Read South Giziga EXO 40 Bible Online

EXO 40 - South Giziga bible

EXO 40

¹Bumbulvuŋ a ɓa Moyise na:

²«Hin ɓulaˀ, ngi kiya mudumbuŋ na, kisa nga guɗuk ngir guɗuk ngi zlir ti ya Buymisemuŋ.

³Akoti misi ɓi ngi jumoˀay ara na, a sa kaka anga, ɗum a duba zana minjar ngi tika hiri na.

⁴A sa soko ti tabulo, a sa ɗiyaka ɗaf muvulahay le da ya, angi tabul vuna, a sa soko ti li ngi ɗuva lampe, a sa jaka vu avu taŋ.

⁵Li gi mikuli ti urdi miɗiya ti ɓiri tapasl tapasl pal naŋ tuwa, a sa ɗuvaka taˀ a mbuŋ akoti ngi jumoˀaya, a sa njiram zana ngi tika hiri njar avu miviŋ.

⁶A sa ɗuvaka li gi mikuli ti ginew zlam zlama, a mizlingre guɗuk ngi zlir ti ya Buymisemuŋ.

⁷A sa ɗuvaka kisa ngi buno ar wala ngi guɗuk ngi zlir ti ya Buymisemuŋ waɗ li gi mikuli, ki pam yam cer cer araŋ.

⁸A sa njiraka zana, njar ng'ar sarzlavaɗ, gun guɗuko, waɗ zana ngi tika hiri njar a mizlingre ngi wazlaraya.

⁹Ki sa zuɓa mal ngi vula slra, ki kuca guɗuko, waɗ gwat ngi raˀahaya gar. Naŋ kine, kisa vula da Buymisemuŋ jom ati gwat ngi slra naŋhaya gar. Zle tapasa, a sa tiri inga ya gisiŋ.

¹⁰Ki sa pa mal da li gi mikuli ti ginew zlam zlam waɗ da gwat ngi gi slra naŋhaya gar, kisa vuliy di da ya Buymisemuŋ, joˀ li gi mikuli a sa tiri inga ya.

¹¹Ki sa pa mal da kisa waɗ da li ɗuv naŋ na, ki vuliy taŋ da ya.

¹²Ki sa ru ti Aroŋ ati ziri naŋhaya, nga mizlingre ngi zlir ti ya Buymisemuŋ, ki buna taŋ.

¹³A dirba nah, kisa ka zanahay mipal na da Aroŋ. Ki paŋ mal, ɓa a tiri masay ngi gi slra ɗu.

¹⁴Ki sa ɓa ziri ngi Aroŋhoy ɓa a kirohoko ng'avu ka, ki ka taŋ jibehey.

¹⁵Ki sa vula taŋ slra ti pa taŋ mala, kaɓa ka muvula da cine taŋ na ya, ɓa a gikiy mikuli. Mal ka masa pa taŋ di nah na, a sa tiri ti taŋ i masayay hã ngi sete, taŋ vuna ati dideˀ taŋhaya.

¹⁶Moyis a ga slra le heˀ kaɓa Bumbulvuŋ miɓaŋ di ɗaˀ le na:

¹⁷Hin muɓulaˀ ngi kiya mudumbuŋ, ngi vi mucuw naŋ, a dirba bo taŋ ti hirwuy Ezipte na, a ng'aka guɗuko.

¹⁸Moyis a ɓi ɓa a ng'aka guɗuko, ng'asi virzi ngi ɓamtalaya, a nga dum naŋhaya, a ka mbalaya, a nga ɓamtalaya.

¹⁹A njiraka zana a hirnga guɗuko, waɗ a sirtaka sirit ti zana ngi garak, kaɓa Bumbulvuŋ muɗuva da Moyise.

²⁰Moyis a hila beleler misi ɓimuɗuva mukuruˀhoy tuwa, a pa taŋ nga hur akoti, a ca ɓeɓele ngi zuɓa akoti kulaˀ kulaˀ ar li taŋhaya, waɗ tiɗeˀ mi ngi akoti.

²¹A ci ti akoti tuwa ng'ar guɗuko, waɗ njar zana ngi ɗumo akoti misi ɓimuɗuva ara tuwa, kaɓa Bumbulvuŋ miɓa ɗaˀ le zleˀe da Moyise.

²²A ɗuvaka tabul tuwa taˀ asi guɗuko, kini tir vay muŋ, ti mbuŋ zana minjar ngi tika hiri tuwa.

²³A ɗiyaka ɗaf muvula le da Bumbulvuŋ tuwa ɗiyeˀ ɗiyeˀ angaŋ, kaɓa Bumbulvuŋ miɓa ɗaˀ le zleˀe da Moyise.

²⁴A ɗuvaka li ɗuva lampe taˀ ar guɗuk ngi zlir ti Buymisemuŋ, kini tir vay ruwuy, cir angi tabulo.

²⁵A nduvuɗaka vu avu taŋ, a mbuŋ Bumbulvuŋ, kaɓa Bumbulvuŋ miɓa ɗaˀ le zleˀe da Moyise.

²⁶A ng'aka li gi mikuli miɗiya ti ɓiri tapasl tapasl pal naŋ tuwa, kaˀ a hur guɗuko, ti mbuŋ zana minjar ngi tika hiri tuwa.

²⁷A zlumaka urdi anga, kaɓa Bumbulvuŋ miɓa ɗaˀ le zleˀe da Moyise.

²⁸A njiraka zana ngi tika hiri njar avu miviŋ ngi guɗuko.

²⁹A dirba nah, a nga li gi mikuli ti ginew zlam zlama, gweˀ avu mizlingre guɗuk ngi zlir ti Buymisemuŋ, a gam mikuli ti ginew zlam zlam anga, yo a vulam gwat mutukuzohoy anga, kaɓa Bumbulvuŋ miɓa ɗaˀ le zleˀe da Moyise.

³⁰A ɗuvaka kisa taˀ ar wala ngi guɗuk ati li gi mikuli, waɗ yam cer cer ara ngi buna haŋ ati saray.

³¹Moyis, Aroŋ ati ziri naŋhaya, a bunaka haŋ ati saraya ti yam nah.

³²Da a wuɗam le ɓa a cam ng'ar guɗuk ngi zlir ti Buymisemuŋ malla a kiraham ng'ar li gi mikuli na, sey a bunaka haŋ ati saraya ceɗ le, kaɓa Bumbulvuŋ miɓa ɗaˀ le zleˀe da Moyise.

³³Moyis a ɓi, a njiraka zana ngi gi wuya da dalamay avu zlavaɗ ngi wazlaraya, gun gun a hirnga guɗuk ati li gi mikuli, yo ɓa a luwaka zana ngi tika hiri avu mizlingre ngi wazlaraya. Joˀ Moyis a kiɗa mi ngi slra wãˀ kahana so.

³⁴Akẽh so na, cunju a tirslika guɗuk ngi zlir ti Buymisemuŋ tirslik, dudok ngi Bumbulvuŋ a naha guɗuko.

³⁵Ha Moyis a ci ng'ar guɗuko gu mata, asi cunju aro tirslik a hirnga naŋ, yo dudok ngi Bumbulvuŋ a naha li guɗuko le.

³⁶Israyeleye, ɓa a slikiɗam ng'ar li mekelem na, sey da cunju a zuɓ le nga muŋ, a hirnga guɗuko.

³⁷Amma da cunju a zuɓ nga muŋ ta na, t'anta cohom ta, a kutukoko hin naŋ masa zuɓo.

³⁸Bumbulvuŋ a biga da Israyeleye, naŋ da a wuzla taŋ na, ti papasa, cunju a tirslika guɗuko tirslik, yo ti duvuɗo kwana, vu ciɗak ciɗak, a gi kahana angi zuɓa mulak taŋ gar.