Read South Giziga EXO 9 Bible Online

EXO 9 - South Giziga bible

EXO 9

¹Bumbulvuŋ a ɓa Moyise: «Ci ng'avu buy madiɗa ngi Ezipte, ɓaŋ na: Bumbulvuŋ Buymisemuŋ, ngi Heberey a ɓuw ani: Pula mizli ɗuwoy ɓa ara gikiy mikuli.

²Da ki ngum pula taŋ a ram ta na si, yo ki ra cici zlak ngi tika taŋ na,

³naɓa gidaŋ ngi Bumbulvuŋ naŋ da ar ginewey misi a pala, ar pilisey, zunguhoy, zlogomohoy, slahay waɗ tumuŋhoy: i mozoborno ngi ɓi avu mi ta!

⁴Bumbulvuŋ a sa gwaha ginew ngi Israyeleye tivi ngi Ezipteheye. Ko pal masa muc asi ngi Israyeley anta.»

⁵Yo ma na, Bumbulvuŋ a ɗuva hin naŋ le taˀ wãˀ, a ɓi: «I sa go gwat hana asi ruwuyo ti priki.»

⁶Yo li naŋ muwun na, Bumbulvuŋ a ga gwat tuwa: ginew ngi Eziptehey gar a micam pay pay, amma a wuzla ginew ngi Israyeleye, ko pal mumuc anta.

⁷Buy Ezipte a slin ɓa ara puraka: ko a lumam ginew mumuca pal asi ngi Israyeleye ta! Amma buy Ezipte a cici kaŋ kaŋ ɓula si, a pula taŋ a ram ta na si.

⁸Bumbulvuŋ a ɓa Moyis ati Aroŋ na: «Wuɗam hilseɓ ngi misirgaɗ ngbal ngbal haŋ cuw, ɓa Moyis a sa zliɗa nga muŋ a mbuŋ buy Ezipte.

⁹A sa wuh turliŋ ka lagwada asi hirwuy Ezipte gar, mizli ati ginew ngi hirwuy Ezipte gar, a sa hislam liw liw, waˀa fiɗik fiɗik.»

¹⁰Moyis ati Aroŋ a wuɗam hilseɓ tuwa, a ram dedeŋ a mbuŋ buy Ezipte, Moyis a zliɗa nga muŋ, dar mizli ati gineweye, a hislam liw liw, waˀa fiɗik fiɗik.

¹¹Akẽh so na, misi sin ngi gi cekenehey tuwa, a cicam a mbuŋ Moyise gu mata, vur hisl tuwa, asi vu taŋ gar i hisl, yo vu ngi mizli Eziptehey gar i hisl.

¹²Amma Bumbulvuŋ ara ga ɓa hirnga ngi buy Ezipte a tiri gidaŋ na si, a ngum cine mi da le Moyis ati Aroŋ ta, kaɓa Bumbulvuŋ miɓa ɗaˀ le Moyis tuwa.

¹³Bumbulvuŋ a ɓa Moyise na: «Slikiɗ cẽẽt, aru nga mbuŋ buy Ezipte, ɓaŋ na: Bumbulvuŋ Buymisemuŋ ngi Heberey a ɓi ani: Pula mizli ɗuwoy ɓa ara gikiy mikuli.

¹⁴Asi wurenna, i wuɗ i slino bonoyoy cek ng'ar ka muduba, nga hirnga ɗik vuna, ng'ar gawla ɗikey waɗ ng'ar mizli ɗikey, ɓa kisa sina, ko mbur pal ngi wa ti ya anta asi ruwuyo ta.

¹⁵Da ani i zuɓa haŋ ɗu le zleˀe ngi kiɗ kumo na, anja ani i ngizlukum le ti jiji mangizl vu sunok sunoko, ka ati mizli ɗikeye, anja ani ki susuymom le asi ruwuyo.

¹⁶Amma ya mupuluw mbak na, ɓa i buguw gidaŋ ɗu, ɓa slimiɗ ɗu a zil asi ruwuy gar.

¹⁷Ki ra hurdum ngi tika mizli ɗuwoy ɓa a ram ta.

¹⁸Ti prik li kahana na, i sa po yam ti gidaŋ ka vuŋ, diga mipaka Ezipte hã dana, a gi ɗaˀ kanah ta.

¹⁹Yo wurenna, slin ɓa a wam vu ti ginew ɗikey ati gwat ɗikey gar misi a ɓuh. Mbur malla ginew mindir le a ɓuh, da a mo ngi haya ta na, yam a sa po nga hirnga taŋ, a micam.»

²⁰Mbur ada a wuzla gawla ngi buy Eziptehey, i mbur mazluwun ti mingiɓi ngi Bumbulvuŋ, a wi vu ti gawla naŋhay ati ginew naŋhay le a viŋ.

²¹Mbur mupura ɓi ngi Bumbulvuŋ le kaɓa ɓi ngi sefel na, a pula gawla naŋhay ati ginew naŋhay a ɓuh.

²²Bumbulvuŋ a ɓa Moyise: «Zuɓa haŋ nga muŋ, ɓa yam a po asi hirwuy Ezipte gar, ar mizli ati ginewey, waɗ ar giziŋ misi ar ɓuh ngi Ezipte gar.»

²³Moyis a zuɓa ganday naŋ nga muŋ, Bumbulvuŋ a pulo ndisl ngi vuŋ waɗ yam, vuŋ a ndislo nga ruwuyo, Bumbulvuŋ a po yam ng'asi hirwuy Ezipte.

²⁴Slaslalay, ndisl ngi vuŋ jom ti yam: a gi ti gidaŋ haɗi angi hirwuy Ezipte gar, diga taŋ mipam, a puram gwat kanah ɗaˀ ta.

²⁵Slaslalay a kiɗa gwat misi a ɓuh cek, asi hirwuy Ezipte zlar gar, mizli ati gwat misã miheye. A kiɗa giziŋ ngi ɓuhoyo gar, yo a ngila widis ngi ɓuhoyo gar.

²⁶Slaslalay a pul sey hirwuy Goseŋ, Israyeley misi anga na tewle.

²⁷Buy Ezipte a zilo Moyis ati Aroŋ, a ɓa taŋ: «Wurenna, i gi mungra le muduba, mijeŋŋe i Bumbulvuŋ, ndra ati mizli ɗuwoy i zluɓaka le.

²⁸Tumbuloko Bumbulvuŋ! Ndisl ngi vuŋ ati yama muk muduba! I sa pulukum ki cohom, kum anta ki zikam haɗa mata.»

²⁹Moyis a ɓaŋ: «Ya misa bi le tir walahaya si na, i sa zuɓa haŋ ng'avu Bumbulvuŋ, ndisl ngi vuŋ a sa tiˀi, yam a po mata, ɓa ki si na miwa hirwuyo i Bumbulvuŋ.

³⁰Amma yi si na le, kum ati gawla ɗikeye, kum anta zluwunam ti Bumbulvuŋ Buymisemuŋ t'aruŋ.»

³¹Gugumay ati daw giziŋ a hiryam le, asi daw giziŋ i fufun aruŋ, yo gugumay kwana, ara fuyuku.

³²Alkamari ati daw ɓuh, a hiryam ta, asi taŋ a gam kutum ta.

³³Moyis a bo ti hay buy Ezipte, yo a bo tir walahaya, dar a zuɓa haŋ ng'avu Bumbulvuŋ, ndisl ngi vuŋ ati yam a taˀa siriw, ko vuŋ anta go nga ruwuyo mata.

³⁴Buy Ezipte a pura na, vuŋ, yam waɗ ndisl ngi vuŋ a taˀam le, a gi mungra a muŋ ma. A zlaka ati gawla naŋhaya a cicam kaŋ kaŋ si ma.

³⁵Hirnga ngi buy Ezipte a ro gidaŋ na si, buy Ezipte a ngum pula Israyeley a ram ta, kaɓa Bumbulvuŋ miɓa ɗaˀ le da Moyis tuwa.