Read South Giziga EXO 37 Bible Online

EXO 37 - South Giziga bible

EXO 37

¹A dirba nah, Besalel a ɗiya akoti ngi Buymisemuŋ ti dum ngi ngalalay, jek naŋ metir pal ti saŋtimetir kukur cuw nga zlum, sliprik naŋ, saŋtimetir kukur tarnaˀ nga zlum, yo gil naŋ saŋtimetir kukur tarnaˀ nga zlum.

²Besalel a kuroŋ ɓiri tapasl tapasl pal naŋ, ti huroˀo waɗ ti vra naŋ gar, a kaŋ teŋ ti ɓiri tapasl tapasl a mivay naŋ gun.

³A ɗiyi ɓalaŋhay mufaɗ, a nga taŋ a mivay ngi akoti, cuw ti ka cuw ti ka.

⁴A ɗiyi ɓeɓele ngi ngalalayay cuw, a kuro taŋ ɓiri tapasl tapasl,

⁵a ca taŋ ar ɓalaŋhay misi ti ka ti ka avu akoti tuwa, ɓa a zuɓaka ti naŋ.

⁶Yo a ɗiya mi ngi akoti ti ɓiri tapasl tapasl pal naŋ, jek naŋ metir pal ti saŋtimetir kukur cuw nga zlum, sliprik naŋ saŋtimetir kukur tarnaˀ nga zlum.

⁷Dar a vuɗ kerubeŋhey cuw ti ɓiri tapasl tapasl, kaˀ kaˀ a mivay ngi mi naŋ ti ka ti ka.

⁸Kerubeŋhey mucuw na, taŋ surlum jom ati mi naŋ a mivay naŋhaya ti ka ti ka.

⁹Taŋ hiri pulaˀ ng'ar cala ng'ar cala, hiri tataˀ avu akoti, kirpaslaya nga muŋ nga muŋ, ara jiginaka mi ngi akoti.

¹⁰A dirba nah, Besalel a ɗiyi tabul ti dum ngi ngalalay. Jek naŋ metir pal, sliprik naŋ reta metir, gil naŋ saŋtimetir kukur tarnaˀ nga zlum.

¹¹A sirta sirit ti ɓiri tapasl tapasl pal naŋ, a kaŋ teŋ ti ɓiri tapasl tapasl a mivay naŋ gun.

¹²Dum misi ɓiɓir naŋ saŋtimetir dangafaɗ, a ka taŋ gilaɗ gilaɗ ar cakay naŋhay mufaɗ taŋ, waɗ teŋ ti ɓiri tapasl tapasl ɓaˀa ava ma.

¹³A ɗiyi ɓalaŋhay mufaɗ ti ɓiri tapasl tapasl, a nga taŋ a mivay naŋhay mufaɗ taŋ, gweˀ gweˀ avu sar naŋhay mumufaɗ na.

¹⁴Ɓalaŋhaya taŋ gweˀ avu dum ngir cakay naŋhay tuwa, ɓa a caka ɓeɓele ngi zuɓ naŋ ar taŋ.

¹⁵A ɗiyi ɓeɓele ngi ngalalayay cuw ngi zuɓ naŋ, a kuro taŋ ɓiri tapasl tapasl sirit wãˀ.

¹⁶Gazlanga ngir tabuloyo, a ɗiya taŋ ti ɓiri tapasl tapasl pal naŋ: taasa mupuɗaˀ puɗaˀhay, taasa ngi yamay, kopoy waɗ gwat ngi pusla mbaazlahay.

¹⁷A dirba nah, Besalel a vuɗ li ɗuva lampe ti ɓiri tapasl tapasl pal naŋ: sar naŋ, ganday naŋ, taasa naŋ, li wus naŋ waɗ gwat misi ka mufuyuk naŋ gar na, i muvuɗa simbirlim ar li purla.

¹⁸Mihaŋ ava ɓaˀ ɓaˀ merkeɗ, a zlo kasl avu ganday naŋ ngi wuzla tuwa, ɓaˀ ɓaˀ makir ti ka, makir ti ka.

¹⁹Angi mihaŋ naŋ ɓaˀ purla gar na, sikiɗ mipitikay pitikay makir, ti li wus naŋhay waɗ gwat naŋhay, misi ka mufuyuku.

²⁰Ar ganday naŋ ngi wuzla, sikiɗ mipitikay pitikay mufaɗa, ti li wus naŋhay ati gwat naŋhay, misi kaɓa mufuyuku.

²¹Mihaŋ naŋhay mujumom cuw cuw ng'avi ganday ngi wuzla na, asi virzi taŋ, li wus naŋ ada gara ma.

²²Li wus naŋhay ati haŋ naŋhay gar na, i muvuɗa ti ɓiri tapasl tapasl pal naŋ, sumburlum arleˀe ati mekelemeye.

²³Besalel a vuɗ lampehey tarnaˀ, waɗ gwat ngi slrahay, i macamayay ati gwat ngi tiɓa fucu, cek i muvuɗa taŋ ti ɓiri tapasl tapasl pal naŋ.

²⁴A tikam ngi ɗiya li ɗuva lampe ati gwat ngi slraˀahaya, ɓiri tapasl tapasl pal naŋ kilo kukur makir.

²⁵A dirba nah, ɓa ngi zluma urdi na, Besalel a ɗiyi li gi mikuli ti dum ngi ngalalay, jek naŋ ati sliprik naŋ i misi purla, saŋtimetir kukur zlum kukur zlum, yo gil naŋ metir pal. Mivay naŋhay mufaɗ taŋ yoŋ yoŋ kaɓa durum, sumburlum jom ati li gi mikuli vuna si.

²⁶A sirta ngbulum wãˀ ti ɓiri tapasl tapasl pal naŋ, hirnga naŋ, mivay naŋhay muyoŋ yoŋ tuwa, waɗ cakay naŋhay mufaɗ taŋ gar, a kaŋ teŋ gunno ti ɓiri tapasl tapasl.

²⁷A ɗiyaŋ ɓalaŋhay cuw ti ɓiri tapasl tapasl, a nga taŋ ti ka ti ka, tisi virzi ngi teŋ naŋ tuwa, ɓa a caka ɓeɓele ngi zuɓ naŋ ar taŋ.

²⁸A ɗiyi ɓeɓele ngi ngalalayay cuw, a kuro taŋ ɓiri tapasl tapasl sirit.

²⁹Midi urdi, a di mal mipal naŋ ngi vula slra, waɗ urdi pal naŋ mazlumaka ar li gi mikuli.