Read South Giziga EXO 5 Bible Online

EXO 5 - South Giziga bible

EXO 5

¹A dirba nah, Moyis ati Aroŋ a soko, a ɓaka buy madiɗa ngi Ezipte na: «Bumbulvuŋ Buymisemuŋ ngi Israyel a ɓi na: pula mizli ɗuwoy a ram, nga wuzla ɓuh mikirɗak kirɗaka, ɓa ara gikiy muguzlum ngi ɗuviy hirnga.»

²Buy Ezipte a ɓi: «Bumbulvuŋ i wa ɓa i cine mingiɓi naŋ, i pula Israyeley a ram na ka? I si na Bumbulvuŋ ta, yo y'anta pula Israyeley a ram ta.»

³Moyis ati Aroŋ a ɓakaŋ: «Buymisemuŋ ngi Heberey a biga ndra vu le da ndra, anja sey i ram hiipas hiipas hin makir nga wuzla ɓuh mikirɗak kirɗaka, nga gi mikuli da Bumbulvuŋ, Buymisemuŋ ndra, vur naŋ madiɗ vu ar ndra ti jiji mangizl vu sunok sunok malla ti maslalam.»

⁴Buy Ezipte a ɓa taŋ: «Moyis, Aroŋ, ki paka mi da mizli, ɓa a pulaka slra taŋ vur mike? Mam ng'ar slra kumo!»

⁵Buy Ezipte a ɓi: «Wurenna, mizli a gam le haɗi asi hirwuyo, ki wuɗam na ɓa a musukam vu avu slra taŋ sukwa!»

⁶Ngi pas nah na, buy Ezipte a ɓa buy ngi slrahay ati madiɗa ngi wuzla mizli:

⁷«Ki vulaka gwaara ngi kiɗa brike da mizli, kaɓa kum mavulaka zleˀe na mata. Sey taŋ vuna ara kusumoko di ti haŋ taŋ.

⁸Tikaka taŋ ˀay ɓa a kiɗam brike kite taŋ makuɗoko di zleˀe si na, ko ki maka neˀ ta. I masafayahay, taŋ matilam mi a ɓam: Akum i ra gam mikuli da Buymisemuŋ ndra na, vurˀe!

⁹Sey slra ngi beke a didila mizli tayna, yo sey a gam slra, ɓa a wulkam neˀ le ar ɓi ngi slir taŋ na ta!»

¹⁰Buy ngi slrahay ati buy madiɗa ngi wuzla mizli, a boko, a ɓaka mizli na: «buy Ezipte a ɓi ani: y'anta vulukum gwaara ngi kiɗa brike mata!

¹¹Kum vuna ara sipam ti haŋ kumo ar li kum malumam! Amma ki kiɗam brike kite misi zleˀe si.»

¹²Mizli a waham wah asi hirwuy Ezipte gar nga kusumo gwaara ngi kiɗa brike.

¹³Buy ngi slrahay ara ɓaka taŋ ɓa a wusam vu: «Tikaka slra kumoyo wãˀa! Vur hin gar na, kiɗam brike kite misi zleˀe, kaɓa mavulukum gwaara ti vul zleˀe tuwa!»

¹⁴Buy ngi slra ngi buy madiɗa ngi Ezipteheye, a kiɗaka madiɗa ngi wuzla Israyeley taŋ muvulaka taŋ slra tuwa, a ɓaka taŋ: Brik muvulukum di ngi kiɗ ngi dambu ati nga dana, ki kiɗaka mi naŋ kaɓa kum makiɗaka zleˀe na ta vur mike?

¹⁵Mizli madiɗa ngi wuzla Israyeley tuwa, a soko wudam avu buy Ezipte, a ɓakaŋ: «Ki ga gwat kahana da gawla ɗikeye vur mike?

¹⁶Anta vulam ndra gwaara da ndra gawla ɗikeye mata, yo a ɓam ndra: kiɗaka brike! Ani ara kiɗam ndra, ndra gawla ɗikeye. Mizli ɗikey a zluɓaka le!»

¹⁷Buy Ezipte a ɓa taŋ: «Kum i masafayahay, i masafaya magukum tewle! Kum maɓam: Akum nga gi mikuli da Bumbulvuŋ na vurˀe.

¹⁸Wurenna, ara gam slra, anta sa vulukum gwaara ta, amma brike, kiɗaka kite misi zleˀe vuna ma kini.»

¹⁹Mizli madiɗa ngi wuzla Israyeleye, a puraka na, taŋ ar ɓi mutuwaˀa, vur a ɓaka taŋ na: «Brik muvulukum di le ngi kiɗ vur hin gar na, sey ki kiɗakaŋ, a kic neˀ le ta.»

²⁰Taŋ muboko ti hay buy Ezipte tuwa si na, a wusam vu ng'avi ti Moyis ati Aroŋ makutukoko taŋ na.

²¹A ɓaka taŋ: «Anja Bumbulvuŋ a pura gwat kum migaka na, yo a gukum kiita: Buy Ezipte ati gawla naŋhay anta wuɗam pur hiri ndra mata, asi kumo, ki vulaka taŋ di i maslalam a haŋ ɓa ngi kiɗ ndra vagay vagay.»

²²Moyis a mi ng'avu Bumbulvuŋ, a ɓaŋ: «Bumbulvuŋ ɗu, ki ga bonoy da mizli tayna vur mike? Na ki slino ya nga gi mike?

²³Diga ya muso ndol nga ɓa ɓi ɗik da buy Ezipte na, ara ga bonoy da mizli, yo n'ani ki laha taŋ ta ma.»