Read South Giziga EXO 7 Bible Online

EXO 7 - South Giziga bible

EXO 7

¹Amma Bumbulvuŋ a ɓa Moyise: «I cufuw le, ka kaɓa buymisemuŋ [2], avu buy madiɗa ngi Ezipte, yo sukum ɗik Aroŋ kwana i mijiviɗ ɗiki.

²Mingiɓi ya masa ɓuw di gar na, i ka masa ɓa da sukum ɗik Aroŋ, naŋ kwana a sa mbiɗa da buy Ezipte, ɓa buy Ezipte a pula Israyeley a bam ti ngi hirwuy naŋ avra.

³Amma ya, i sa ga ɓa buy Ezipte a tiri misi hirnga gidaŋ. I sa gi gwat mabugam gwatay ati gwat migam ɗaˀ tahay ti vendeke a hirwuy Ezipte.

⁴Gar ti nah kwana, buy Ezipte anta sa cunukum di ta. I sa wusa Ezipte, yo mizli ɗuwoy, Israyeley na, i sa bo taŋ ti hirwuy Ezipte ti gidaŋ ɗu ngi wi mizli.

⁵Ti ya masa zuɓa haŋ ɗu ng'ar Eziptehey, yo ya masa bo ti Israyeley ti wuzla taŋ na, akẽh Eziptehey a sa sinaka Bumbulvuŋ i ya.»

⁶Moyis ati Aroŋ a gaka kanah. A gaka kasl kasl ka Bumbulvuŋ miɓa taŋ di vuna si.

⁷Ti taŋ miram nga ɓa ɓi da buy Ezipte na, naɓa Moyise naŋ ti vi kukur dangafaɗa, yo Aroŋ kwana, naŋ ti vi kukur dangafaɗ ti makir.

⁸Bumbulvuŋ a ɓa Moyis ati Aroŋ:

⁹Da buy Ezipte a ɓukum le: «gam gwat migi ɗaˀ ta na, kisa ɓa Aroŋ: zuɓa ganday ɗike, hiziga nga mbuŋ buy Ezipte, ganday a sa tiri kaw!»

¹⁰Moyis ati Aroŋ a ram ngi hay buy Ezipte, a gaka kaɓa Bumbulvuŋ miɓa taŋ di tuwa. Aroŋ a hiziga ganday naŋ a mbuŋ buy Ezipte ati gawla naŋhaya, joˀ ganday tuwa, a tiri kaw.

¹¹Amma buy Ezipte kwana, a zilo misi sinmijileŋhey ati misi keteleheye, joˀ misi ketele ngi hirwuy Ezipte tayna, a gam gwat misi purla ti ketele taŋ tuwa ya.

¹²Mbur gar a hiziga ganday nga naŋ, a tiri kaw. Amma ganday ngi Aroŋ a nda ganday taŋhaya suɗuk suɗuk.

¹³Gar ti nah kwana, hirnga ngi buy Ezipte a ro gidaŋ na si, a cine mi da Moyis ati Aroŋ ta, kaɓa Bumbulvuŋ miɓa tuwa.

¹⁴Bumbulvuŋ a ɓa Moyise na: «Buy Ezipte a cici le kaŋ kaŋ, anta ngum pula mizli ɓa a cohom ta.

¹⁵Bi prik prik ng'avu buy Ezipte, hirak ti naŋ masa bi nga mi yam na. A ra kutukoŋ a mi mizawa. Yo ganday mitiri kaw tuwa, zuɓa a haŋ.

¹⁶Ɓa buy Ezipte na: Bumbulvuŋ, Buymisemuŋ ngi Hebereye, a slino ya le ɓa i ɓuw: Pula mizli ɗuwoyo, ɓa ara gikiy mikuli a wuzla ɓuh mikirɗak kirɗak, amma hã wurenna, ki ngum cin ta.

¹⁷Vurˀe, Bumbulvuŋ a ɓuw na: I sa kiɗa yam ngir mizawa ti ganday misi a haŋ ɗu na, yam a sa tiri pumbusu. Ki sa si na yi Bumbulvuŋ na, ava.

¹⁸Kilif ngi mizaway a sa micam, yam ngi mizawa a sa zĩˀĩ tititi, ko Eziptehey anta sa saka yam ngi mizawa gu ta ndiɗaˀ wãˀ.»

¹⁹Bumbulvuŋ a ɓa Moyise ma: «Ɓa Aroŋ, a zuɓa ganday naŋ, a ska haŋ ng'ar yam misi a hirwuy Ezipte gar, ng'ar mizaway, barayay, futuŋhoy, ng'ar li misi yam ara gar, anja a tiram pumbusu! Anja angi hirwuy Ezipte gar na, li gar i pumbus, ar gwat ngi yam ngi dum miciɗa ti ciɗey malla ngi ɗuguroy!»

²⁰Moyis ati Aroŋ a gaka kaɓa Bumbulvuŋ miɓa tuwa. Aroŋ a zuɓa gandaya, a kiɗa yam ngi mizawa, a mihiri ngi buy Ezipte ati gawla naŋhaya. Yam ngi mizawa taˀ gar a tiri pumbusu.

²¹Kilif ngir yamay a micam, yam ngir mizaw a zĩˀĩ tititi, ko Eziptehey a saka yam ngir mizawa gu mata. Asi ruwuy Ezipte, li gar i pumbusu.

²²Amma misi sin ngi gi cekenehey a Ezipte, a gam gwat misi purla ti ketele taŋ tuwa ya. Hirnga ngi buy Ezipte a ro gidaŋ na si, anta ngum cine mi da Moyis ati Aroŋ ta, kaɓa Bumbulvuŋ miɓa tuwa.

²³Buy Ezipte a mbiɗi duba ava, a mi ngi hay naŋ, a pura ka ɓi neˀ le ta.

²⁴Eziptehey gar a nduɓam yama ti nduɓ a ciki mizaw, asi yam ngi mizawa a si ta.

²⁵A dirba bonoy Bumbulvuŋ mimbiɗa yam a mizaw tuwa na, hin tarnaˀ a gi le.

²⁶Bumbulvuŋ a ɓa Moyise: «Ci ngi hay buy Ezipte, ɓaŋ na: Bumbulvuŋ a ɓuw ani: Pula mizli ɗuwoy a ram, ara gikiy mikuli.

²⁷Da ki ngum pul taŋ ɓa a ram ta ɓula si na, i sa ga bonoy da hirwuy ɗike gar ti gecey.

²⁸Gecey a sa gam kweslekwesle a mizawa, a sa boko ti mizawa, a cam ngi hay ɗiki, nga viŋ ɗik ngi hin, ng'ar arngawo ɗiki, ngi hay gawla ɗikey, ngi hay mizli ɗikey, ng'ar li di ɗaf ɗikey, ng'ar li fukuɗa hapa ngi di ɗafahay.

²⁹Gecey a sa jiɗam ng'avu vu ɗik, ng'avu vu ngi mizli ɗikey, waɗ ng'avu vu ngi gawla ɗikeye gar.»