Read South Giziga EXO 35 Bible Online

EXO 35 - South Giziga bible

EXO 35

¹Moyis a cikila Israyeleye cek, a ɓa taŋ: «Bumbulvuŋ a ɓa ndra ɓihey ani ɗaˀ ɗaˀ ɓa i gam taŋ slra:

²Angi luuma gar na, kisa gam slra hin merkeɗe, amma hin mitarnaˀ naŋ na, i Sabat, pas musuka vu, hin nah da Bumbulvuŋ. Mbur misa gi slra le tapasa na, a sa kiɗaka vagay.

³Ko da kum angi hirwuy wanaka gar na, anja ko vu tekeɗe kwana, ki bulam tapas hin ngi Sabata ta.»

⁴Moyis ara ɓa mingiɓi ngi Bumbulvuŋ tuwa da Israyeleye gar, a ɓa taŋ: Bumbulvuŋ a ɓi ani:

⁵«Cikilam gwat ngi vul da Bumbulvuŋ, muvul ti mevel purlahay, a sa soko ti sukwi ngi gwatay gar: ɓiri tapasl tapasl, ɓiri bara, ɓiri gaza,

⁶ngwic ngi tumuŋ, munduva naŋ wit wit, micihhe malla gagaza ndezze, gugumay mislirkeɗ, ngwic ngi ˀaway,

⁷garak ngi zlengerekey, munduva naŋ gagazahay, garak ngi kilif madiɗahay, dum ngi ngalalay,

⁸mal ngi lampe, urdi ngi pi ar mal ngi vula slra waɗ urdi ngi zlum ti zlum ar vu,

⁹ɗugur mupuɗaw kakayak kakayak waɗ ɗugur mekelem mupuɗaw puɗaway, ngi luw avu jampa ngi masay madiɗa, waɗ avu jiiba naŋ ma.

¹⁰Yo misina gwat ngisi kumoy gar na, a sa cikilam cek ɓa a ɗiyaka gwat Bumbulvuŋ miɓa na:

¹¹Li mipal ati guɗuk naŋ, godo ngi njir, gwat ngi luwa zana, dum ngi ti ngi, ɓeɓelehey, ɓamtalay waɗ li ngi naŋhay,

¹²akoti ngi jumoˀay ati ɓeɓele ngi zuɓ naŋ waɗ mi naŋ, zana minjar ngi tika hiri,

¹³tabul ati ɓeɓele ngi zuɓ naŋ waɗ gwat ngi slra naŋhay gar jom ati ɗaf muvula le da Buymisemuŋ.

¹⁴Li ɗuva lampe ati gwat ngi slra naŋhay, lampe ati mal ngi lampe.

¹⁵Li gi mikuli ti urdi ati ɓeɓele ngi zuɓ naŋ, mal ngi vula slra, urdi ngi zlum waɗ zana minjar avu miviŋ ngi ci ng'ar guɗuko.

¹⁶Li zluma gwat ngi mikulihey ati griyaz naŋ ngi ɓiri gaza, ɓeɓele ngi zuɓ naŋhay waɗ gwat ngi slra naŋhay, kisa ati li ɗuv naŋ,

¹⁷zana ngi zlavaɗ waɗ ɓamtalay ati virzi naŋhay, zana minjar a mizlingreŋ ngi ci nga wazlaray,

¹⁸dum ngi ɗiya guɗuk, dum ngi zlavaɗ ngi wazlaray waɗ zeweɗ naŋhaya,

¹⁹zana ngi gi mezegweley ar hay ngi Bumbulvuŋ, zana muvuku vu taŋ, masay Aroŋ maka ka ati ziri naŋhay ɓa a gam di mikuli.»

²⁰Israyeley gar a waham, a pulaka Moyise.

²¹Akẽh na, mizli misi mevel mezlehey, mavulam ti gula ti hazumo, a soko ti gwat ngi vul taŋhay da Bumbulvuŋ, ɓa ngi ɗiya guɗuk ngi zlir ti Buymisemuŋ, ngi gi slra naŋhay gar waɗ ngi tufa zana ngi slra a mbuŋ Buymisemuŋ.

²²Mizli mizilehey ati ngwas mvul ti gula ti hazumoyo, a soko ti gwat ngi wuya taŋhay ngi ɓiri tapasl tapasl, gwat ngi slilih avu zana, gwat ngi slimiɗey, dangwahay, ɓalaŋhay malla gwat ngi ˀayay, a vulaka taŋ da Bumbulvuŋ ti gi mezegwel ngi vula gwat.

²³Mizli misi ada ti ngwic ngi tumuŋhoy, munduva naŋ wit wit, cihhe malla gagaza ndezze, gugumay mislirkeɗ, ngwic ngi ˀaway, garak ngi zlengerekey, munduva gagaza, malla garak ngi kilif madiɗahay na, a soko taŋ.

²⁴Mizli muwam vu ti dala malla ɓiri gaza na, a soko taŋ da Bumbulvuŋ. Mizli misi ada ti dum ngi ngalalay zliv a gi slra na, a soko taŋ.

²⁵Ngwas misina gwatay gar na, a siram gugumay mislirkeɗ, ngwic ngi tumuŋhoy munduva naŋ wit wit, cihhe malla gagaza ndezze, taŋ misiraka taŋ ti haŋ taŋ, dar a soko taŋ.

²⁶Ngwas mekelemey misina gwatay, a siram ngwic ngi ˀaway.

²⁷Madiɗa ngi mizli a soko ti ɗugur mupuɗaw kakayak kakayak waɗ ɗugur mekelem mupuɗaw puɗaway, ngi luw avu jampa waɗ avu jiiba ngi didak masay madiɗa,

²⁸waɗ gwat ngi zĩˀĩhey, ngi pi ar mal ngi lampehey, ar mal ngi vula slra, waɗ ar urdi ngi zlum ti zlum.

²⁹Israyeley gar, ziley ati ngwas muvul ti gula ti hazumoy gar na, a soko ti gwat taŋhaya ngi mongoy taŋ, a vulaka da Bumbulvuŋ, ɓa ngi gi slra Bumbulvuŋ muɗuva da Moyis tuwa.

³⁰Moyis a ɓa Israyeleye na: «Puraka ɗi! Besalel mbur Zuda mangal ngi Uri, dideˀ ngi Huro, Bumbulvuŋ a wunaŋ le.

³¹A nahaŋ le ti ˀUf naŋ, ɓa a lum sinmijileŋ, lesl, waɗ sin ngi gwat ti jiviɗ naŋ gar.

³²Ɗiya ɓi ngi gwat ɗiyeˀ ɗiyeˀ le ngi sa gi na, a si na le, yo slra ngi ɓiri tapasl tapasl, ngi ɓiri bara ati ngi ɓiri gaza na, a si na le maˀ.

³³A si na ciɗa ɗugur mupuɗaw puɗuwaya le, ngi slupuˀ avu gwatay, ciɗa dumoy, na zle a ga gwatay a gar gu si.

³⁴Bumbulvuŋ a vulaŋ sin le ngi dubuna gwat da mizli, kaɓa naŋ muvula da Oholiyap mbur Daŋ, mangal ngi Ahisamak na ya.

³⁵Ciɗa ɗugur mupuɗaw puɗaway, ɗiya gwatay, gi wuya dar dar da zanahay ti ngwic ngi tumuŋ munduva naŋ wit wit, cihhe malla ndezze, yo ti gugumay misira mislirkeɗ, ji zana gar, gi gwat magaka ti haŋ, yo ɗiya gwatay gar na, a vula taŋ sin nah le.