Read South Giziga EXO 36 Bible Online

EXO 36 - South Giziga bible

EXO 36

¹Besalel ati Oholiyap waɗ mizli mekelemey misina gwatay na, Bumbulvuŋ a vula taŋ sinmijileŋ ati lesle le ngi gi slraˀahaya, a sa ɗiyaka gwat ngi gi slra ar hay ngi Bumbulvuŋ, kaɓa Bumbulvuŋ mupula jiviɗ naŋ.

²Akẽh na, Moyis a zilo Besalel ati Oholiyap waɗ mizli mekelemey misina gwatay, Bumbulvuŋ muvula taŋ sinmijileŋ haɗi, yo muwuna taŋ ngi gi slra nah na.

³Moyis a vula taŋ gwatay Israyeley mucukuloko taŋ ngi ɗiya hay ngi Bumbulvuŋ tuwa. Vur miprik gar na, mizli ara soko ti gwat ngi vulo ngi mongoy taŋ na si.

⁴Dar misina gwatay maɗiyam gwatay wal wal tuwa, a cicaka slra,

⁵a ram, ara ɓaka Moyise na: «Gwat ngi ɗiya gwatay Bumbulvuŋ mucufuɗa na, mizli ara soko di fineˀ gidaŋ.»

⁶Akẽh na, haŋ haŋ si na, Moyis a ɓi ɓa a tilaka mi da mizli ngir walahay guɗuko gar: «Anja ko zil malla ngwas, a cikilo gwat ngi vul ngi ɗiya hay ngi Bumbulvuŋ mata.» Joˀ mizli a pulaka so ti gwat ngi vulo.

⁷Asi a soko di le ngi ɗiyi nah muk si, hã is naŋ ara ndir ma.

⁸Mizli misina ɗiya gwat gisiŋ gisiŋheye, a ɗiyaka guɗuk ngi Buymisemuŋ: a juɓom gabagahay kuruˀ kifilih arleˀeŋ, gabaga ngi gugumay mislirkeɗ, lahaɗ ti ngwic ngi tumuŋhoy munduva naŋ wit wit, cihhe ati ndezze, waɗ wuya ava, geˀ geˀ ti kerubeŋhey.

⁹Gabagahaya gar na, kifilih taŋ i misi purla, jek taŋ metir kuruˀ nga mufaɗ kuruˀ nga mufaɗa, sliprik taŋ kwana, metir cuw cuw.

¹⁰A juɓom dumbuŋ gabagahay zlum arleˀe kwaɗay, waɗ muzlum mekelemeye, kanah ma.

¹¹Avi mi ngi gabaga ngi dirba wãˀ, a wuzla mujuɓo mikifilih mudumbuŋ na, a tufam lawarje gagaza wit wit avu mi naŋ, waɗ avu mi ngi mudumbuŋ ngi wuzla mikifilih mucuw naŋ na ma.

¹²A tufam lawarje kukurzlum avu gabaga mikifilih mudumbuŋ, waɗ kukurzlum avu mikifilih mucuw naŋ, lawarjeheye taŋ cir ar cala cir ar cala.

¹³A ɗiyam gwat ngi kilika zana ti ɓiri tapasl tapasl kukur zlum, ɓa ngi kilika gabagahay mikifilih kifilih cuw tuwa arleˀeŋ, ɓa guɗuk a tiri kiɓiŋ kiɓiŋ arleˀeŋ.

¹⁴A dirba nah, a jam godohoy kuruˀ ngaŋ kaˀ, ti ngwic ngi ˀaway, ɓa ngi sirta guɗuk mucuw naŋ na ma.

¹⁵Kifilih ngi godo gar i misi purla, jek taŋ metir kuruˀ nga zlum kuruˀ nga zlum, sliprik taŋ metir cuw cuw.

¹⁶A juɓom dumbuŋ i godohoy zlum arleˀe kwaɗay, waɗ mimerkeɗ mekelemeye joɓ joɓ arleˀe pala ma.

¹⁷Avi mi ngi godo ngi dirba wãˀ, a wuzla mujoɓ joɓ kifilih mudumbuŋ na, a tufam lawarje kukur zlum ava, waɗ kukur zlum avu mi ngi mikifilih numuŋ ma.

¹⁸A ɗiyam gwat ngi kilika zanahay, ti ɓiri gaza kukur zlum, a kilikaka gabaga mikifilih kifilih cuw tuwa arleˀeŋ, ɓa guɗuk a tiri kiɓiŋ kiɓiŋ arleˀeŋ.

¹⁹Ɓa ngi sirta guɗuk mucuw naŋ na, a wuɗam garak ngi zlengerek, munduva gagaza, waɗ borgo ngi garak ngi kilif madiɗahay sirit a hirnga naŋ ma.

²⁰Akẽh na, a ɗiyam ɓamtal ngi ngalalay, a ng'aka taŋ kaˀ kaˀ ngi jaha guɗuko.

²¹Ɓamtal gar na, jek naŋ metir zlum, yo ɓiɓir naŋ saŋtimetir kukur tarnaˀ nga zlum,

²²sar avu taŋ cuw cuw, gweˀ avu cala avu cala. Ɓamtal ngir guɗuk ngi Buymisemuŋ, taŋ cek kanah so.

²³A ɗiyam ɓamtal kukur cuw tir vay ruwuy ngi guɗuko,

²⁴waɗ a ɗiyam li ngi naŋhay kukur mufaɗ ti ɓiri bara, asi virzi ngi ɓamtalay mizli ngir cuw tuwa, ɓamtal gar na, li ngi naŋ cuw, vur sar naŋhay mucuw na ya.

²⁵Tir vay muŋ ngi guɗuko, a ɗiyam ɓamtalay kukur cuwo ma,

²⁶waɗ li ngi naŋhay kukur mufaɗ ti ɓiri bara. Ɓamtal gar na, li ngi naŋ cuw.

²⁷Ng'asi hay ngi guɗuk, tisi pas madiɗ na, a ngam ɓamtalay merkeɗe,

²⁸waɗ ɓamtalay cuw ngi jaha mivay ngisi haya ti ka ti ka.

²⁹Sivirzi taŋ faw, amma hirnga taŋ jom arleˀe avu ɓalaŋ mudumbuŋ. A sa gam cuw taŋ rak rak, i taŋ masa jahaka mivayaya cuw taŋ.

³⁰Ti duba guɗuko, a ɗiyam ɓamtalaya dangafaɗ, waɗ li ngi naŋhay kuruˀ nga merkeɗ ti ɓiri bara, asi virzi ngi ɓamtal gar na, li ngi naŋhaya cuw cuw.

³¹A dirba nah, a ɗiyam ɓeɓele ngi ngalalay, ɓeɓele zlum ngi cica ɓamtal vay mudumbuŋhoy ngi guɗuko,

³²zlum ngi cica ɓamtalay vay numuŋ ma, waɗ zlum ngi cica ɓamtal vay sihay tisi pas ngi pastaˀa.

³³Mbal ngi wuzla, a kaka giw a didak ɓamtalay, zle a mivay hã sesẽŋ a mivay mekelem ngi guɗuko.

³⁴Ɓamtalay ati ɓeɓelehey gar, a puyaka taŋ ɓiri tapasl tapasl, waɗ a ɗiyam ɓalaŋ ngi ɓiri tapasl tapasl, ɓa ngi ci ɓeɓelehey anga.

³⁵Misina ɗiya gwatay, a jam zana ngi njir njar ngi tika hiri, ti gugumay mislirkeɗ lahaɗ ti ngwic ngi tumuŋhoy, munduva naŋ wit wit, cihhe, ndezze, waɗ geˀ geˀ wuya ti kerubeŋhey.

³⁶A ciɗam ɓamtal ngi ngalalayay mufaɗ, waɗ kor kor ɓiri tapasl tapasl avu taŋ, a ngam ponti ngi ɓiri tapasl tapasl avu taŋ, ngi njira zana ngi tika hiri tuwa. Li ngi naŋhaya mufaɗ, a paka taŋ ti ɓiri bara.

³⁷Misina dira ˀay ngi zanahay, a tufam zana mekelem ngi njir, a tufaka ti gugumay mislirkeɗ lahaɗ ti ngwic ngi tumuŋhoy munduva naŋ wit wit, cihhe waɗ ndezze.

³⁸Yo ma na, a ɗiyam ɓamtalay zlum ngi njira zana ngi tika hiri, pontihey kaˀ kaˀ avu taŋ, vay muŋ naŋhay waɗ ponti naŋhaya, a puyaka taŋ ɓiri tapasl tapasl, yo li ngi naŋhay muzlum na, a puyaka taŋ ɓiri gaza.