Read South Giziga EXO 6 Bible Online

EXO 6 - South Giziga bible

EXO 6

¹Bumbulvuŋ a ɓa Moyise na: «Wurenna, kisa pura gwat ya mawuɗ i ga da buy madiɗa ngi Ezipte: i sa tikaŋ ˀay ti gidaŋ ɓa a pula taŋ a cohom, i sa tikaŋ ˀay ti gidaŋ ɓa a ɓula taŋ ti ngi hirwuy nah!»

²Buymisemuŋ a ɓa Moyise ma: «Bumbulvuŋ i ya.

³Yi biga vu le da Abraham, da Izak waɗ da Zakopo ti slimiɗ nga ya Buymisemuŋ misi ti gidaŋ wãˀ gar, amma ɓa taŋ a sinikiy ti slimiɗ ɗu ‹Bumbulvuŋ› na, i biga taŋ di ta.

⁴Dar i ɗiy ɓi ngi jumoˀay ɗu ati taŋ, ɓa i vula taŋ hirwuy Kanaˀan, hirwuy taŋ mislikiɗoko ti raŋ, taŋ misi zleˀe i mulakay ara na.

⁵Wurenna, i cine niˀic ngi Israyeleye le, Eziptehey magam taŋ beke na, joˀ yi wuluk keŋ ar jumoˀay ɗu ati taŋ.

⁶Vurˀe, ɓa Israyeleye na: Bumbulvuŋ i ya. Slra mitakˀay ngi hirwuy Ezipte na, i sa bi ti kum ti raˀa avra. I sa loho kum tir gi beke, taŋ magam ti kumo, i sa tuɓo kum ti gidaŋ ɗu mihaɗa na.

⁷I sa tiri ti kum mizli ɗuwoy yo i sa tiri Buymisemuŋ kum. Ki sa sinaka Buymisemuŋ kumo, i ya Bumbulvuŋ: buy mibi ti kum tir slra mitakˀay ngi hirwuy Ezipte.

⁸I sa ci ti kum nga hirwuy ya muvula da Abraham, da Izak waɗ da Zakop haŋ paɗ a muŋ na. I sa vulukum di da kum. I ya Bumbulvuŋ maɓukum.»

⁹Moyis a ɓa kahana da Israyeleye, amma a cinakaŋ di ta, asi slra mutuwaˀ ngi bekehey ara gira taŋ.

¹⁰Bumbulvuŋ a ɓa Moyise:

¹¹«Aru, ara ɓa buy Ezipte, a pula Israyeleye tir hirwuy naŋ, ɓa a cohom!»

¹²Amma Moyis a ɓi a mbuŋ Bumbulvuŋ: «Ani ko Israyeley tekeɗe a cinikiy mi ta. Ya mbur misina mi ta na, buy madiɗa ngi Ezipte a sa ciniy di mbri mbrike?»

¹³Bumbulvuŋ a ɓa Moyis ati Aroŋ, ɓa a ram cuw taŋ nga ɓa mingiɓi naŋ da Israyeley waɗ da buy Ezipte, ɓa ngi bo ti Israyeley ti hirwuy Ezipte.

¹⁴Slimiɗ ngi buy ngi hay Israyeley ani: Ruben modogom ngi Zakopo, ziri naŋhay i ti Hanok, Pallu, Hesroŋ waɗ Karmi, sukwi ngi Ruben i hana so.

¹⁵Yo ziri ngi Simeyoŋhoy i ti: Yemuyel, Yamin, Ohat, Yakin, Sohar waɗ Sawul mangal ngi zuŋ Kanaˀan. Sukwi ngi Simeyoŋ i hana so.

¹⁶Slimiɗ ngi ziri ngi Levihey ati dideˀ naŋhay ani: Gersoŋ, Kehat waɗ Merari. Levi a gi ar siifa vi skat ti kukur makir nga tarnaˀ.

¹⁷Ziri ngi Gersohõy i ti: Libini waɗ Simey, taŋ i mizli micawwa ngir sukwi taŋ.

¹⁸Ziri ngi Kehatay i ti: Amram, Isar, Hebroŋ waɗ Uziyel, Kehat a gi vi skat ti kukur makir nga makir.

¹⁹Ziri ngi Merarihey i ti: Mali waɗ Musi. Ar tizer ngi Levi, micawwahayi taŋ.

²⁰Amram a zuɓ ngi ngwasa i medeme naŋ Yokebet, a yaŋ ziri mizilehey cuw, Aroŋ ati Moyis. Amram a gi vi skat ti kukur makir nga tarnaˀ.

²¹Ziri ngi Isaray i ti: Kore, Nefek waɗ Zikiri.

²²Ziri ngi Uziyeley i ti: Mikayel, Elisafaŋ waɗ Sitiri.

²³Aroŋ a zuɓ ngi ngwasa i Eliseba, zuŋ ngi Aminadap, yo i sukum mongoso ngi Nasoŋ, Eliseba a yi ziri mizilehey mufaɗ ti Aroŋ, i ti: Nadap, Abihu, Elazar waɗ Itamar.

²⁴Yo ziri ngi Korehey i ti: Asiri, Elkana waɗ Abiyasaf. Sukwi ngi Korehey i taŋ.

²⁵Elazar, mangal ngi Aroŋ, a zuɓ ngi ngwasa i zuŋ ngi Putiyel, a yaŋ Pinas. Buy ngi sukwihey ar tizer ngi Levi i taŋ.

²⁶Pura, Aroŋ ati Moyise, Bumbulvuŋ miɓi tuwa i taŋ, a ɓa taŋ na: «Israyeleye, boko taŋ ti sila ti sila ti ruwuy Ezipte ka sojehey».

²⁷Moyis ati Aroŋ a ɓaka buy Ezipte, ɓa a boko ti Israyeley ti hirwuy Ezipte avra.

²⁸Tapas Bumbulvuŋ miɓa ɓi da Moyis a hirwuy Ezipte na,

²⁹a ɓaŋ: «I ya Bumbulvuŋ, ɓi ya muɓuw di gar na, ara mahiri naŋ da buy Ezipte.»

³⁰Amma Moyis a ɓi a mbuŋ Bumbulvuŋ na: «Y'ani, i si na mi ta, buy Ezipte a sa ciniy di mbri mbrike?»