Read South Giziga EXO 39 Bible Online

EXO 39 - South Giziga bible

EXO 39

¹A tufaka zana ngi ngwic ngi tumuŋ munduva naŋ wit wit, cihhe waɗ ndezze, da mbur migi mezegwel da Bumbulvuŋ ar guɗuk ngi Buymisemuŋ waɗ zana ngi mezegwel da Aroŋ makaŋ, kaɓa Bumbulvuŋ muɗuva da Moyis.

²A tufam jampa ti gugumay mislirkeɗ lahaɗ ti ngwic ngi tumuŋ, munduva naŋ wit wit, cihhe waɗ ndezze, yo dar dar ti gugumay ngi ɓiri tapasl tapasl.

³A vuɗam ɓiri tapasl tapasl kefer kefer, a titiraka ɓel ɓel, yo midira ˀay ngi zanahaya, a lihiɗaka ati ngwic ngi tumuŋ munduva naŋ wit wit, cihhe waɗ ndezze, waɗ ti gugumay mislirkeɗ.

⁴A tufam zeweɗ ngi luwa jampa, ti ka ti ka a mivay naŋhaya.

⁵Jampa i mija surlum ati gwat ngi juw naŋ ti gugumay misi purla, i mija kaɓa Bumbulvuŋ miɓa ɗaˀ le da Moyis.

⁶A ɗiyam ɗugur mupuɗaw kakayak kakayak, a ngbaˀaka taŋ avu ɓiri tapasl tapasl miɗiya jozl jozlo, a tohom slimiɗ ngi ziri ngi Zakopoy le ava fiteɗ fiteɗ, kaɓa mafutuɗam gwat ngi ɗuva slimiɗ ngi mbur.

⁷A tufam zeweɗ avu jampa, kaɓa Bumbulvuŋ miɓa ɗaˀ le da Moyiz zleˀe ngi bigi sukwi ngi Zakopoy mukuruˀ nga cuw na.

⁸Misina ɗiya gwatay, a tufam jiiba ngi didak ti gugumay mislirkeɗ, lahaɗ ti ngwic ngi tumuŋ munduva naŋ wit wit, cihhe waɗ ndezze, yo dar dar ti gugumay ngi ɓiri tapasl tapasl kaɓa jampa tuwa ma.

⁹Da a muslaka jiiba le masl cuw na, jek naŋ ati sliprik naŋ, i misi purla, saŋtimetir kukur cuw ti zlum.

¹⁰A gakaŋ wuya ti ɗugur mupuɗaw puɗaway, cinjah cinjah mufaɗa: cinjih mudumbuŋ i ɗugur mupuɗaw gagaza ndez, ɗugur mupuɗaw tapasl tapasl waɗ ɗugur meɗelek meɗelek.

¹¹Cinjih mucuw naŋ i ɗugur mupuɗaw gagaza los los, ɗugur mupuɗaw ngil ngil waɗ ɗugur mupuɗaw gingiliw gingiliw.

¹²Cinjih mimakir naŋ, i ɗugur mivirziŋŋe , ɗugur muwuy wuy waɗ ɗugur miwit wit.

¹³Yo cinjih mumufaɗ naŋ i ɗugur kalaf kalaf , ɗugur mupuɗaw kakayak kakayak waɗ ɗugur kalaf kalaf gagaza zlop zlop. Ɗugur gar na, i mingbaˀa avu ɓiri tapasl tapasl jozl jozlo.

¹⁴Ɗugur gar na, slimiɗ ngi mangal ngi Zakop nguɗ nguɗ ava, tiɗeˀe kuruˀ nga cuw taŋ, kaɓa matohom gwat ngi ɗuva slimiɗ ngi mburu. A bigi sukwi ngi Israyeley mukuruˀ nga cuw na.

¹⁵Ngi juwa jiiba ngi didaka, a ɗiyam sen memeɗehey cuw, ti ɓiri tapasl tapasl pal naŋ, slap slap kaɓa maslupam zeweɗe.

¹⁶Mivay ngi jiiba ngi didaka ti muŋ, a tufam gwat ngi luw naŋ cuw ti ɓiri tapasl tapasl waɗ ɓalaŋ ngi ɓiri tapasl tapaslay cuw ma.

¹⁷A juwaka celelu memeɗehey tuwa, kaˀ ti ka kaˀ ti ka avu ɓalaŋhay tuwa.

¹⁸Mi naŋhay vay mekeleme, a juwaka taŋ avu li luw naŋ ngi ɓiri tapasl tapasl misi avu zeweɗ ngi juwa jampa, ɓa jiiba ngi didak a ndir ti mbuŋ.

¹⁹A ɗiyam ɓalaŋ mekelemey cuw, a tufaka taŋ avu mi ngi jiiba ngi didaka, ti ruwuy, ti huroˀo, tivi jampa.

²⁰A ɗiyam ɓalaŋ mekelemey cuw ti ɓiri tapasl tapasl tuwa ma, a tufaka asi virzi ngi zeweɗ ngi jampa, ti mbuŋ, avu li juɓ naŋ, ɓalaŋhaya taŋ ti hirnga kanda ngi jampa.

²¹A juwaka ɓalaŋ ngi jiiba ngi didak avu ngi jampa ti zeweɗ ngi zana misi yam naŋ wit wit, ɓa jiiba ngi didak a ndir ti hirnga kanda ngi jampa, ɓa a wus a hirnga jampa ta, kaɓa Bumbulvuŋ miɓa ɗaˀ le zleˀe da Moyis.

²²Jibe ngisi jampa ngi Aroŋ na, i mija ti ngwic ngi tumuŋhoy, munduva naŋ wit wit pal naŋ kine.

²³ˀAy naŋ, naŋ kaɓa ngi libiti, i midira gijaw gijaw, ko a ngir ta ndiɗaˀ wãˀ.

²⁴A gaka wuya da mi ngi jibe vay ruwuyo zlar, a jam gwat loŋ loŋ kaɓa yi ngi hunduruk, a jaka ti ngwic ngi tumuŋhoy, munduva naŋ wit wit, cihhe, ndezze waɗ gugumay mislirkeɗ.

²⁵A ɗiyam mawiyerey ti ɓiri tapasl tapasl pal naŋ, a luwaka taŋ zlar avu mi ngi jibe, kulaˀ kulaˀ ar wala ngi yi ngi hundurukoy tuwa.

²⁶Yi ngi hunduruk pal, mawiyer pal, yi ngi hunduruk pal, mawiyer pal, zlar wãˀ avu mi ngi jibe ngi mezegwele, kaɓa Buymisemuŋ miɓa ɗaˀ le zleˀe da Moyis tuwa.

²⁷A dirba nah, a jam zana mekelemey ti gugumay mislirkeɗ da Aroŋ ati ziri naŋhaya,

²⁸yo jiiku ngi gugumay mislirkeɗ waɗ kalsoŋ ngi gugumay mislirkeɗ slirkeɗey.

²⁹Yo kanda mutufa gijaw gijaw ti gugumay mislirkeɗ, lahaɗ ti ngwic ngi tumuŋhoy munduva naŋ wit wit, cihhe waɗ ndezze, kaɓa Bumbulvuŋ miɓa ɗaˀ le zleˀe da Moyis tuwa.

³⁰A dirba nah wãˀ so na, a ɗiyam gwat mabigi vula slra da mbur, gwat toh toh ava, fiteɗ fiteɗ kaɓa mafutuɗam gwat ngi ɗuva slimiɗ ngi mbur, a tohoko na: «I muvula le da Bumbulvuŋ.»

³¹A luwaka gwat ngi wuya nah law a hirnga loppol ti zeweɗ misi yam naŋ wit wit, kaɓa Bumbulvuŋ miɓa ɗaˀ le zleˀe da Moyis tuwa.

³²Slrahay a wam mi le kahana muduba so: ɗiya guɗuk ngir guɗuk ngi zlir ti Buymisemuŋ tuwa, Israyeley a ɗiyaka heˀ, kaɓa Bumbulvuŋ miɓa ɗaˀ le zleˀe da Moyise.

³³Israyeley a soko ti gwat ngi slra ngir guɗuk ngi Buymisemuŋ gar: guɗuk ati gwat naŋhay gar, gwat ngi kilika zanahay, ɓeɓelehey, ɓamtalay ati sivirzi naŋhay.

³⁴Garak ngi zlengerek munduva gagaza, garak ngi kilif madiɗahay ngi sirit a hirnga guɗuk, waɗ zana minjar ngi ti ka hiri.

³⁵Akoti misi ɓi ngi jumoˀay ara, ɓeɓele naŋhay waɗ mi naŋ.

³⁶Tabul ati gwat naŋhay gar waɗ ɗaf muvula le da Buymisemuŋ.

³⁷Li ɗuva lampe miɗiya ti ɓiri tapasl tapasl pal naŋ waɗ lampe naŋhay, gwat ngi slra naŋhay waɗ mal naŋhay.

³⁸Li gi mikuli miɗiya ti ɓiri tapasl tapasl, mal ngi vula slra, urdi ngi zlum waɗ zana ngi njir njar a miviŋ guɗuko.

³⁹Li gi mikuli miɗiya ti ɓiri gaza, griyaz naŋ ngi ɓiri gaza, ɓeɓele naŋhay ati gwat ngi slra naŋhay, kisa ngi bun waɗ li ɗuv naŋ.

⁴⁰Zana ngi njir njar avu zlavaɗ ati ɓamtal naŋhay waɗ li ngi naŋhay, zana ngi njir njar a mizlingre ngi wazlaray waɗ zeweɗ naŋhay ati dum ngi zlavaɗay, yo gwat magam taŋ slra gar ar guɗuk ngir guɗuk ngi zlir ti Buymisemuŋ.

⁴¹Zana ngi gi mezegwel ar guɗuk ngi Buymisemuŋ. Zana mipal, Aroŋ, masay madiɗa makaŋ, waɗ zana ziri naŋhay maka ka ngi gi mikuli da Buymisemuŋ.

⁴²Israyeley a gaka slra nah kasl kasl kaɓa Bumbulvuŋ miɓa ɗaˀ le zleˀe da Moyise.

⁴³Moyis mupura slra a gi le kasl kasl kaɓa Bumbulvuŋ miɓa ɗaˀ le zleˀe tuwa na, a ɗuwula mi da Israyeleye.