Read South Giziga EXO 8 Bible Online

EXO 8 - South Giziga bible

EXO 8

¹Bumbulvuŋ a ɓa Moyise: «Ɓa Aroŋ na, ska haŋ ti gandaya ng'ar mizaway, barayay waɗ ng'ar futuŋhoy, yo ga ɓa gecey a boko ti mizawa ng'asi hirwuy Ezipte.»

²Aroŋ a ska haŋ ng'ar yam ngi hirwuy Ezipteheye, gecey tuwa, a boko, a sirtaka Ezipte sirit wãˀ.

³Amma misi sin ngi gi cekenehey a gam gwat misi purla ti ketele taŋ tuwa ya: a gaka ɓa gecey a boko asi hirwuy Ezipte gar.

⁴Buy madiɗa ngi Ezipte a zila ti Moyis ati Aroŋ, a ɓa taŋ: «Diram dibiɗ ɓa Bumbulvuŋ a kursa gecey na kileŋ avu ya, kileŋ avu mizli ɗuwoyo, ɓa yi sa pula mizli, ɓa a ram nga gi mikuli da Bumbulvuŋ.»

⁵Moyis a ɓa buy Ezipte: «Ɓa i dir dibiɗ vur ka, vur gawla ɗikey waɗ vur mizli ɗikey, ɓa gecey a susuymom asi hirwuy ɗike, a hay ɗike, ɓa a ndir sey a mizaw si na, inga wiy pas nah takwa.»

⁶Buy Ezipte a ɓaŋ: «Ti priki.» Moyis a ɓaŋ: «I sa ga kaɓa ka miɓa, yo ɓa ki sina, Bumbulvuŋ Buymisemuŋ ndra na, mbur ngi wa ti naŋ anta.

⁷Gecey a sa kursam kileŋ avu ka, kileŋ avu hay ɗikeye, kileŋ avu gawla ɗikey, yo kileŋ avu mizli ɗikeye, ɓa a ndir sey a mizaw si.»

⁸Moyis ati Aroŋ a bam ti hay buy Ezipte. Moyis a tila mi da Bumbulvuŋ vur ɓi ngi gecey magiraka buy Ezipte na.

⁹Bumbulvuŋ a ga kaɓa Moyis miɓa tuwa. Gecey a micam, a susuymom a hayaya, a mamayaya waɗ ar guvahaya.

¹⁰A hilaka taŋ zikitiŋ zikitiŋ, Ezipte gar a zĩˀĩ gec tititi.

¹¹Buy Ezipte a pura na, ara fi himiɗ, a cici kaŋ kaŋ a muŋ, kaɓa Bumbulvuŋ miɓa tuwa, a ngum cine mi da Moyis ati Aroŋ ta.

¹²Bumbulvuŋ a ɓa Moyise: «Ɓa Aroŋ ɓa a zuɓa gandaya, a kiɗa murɓuk ngi ruwuyo, ɓa murɓuk a sa tiri cunju asi ruwuy Ezipte gar.»

¹³Moyis ati Aroŋ a gaka kanah. Aroŋ a ska haŋ jom ti ganday nah, a kiɗa murɓuk ngi ruwuyo. Cunju a gi nim nim avu mizli waɗ avu gineweye. Murɓuk ngi ruwuyo gar a tiri cunju giv giv asi hirwuy Ezipte gar.

¹⁴Mizli misi sin ngi gi cekenehey tuwa, a titilaka gi cunju tuwa ya, amma a gaka gu ta. Cunju a ndir nim nim avu mizli waɗ avu gineweye.

¹⁵Misi sin ngi gi cekenehey tuwa, a ɓaka buy Ezipte na: «Hana i haŋ ngi Buymisemuŋ.» Amma hirnga ngi buy Ezipte aro gidaŋ na si. Buy Ezipte a ngum cine mi da Moyis ati Aroŋ ta, kaɓa Bumbulvuŋ miɓa tuwa.

¹⁶Bumbulvuŋ a ɓa Moyise: «Slikiɗ cẽẽt, ti buy Ezipte masa ru nga mi yam na, aru nga mbuŋ naŋ, ɓaŋ na: Bumbulvuŋ a ɓi ani: Pula mizli ɗuwoy ara gikiy mikuli.

¹⁷Da ki pula mizli ɗuwoy a ram ta na, i sa slino ti bibirey ar ka, ar gawla ɗikey, ar mizli ɗikey, ngi hay ɗiki. Hay ngi Eziptehey gar, a sa naham ndus ndus ti mumuyuŋ jom ati hirwuy taŋ midedeŋ ara na ma gar.

¹⁸Tapasa, tir vay Goseŋ, mizli ɗuwoy misi ara na, i sa pula nah mbak, tir vay nah, bibir a sa so anta, ɓa kisa sina, ya Bumbulvuŋ, y'ada asi ruwuyo.

¹⁹I sa wi vu ti mizli ɗuwoyo, baˀ pal avu ngi ɗikey bonoy masa kiɗa taŋ na. Bonoy nah na, a sa gi ti priki.»

²⁰Bumbulvuŋ a ga ka naŋ miɓa. Bibirey a cam nim nim ngi hay buy Ezipte, ngi hay gawla naŋhay, yo nim nim asi hirwuy Ezipte gar, bibir a sirta li gar.

²¹Buy Ezipte a zila Moyis ati Aroŋ, a ɓa taŋ: «A ram, ara gaka mikuli da Buymisemuŋ kumo, amma gakaŋ di asi ruwuy hana vuna si!»

²²Moyis a ɓaŋ: «Ĩˀĩ, a tiɓaŋ kanah ta, asi mikuli ndra magaka da Bumbulvuŋ Buymisemuŋ ndra na, naŋ kuyta wãˀ a mihiri ngi Ezipteheye. Ani mikuli taŋ mapuraka kuyta wãˀ na, i gaka a mihiri taŋ gu, manja a kuyupom ndra ti ɗugur sukwa?

²³Sey i vam hiipas hiipas makir ar li ru nga wuzla ɓuh mikirɗak kirɗaka, ɓa i ra gaka mikuli da Bumbulvuŋ Buymisemuŋ ndra a diga, kaɓa naŋ masa ɓa ndra di.»

²⁴Buy Ezipte a mbiɗaŋ di: «Haˀaw, i sa pulukum, ki ra gaka mikuli da Bumbulvuŋ Buymisemuŋ kumo a wuzla ɓuh. Amma ki ram kileŋ ta ɓula! Yo diram dibiɗ vur ya.»

²⁵Moyis a mbiɗaŋ di: «Naŋ kine, i ra bi ti hay ɗike nga tumbulo Bumbulvuŋ, yo zle tiprike, bibir a sa cuh kileŋ avu ka, avu gawla ɗikey, waɗ kileŋ avu hirwuy ɗike. Na so na, ka mapula mizli nga gi mikuli da Bumbulvuŋ ta na, ki singir ti singir ar ndra, sey ki pula singir ɗik ar ndra na ɓula!»

²⁶Moyis a bi ti hay buy Ezipte, a tumbulo Bumbulvuŋ.

²⁷Bumbulvuŋ a ga kaɓa Moyis miɓa tuwa. Bibir a cuh kileŋ avu buy Ezipte, kileŋ avu gawla naŋhay waɗ kileŋ avu mizli naŋhaya, ko a ndir neˀ le ta.

²⁸Gar ti nah kwana, buy Ezipte a cici kaŋ kaŋ ɓula si, yo a pula mizli a ram ta na si.