik, a hila belelerey mucuw tuwa, a jiɗ nga muwã Sinaya, kaɓa Bumbulvuŋ miɓaŋ di tuwa.

⁵Bumbulvuŋ a po sar ar mulbuɗ, a cici a cikeˀe, joˀ Moyis a zla zila slimiɗ Bumbulvuŋ.

⁶A dirba nah, Bumbulvuŋ a cuh ti mbuŋ Moyise, a til mi, a ɓi: «I ya Bumbulvuŋ, yi Bumbulvuŋ, Buymisemuŋ mupura ircece, misi mevel mezleŋ, i ji mevel kutum ta, ya teŋteŋ, yo kaslsla haɗi.

⁷I biga gi mezle ɗu hã dideˀ dideˀ durmuk. I ɓusa malambaˀ ati slikiɗa ɓi waɗ mungra. Amma mbur migi gwat le na, y'anta tiɗi kalaf ara ta. I mbiɗi hirnga avu mbur migi mungra, avu ziri naŋhay hã dideˀ dideˀ makir malla mufaɗa.»

⁸Moyis a huruk huruk kutum a ruwuy, a tumbulo Bumbulvuŋ.

⁹Dar a ɓi: «Bumbulmuŋ ɗu, da ki ra giy mezle gisiŋ na, ambuh, sawa, kisa ndra. Yi si na le, mizli tayna, hirnga taŋ gidaŋ, amma pula ndra mungra ati malambaˀ ndraˀahaya, yo pura ndra ka mizli ɗikeye!»

¹⁰Bumbulvuŋ a ɓa Moyise na: «I wuɗ i jumˀay ati kum. I wuɗ i gi gwat mezlehey a mbuŋ mizli ɗikey gar, gwat mupuram ɗaˀ asi ruwuyo ta, ko a wuzla sukwi wanaka gar na, a puram ɗaˀ ta. Israyeley misi a ciki ɗike gar, a sa puraka, slra ɗu ya mawuɗ i ga tisi ka na, i gwat ngi zuma hirnga.

¹¹Ɓi ya maɗuvukum di dana ani na, sipaka kuy kuy. Mizli Amorihey Kanaˀanay, Hitihey, Perizihey, Hivihey waɗ Zebusihey na, i sa ɓula taŋ a mbuŋ kumo.

¹²Jam lesl, mizli kum masa cam nga hirwuy taŋ gar na, ki jumom ati taŋ ta, naɓa a sa tiri i kwar avu kumo.

¹³Amma wahaka li gi mikuli taŋhay ati ɗugur taŋhay mikaˀ kaˀhaya, yo bukoko kuli ɓamtal taŋhay avra.

¹⁴Naŋ kine so, ko ki huruk hurukam a mbuŋ buymisemuŋ ngi mulakay ta, asi a zilikiy ya Bumbulvuŋ ‹Mawuɗ vu suloŋ suloŋ›. Yi wuɗ ɓa a huruk hurukama, a mbuŋ ɗu pal ɗu tewle.

¹⁵Ki gam gwat ngi jumoˀay ati mizli ngisi hirwuy nah ko neˀ ta. Asi da ara gam mezegwel da kuli taŋhay na, naɓa a sa zulukum, joˀ kisa zumam gwat ngi kuli taŋhaya.

¹⁶Da ziri kumoy ara zuɓam ziri taŋhaya ngi ngwas na, naɓa ziri taŋhay masa huruk hurukam a mbuŋ kuli taŋhay na, a sa sirkaka ziri kumoyo, a huruk hurukam aya.

¹⁷Ki luwuslam ɓiri ngi pi kulihey ta.

¹⁸Ki sa gaka muguzlum ngi ɗaf manja ˀis ara. Hin tarnaˀ muɗuva angi kiya Abip na, kisa zumam di ɗaf manja ˀis araŋ, kaɓa ya muɓukum di tuwa, asi kum muboko ti Ezipte na, i kiya nah.

¹⁹Modogom gar na inga ya, ko ngi ginew kumoy: Gwat modogom mizile gar, ngi sla, ngi tumuŋ, ngi ˀaw na, sey ki vulikiy di da ya.

²⁰Amma modogom ngi zungu na, ki mbiɗaka ti tumuŋ malla zuŋ ˀaw. Da ki mbiɗaka ti gwat mekelem ta na, murguɗokoŋ ˀaya ɓa a mucu. Ziri mizile modogom kumoy cek na, sey ki mbiɗaka hirnga taŋ ti gwat mekelem. Ki soko ng'ar hay ɗu haŋ kavbar kine ta.

²¹Ki sa gam slra hin merkeɗe, amma ar hin mitarnaˀ naŋ na, ko ar hin ngi huf malla hin ngi sifi kwana, ki gam slra ta.

²²Ki sa gaka muguzlum ngi zuma gwat mutukuzo, ti kum maslaka alkamari mudumbuŋ, yo muguzlum ngi sifi kwana, ar kiɗa mi ngi vi.

²³Yi Buy ngi gwat gar, vur vi gar na, mizli mizile kumoy, a sa soko is makir nga mbuŋ ɗu, ya Bumbulvuŋ Buymisemuŋ ngi Israyele.

²⁴Naŋ kine, ti ya misa ɓula mizli ngi ruwuy misi a mbuŋ kumo le avra, yo ya misa tiri ti hirwuy kumo le kirngiŋ so na, ar hin ngi muguzlum mimakirey ar vi, kum masa ram di ndol le nga mbuŋ ɗu, ya Bumbulvuŋ, Buymisemuŋ kumo na, ko mbur masa zli ɓi ngi tiɓa hirwuy kumo anta.

²⁵Kum masa gikiy mikuli ti ginewey na, ki soko di aseˀe i ɗaf misi ˀis ara ta. Ki wam vu ti useˀ ngi mikuli ngi Paka, hã li a wun di ta.

²⁶Gwat ngi migam mudumbuŋ ngir guva kumoyo, kisa soko taŋ ng'ar hay ɗu, asi yi Bumbulvuŋ Buymisemuŋ kum. Amma ki da ka zuŋ ˀawa ti ɗuwa ngi mumuŋ tehhe a muŋ ta.

²⁷Bumbulvuŋ a ɓa Moyise ma: «Toho ɓimuɗuva hanayna ti tuhu, asi jumoˀay ndra ati ka waɗ ati mizli Israyeley na, hirnga naŋ i nah.»

²⁸Moyis a ndir a ciki Bumbulvuŋ papas papas kukur mufaɗ, duvuɗ duvuɗ kukur mufaɗ, ko a zum gwat ta, a si gwat ta. Ɓimuɗuva mukuruˀhoy, ɓi ngi jumoˀaya, a toho taŋ ar belelerey.

²⁹Moyis a po sar ti muwã Sinaya, kaw ti belelerey mucuw, misi ɓi ngi jumoˀay ar taŋ tuwa. Ti Moyis mapo sara, mihiri naŋ ara wucuɗ, asi taŋ miɓam ɓi ati Bumbulvuŋ na, Moyis a si na ta.

³⁰Aroŋ ati Israyeley mupuraka mihiri naŋ mawucuɗ na, a zluwunam ngi kirih ng'ava.

³¹Moyis a zila taŋ: dar Aroŋ ati buy ɓihey a soko ng'ava, joˀ Moyis a ɓa taŋ ɓi.

³²A dirba nah, Israyeley gar a kiraham ng'ava, Moyis a slufa taŋ ɓimuɗuva Bumbulvuŋ muvulaŋ di a muwã Sinaya gar.

³³A dirba Moyis mikiɗa mingiɓi naŋ ati taŋ na, a sirta hiri sirit ti zana.

³⁴Zle tapasa, naŋ mira ci nga mbuŋ Bumbulvuŋ ɓa a ɓam ɓi ati naŋ na, a turo zana tor avra, hã naŋ misa bo le. Naŋ mubo le na, a ɓa mingiɓi naŋ mulumo di da Israyeleye.

³⁵Israyeley a puraka na, mihiri ngi Moyis ara wucuɗu. Dar Moyis a sirta hiri sirit ti zana, hã a mi ara ɓam ɓi ati Buymisemuŋ.