Read South Giziga EXO 38 Bible Online

EXO 38 - South Giziga bible

EXO 38

¹A dirba nah, Besalel a ɗiyi li gi mikuli ti dum ngi ngalalay, ngi gi mikuli ti ginew zlam zlam wãˀ, jek naŋ ati sliprik naŋ rak raka, metir cuw ti reta metir cuw ti reta, yo gil naŋ metir pal ti reta.

²Mivay naŋ vay muŋhoyo, mufaɗ taŋ yoŋ yoŋ kaɓa durum, sumburlum jom ati li gi mikuli vuna si. A puyakaŋ ɓiri gaza sirit wãˀ.

³Gazlanga magam taŋ slra ar li gi mikuli gar: taasa ngi hila fucuhoy, peley, gwat ngi kuca lihey, furset ngi zliga useˀhey waɗ li zluma urdihey cek na, i mipa ti ɓiri gazahay.

⁴A ɗiyi griyaz ti ɓiri gaza, a dira gunno avu li gi mikuli, zle a ruwuyo hã a didak naŋ, tisi virzi ngi teŋ naŋ tuwa.

⁵A ɗiyi ɓalaŋhay mufaɗ, a nga taŋ a mivay ngi griyaz ngi ɓiri gaza tuwa mufaɗ taŋ, ɓa ngi ci ɓeɓele ar taŋ ngi zuɓ naŋ.

⁶A ɗiyi ɓeɓele ngi ngalalayay cuw, a kuro taŋ ɓiri gaza sirit.

⁷A ca taŋ ar ɓalaŋhay misi ar cakay ngi li gi mikuli tuwa, ɓa ngi zuɓ naŋ. Li gi mikuli miɗiya ti dum nah, huroˀo njoŋ kine.

⁸A dirba nah, Besalel a ɗiyi kisa, a pa ti ɓiri gaza, yo li ɗuv naŋhaya ti ɓiri gaza ma, a ɗiya ti dorogal ngi ɓiri gaza ngi ngwasay magam slra a mizlingre guɗuk ngi zlir ati Buymisemuŋ.

⁹Wazlaray ada gun gun a hirnga guɗuk ngi Buymisemuŋ, maakway ngi wazlaraya, a slaka ti zana magam di wuya avu dalam, mija ti gugumay mislirkeɗ. Tir vay ruwuyo, jek ngi zana, metir kukur zlum.

¹⁰A njiraka avu gwat ngi kilika zana ati ponti ngi ɓiri barahay kaˀ kaˀ avu ɓamtal ngi ɓiri gazahay kukur cuw, yo sivirzi ngi ɓamtalaya kaˀ kaˀ ar ɓiri gazahay kukur cuwo ma.

¹¹Tir vay muŋ, jek ngi zana, metir kukur zlumo ma. A njiraka taŋ kaɓa numuŋhoy tuwa ma.

¹²Tisi pas ngi pastaˀa, jek ngi zana metir kukur cuw nga zlum, a njiraka taŋ kaɓa numuŋhoy ma, avu ɓamtalay kuruˀ, yo virzi ngi ɓamtalaya i ɓiri gazahay kuruˀ ma.

¹³Tivi mizlingreŋ, tisi pas ngi miprike, sliprik ngi wazlaraya, metir kukur cuw nga zlumo ma.

¹⁴Tivi mizlingreŋ, jek ngi zana vay pala, metir tarnaˀ ti reta, ɓamtalaya makir, yo li ngi taŋhay i ɓiri gazahay makir ma.

¹⁵Tir vay numuŋ kanah ma, metir tarnaˀ ti reta, ɓamtalay makir waɗ li ngi taŋhay makir.

¹⁶Zana ngi gi wuya da dalamay, minjar njar gun wazlaraya gar na, i gabaga mija ti gugumay mislirkeɗ.

¹⁷Sivirzi ngi ɓamtalay, i ɓiri gazahay, gwat ngi kilik naŋ ati pontihey i ɓiri barahay. Ɓamtalaya, a puyaka taŋ ɓiri barahay jigaɓ jigaɓ a muŋ. A kam ɓiri bara gindaɗɗa ngi ja ɓamtalaya gar.

¹⁸Zana minjar a mizlingre ngi wazlaraya, i midira ˀay ngi zanahay mijaka ti gugumay mislirkeɗ, lahaɗ ti ngwic ngi tumuŋhoy, munduva naŋ wit wit, cihhe waɗ ndezze. Zana nah, jek naŋ metir kuruˀ, yo gil naŋ metir cuw ti reta, rak rak ati zanahay minjar njar a wazlaray tuwa.

¹⁹A luwaka avu ɓamtal ngi ɓiri gazahay mufaɗ, yo li ngi ɓamtalaya i ɓiri gazahay mufaɗa ma, gwat ngi kilik naŋhay, pontihey waɗ ɓamtalay jigaɓ jigaɓ ti muŋ i ɓiri barahay.

²⁰Dum ngi guɗukoy, yo dum ngi zlavaɗ ngi wazlaraya gar, i ɓiri gazahay.

²¹Gwat migam taŋ slra ngi ɗiya guɗuk ngi Buymisemuŋ, guɗuk ngi pi beleler ngi jumoˀayay anga na, taˀ naŋ ani: Moyis a pula jiviɗ da Levihey ɓa a gaka slra nah. Buy ngi slra i Itamar mangal ngi masay Aroŋ.

²²Besalel, mbur Zuda mangal ngi Ur, dideˀ ngi Hur, a ga slra Bumbulvuŋ miɓa ɗaˀ le da Moyis na le gar.

²³Oholiyap, mbur Daŋ, mangal ngi Ahisamak, taŋ bummoˀ, Oholiyap i mbur miciɗa ɗugur mupuɗaw puɗaway, mutoho foto ngi gwatay, migi wuya da zana ngi ngwic ngi tumuŋhoy, munduva naŋ wit wit, cihhe waɗ ndezze, yo migi wuya da zana mija ti gugumay mislirkeɗ.

²⁴Ɓiri tapasl tapasl, Israyeley muvulaka ngi ɗiya guɗuk ngi Buymisemuŋ, a jum gar na: kilo skat skat dangafaɗ ti kukur tarnaˀ ti tarnaˀ waɗ gram skat skat makir. A waka ti kilo mawam di gwat ar guɗuk ngi Buymisemuŋ.

²⁵Ɓiri bara mizli muvulaka, slaf slaf na, a jum gar na: kilo durmuk makir ti kuruˀ nga tarnaˀ, waɗ gram skat tarnaˀ ti kukur zlum. A waka ti kilo mawam di gwat ar guɗuk ngi Buymisemuŋ.

²⁶Muvulaka i mizli ngi vi kukur cuw malla fineˀ nah, taŋ mizli durmuk skat skat merkeɗ ti makir, ti skat skat zlum ti kukur zlum, mizli muslufahaya, mbur gar a vul gram zlum zlum.

²⁷A tikam ɓiri bara, kilo durmuk makir, ngi pi sivirzi ngi ɓamtalay miskat ngir guɗuko, waɗ ngi sivirzi ngi ɓamtal ngi zana minjar ti huroˀo, mbiɗeˀvra, sivirzi ngi ɓamtal gar, a zum kilo kukur makir.

²⁸Is naŋ mindir kilo kuru nga tarnaˀ ti gram skat skat tarnaˀti kukur zlum na, a ɗiyam di gwat ngi kilika zana avu ɓamtalay, a puyaka da ɓamtalaya jigaɓ jigaɓ ti muŋ, yo a ɗiyam di ɓiri migilaɗ ngi ji ɓamtalay.

²⁹Ɓiri gaza Israyeley muvulaka, a gi jom gar na, kilo durmuk cuw ti skat ti kukur cuw nga mufaɗa.

³⁰A ɗiyam di sivirzi ngi ɓamtalay a mizlingre guɗuk ngi zlir ti ya Buymisemuŋ. A ɗiyam di li gi mikuli jom ati griyaz naŋ, waɗ gwat ngi slra ngir li gi mikuli gar.

³¹A ɗiyam di sivirzi ngi ɓamtal ngi sar ngi zlavaɗay waɗ ngi mizlingreŋ nga wazlaray, yo dum ngi guɗuk ngi Buymisemuŋ, ati dum ngi sar ngi zlavaɗ ngi wazlaray.