Read South Giziga EXO 4 Bible Online

EXO 4 - South Giziga bible

EXO 4

¹Moyis a mbiɗa da Bumbulvuŋ: «Na yi pura na! T'anta sa tiɓaka ɓi ɗu ta, t'anta sa tiɓaka mi ɗu ta. A sa ɓam: Bumbulvuŋ a buguw vu ta!»

²Bumbulvuŋ a ɓaŋ: «Misi a haŋ ɗik na i mike?» Moyis a ɓaŋ: «I ganday.»

³Bumbulvuŋ a ɓaŋ: «Hiziga nga ruwuy.» Moyis a hiziga gandaya: ganday tuwa, a tiri kaw, joˀ Moyis a kil di.

⁴Bumbulvuŋ a ɓa Moyise: «Tila haŋ, ja tivi dangwal, zuɓa.» A tila haŋ, a jaŋ, joˀ kaw tuwa, a tiri ganday a muŋ.

⁵Ɓa a sinaka Bumbulvuŋ, Buymisemuŋ ngi Abraham, ngi Izak, yo ngi Zakop a buguw vu le na, naŋ kahana so.

⁶Bumbulvuŋ a ɓaŋ ma: «Buca haŋ a didaka.» Moyis a buca haŋ bac, a zuɓa paɗ na: haŋ a tiri le babara ka gugumay, a ngil kukula le.

⁷Bumbulvuŋ a ɓaŋ: «Buca haŋ a didak a muŋ.» Moyis a buca haŋ bac, a zuɓa paɗ ti didaka na: a tiri le nga naŋ nga naŋ a muŋ.

⁸Bumbulvuŋ a ɓaŋ: «Na da Israyeley a tiɓaka ɓi ɗike ta, yo a tiɓaka mi ɗike vur cekene mudumbuŋ na ta na, a sa tiɓaka mi ɗike asi cekene mucuw naŋ na.

⁹Na da a tiɓaka cekene mucuwoy na ta wãˀ, a tiɓaka mi ɗike ta na, kisa nuw yam na a mizaw, ki zluva zlav a ruwuy, yam tuwa, a sa tiri pumbus a ruwuyo.»

¹⁰Moyis a ɓa Bumbulvuŋ na: «Ambuh takwa Bumbulvuŋ ɗu, yi si na ɓi ɓi ɗaˀ ɗaˀa ta, zlezle vuna, i si na mi ta, ko zle ti ka maɓiy ya gawla ɗik vuna si na, i si na mi ta si. I ɓa mi tuwaˀ tuwaˀ, irne ɗu naŋ gbiˀgbiˀ haɗa.»

¹¹Bumbulvuŋ a ɓaŋ: «Muvula mi da mbur vuna i waka? Maga mbur ɓa a ɓi ɓi gu ta malla i midigizla, ɓa a pur malla ɓa i dangar na i waka? I ya Bumbulvuŋ takwa?

¹²Wurenna, aru, YˀADA ati ka ar mingiɓi ɗike, i sa dubunuw ɓi ka masa ɓa.»

¹³Moyis a mbiɗaŋ di: «Ambuh takwa Bumbulvuŋ, slin mbur ka muwuɗ le gar ɓa ara ɓa ɓi nah!»

¹⁴Bumbulvuŋ a zuɓ himaˀ angi Moyise, a ɓaŋ: «Sukum ɗik Aroŋ mbur levi na, naŋ anta kwa? Yi si na le, naŋ a si na mingiɓe le kaf kafa. Naŋ vuna n'ani, ara bawa nga ji ti ka hirnga. Naŋ misa puruw le na, a sa mumul a mevele.

¹⁵Ki sa ɓaŋ, kisa slufaŋ mingiɓi naŋ masa ɓa. Ya so na, Y'ADA ati ka ar mingiɓi ɗike waɗ ar mingiɓi nga naŋ, i sa dubunukum gwat kum masa gaka.

¹⁶Naŋ a sa ɓa mizli ar deɗe ɗike, masa ɓa mingiɓi ɗik i naŋ, yo ka kisa tiri kaɓa buymisemuŋ [1]. Naŋ mabigaŋ mingiɓi.

¹⁷Ganday hana tuwa, zuɓa kaw a haŋ! Ki sa gaka cekeneheye ti naŋ.»

¹⁸Moyis a mi, aru ng'avu jomo naŋ Zetro, a ɓaŋ: «Yi cuh le, i mi ng'avu sukum ɗuwoy a Ezipte, i ra pura taŋ, da t'ada ti siifa aruŋ kwa mbrike na.» Zetro a ɓa Moyise: «Aru zuy!»

¹⁹Dar Bumbulvuŋ a ɓa Moyis a hirwuy Madiyana na: «Mi, aru nga Ezipte, asi mizli mawuɗam kiɗ ɗik vagay gar na, a micam le.»

²⁰Moyis a zuɓa ngwas naŋ waɗ ziri naŋhaya, a hila taŋ a duba zungu, a mi nga hirwuy Ezipte a muŋ. Moyis a zuɓa ganday ngi Buymisemuŋ kaw a haŋ.

²¹Bumbulvuŋ a ɓa Moyise na: «Ti ka mira mi le nga Ezipte na, pura ɗi! gwat migam ɗaˀ tahay, ya muvuluw gidaŋ ngi gi taŋ na, kisa ga taŋ a mbuŋ buy madiɗa ngi Ezipte. Yi sa gaŋ hirnga gidaŋ ɓa a ngum ta, yo ɓa a pula mizli ɗuwoy a ram ta.

²²Ki sa ɓa buy Ezipte na: Bumbulvuŋ a ɓi na: Mangal ɗu modogom i Israyel.

²³I ɓuw na: Pula mangal ɗu ɓa ara giy mikuli, yo ki pulaŋ ɓa a ru ta! Da kine na, i kiɗa mangal ɗik modogomo vagay so.»

²⁴Na taŋ misi a jiviɗ aruŋ sina, Bumbulvuŋ a gumbaˀa Moyise kutum, a wuɗ ɓa a kiɗa vagay.

²⁵Akẽh na, Sefora a zuɓ ɗugur mazum raɓ raɓ, a ca mangal a mizaw, ara sohõ pumbus naŋ da mbuŋ ngi Moyis, dar a ɓaŋ: «Ki zil ɗu ngir pumbusu.»

²⁶Dar Bumbulvuŋ a pulaŋ. Sefora miɓi: «Zil ngir pumbus» na, vur ci mizaw nah.

²⁷Bumbulvuŋ a ɓa Aroŋ na: «Aru, ara ji hirnga ti Moyis a wuzla ɓuh mikirɗak kirɗaka.» Aroŋ a ru, ara luumaŋ a muwã ngi Buymisemuŋ, a jaŋ kuɓuy.

²⁸Moyise, mingiɓi Bumbulvuŋ mislinaŋ ɓa ara ɓa na, a slufa da Aroŋ tuwa gar, waɗ a slufaŋ ɓi ngi cekenehey naŋ mupulaŋ jiviɗ ɓa a ga taŋ tuwa gar.

²⁹A dirba nah, Moyis ati Aroŋ, a ram cuw taŋ, ara cikilaka mizli micawwa ngi Israyeleye gar.

³⁰Dar Aroŋ a mataŋ hiri ngi ɓi Bumbulvuŋ miɓa ɗaˀ le Moyis tuwa gar, a ga cekenehey a mihiri ngi Israyeleye.

³¹Mizli a tiɓakaŋ, taŋ mislaka wala nah, Bumbulvuŋ a so le a jiniˀis tisi Israyeley, yo a pura bonoy taŋ le na, a hurkom a mbuŋ naŋ, a gakaŋ dudok.