Read South Giziga JOB 1 Bible Online

JOB 1 - South Giziga bible

JOB 1

¹Mbur ada asi ruwuy Us, a zilaka Jop. I mbur mikaslsla, miteŋteŋ, a zluwun ti Buymisemuŋ, a kirih kileŋ avu gwat malambaˀa.

²A yi ziri mizilehey tarnaˀ waɗ mongosohoy makir.

³Naŋ ti tumuŋ durmuk tarnaˀ, zlogomo durmuk makir, sla ngi hufoy, gam skat skat zlum, zungu madiya skat skat zlum waɗ gawlahay kweslekwesle. Asi ruwuy Palestin vay ngi si pas ngi miprike, ko mbur mindilaŋ anta.

⁴Ziri naŋ mizileheye, a gam muguzlum a hay mburo, a hay mburo, a tislam di tiɗeˀe, a zilaka sukum taŋ mongoso mimakirey tuwa, ɓa ara zumam, a sam bummoˀ.

⁵Da a zliram le tiɗeˀe ngi gi muguzlum a hay taŋhaya na, Jop a zilo taŋ, ɓa a zuɓa taŋ dili avra. A slikiɗ ti li, a gi mikuli mizlamzlam wãˀ vur hirnga taŋ tiɗeˀe, asi a ɓi ti kwacay naŋ na: «Asinta, ziri ɗuwoy na, a gam mungra le, yo a zaka Buymisemuŋ le a mevel taŋ kwani? Jop a ga kanah ndrehhe»

⁶Ti di numuŋ ada na, modro ngi Buymisemuŋhoy a ram nga mbuŋ Bumbulvuŋ. Satan mukupa ɓi aru a wuzla taŋ ya.

⁷Bumbulvuŋ a cufuɗaŋ: «Ki so ti damaka?» Mukupa ɓi a mbiɗa da Bumbulvuŋ: «I ro ti liˀi asi ruwuyo zleˀe, gun gun zlar.»

⁸Dar Bumbulvuŋ a cufuɗaŋ: «Ki pura gawla ɗu Jop na le kwa? Ko mbur ngi wi ti naŋ anta asi ruwuyo ta. I mbur mikaslsla, miteŋteŋ, a zluwun ti ya Buymisemuŋ, yo a kirih kileŋ avu gwat malambaˀa.»

⁹Amma mukupaɓi tuwa, a mbiɗa da Bumbulvuŋ: «Jop mazluwun ti ka Buymisemuŋ vuna, i ngatara kwa?

¹⁰Naŋ vuna ati hay naŋ waɗ gwat naŋhay gar na, ki ra jigina taŋ gun gun kaɓa gezleŋ a hirnga ginewey takwa? Ki ɗuwulaŋ mi le vur gwat naŋ maga gar, yo ginew naŋhay a roko suɓulak asi ruwuyo.

¹¹Amma inga ja haŋ neˀ avu gwat naŋhay vuna si ta. I si na le gisiŋ, a sa nisuw, anta ɗum ti ɗum ta ma kini!»

¹²Akẽh na, Bumbulvuŋ a ɓa mukupaɓi tuwa: «Da kine na, zlili naŋ gar na, n'ani asi haŋ ɗiki. Amma ki ja haŋ avu siifa naŋ ta ɓula.» Dar mukupaɓi a cuh ti mbuŋ Bumbulvuŋ.

¹³Ti di numuŋ a da na, ziri ngi Jopoy tuwa, ara zumam, ara sam a hay sukum taŋ madiɗaŋ.

¹⁴Mislin a ndilo ng'avu Jopo, a ɓaŋ: «Slahay a roko zleˀe ar li hufu, zungu madiyahay kwana, ara zumam gweˀ a ciki taŋ.

¹⁵Mizli Sabihey a ndiloko ɓuyoh, a ɓulaka taŋ le, yo a ngizlaka gawla ɗikeye le kap. Milahawa i ya pal ɗu, i so na nga ɓuw ɓi nah.»

¹⁶Gawla mudumbuŋ ara ɓi aruŋ, amma mekelem a ndilawa, a ɓaŋ: «Vuŋ a pi sar le ar tumuŋhoy ati gawla ɗikeye, a wura taŋ le zlam zlam kap. Milahawa i ya pal ɗu, i so na nga ɓuw ɓi nah.»

¹⁷A tika mingiɓi naŋ t'aruŋ si na, mbur mekelem a ndilawa ma, a ɓaŋ: «Mizli Babiloŋhoy, ngay taˀ taˀ makir, a ndilam vu wuw ar zlogomohoyo, a ɓulaka taŋ le, yo a ngizlaka gawla ɗikeye le. Milahawa i ya pal ɗu, i so na nga ɓuw ɓi nah.»

¹⁸A tika mingiɓi naŋ t'aruŋ, mbur mekelem a ndilo ma, a ɓaŋ: «Ziri ɗik mizile ati mongosohoyo, a roko zumam, a roko sam mbaazla zleˀe a hay sukum taŋ madiɗa,

¹⁹amma burkataŋ gambara a ndilo ti duba li papala, a kicuwura zlirɗiy mumufaɗ ngi dalam ngi haya na, a mbizli a hirnga gawla ati diiliheye, a micam le kuɗup. Milahawa i ya pal ɗu, i so na nga ɓuw ɓi nah.»

²⁰Akẽh na, Jop a slikiɗ. A ngira godo naŋ waɗ a hija hirnga. A diɗ mboh a ruwuy, a huruk huruk,

²¹dar a ɓi: «I bo ti kwacay maha gulndiŋ kine, i sa mi nga ruwuyo gulndiŋ kine ma. Bumbulvuŋ a vula le, Bumbulvuŋ a zuɓa le a muŋ. Sise da Bumbulvuŋ si!»

²²Angi gwat tayna migam gar na, ko Jop a gi mungra neˀ le ta. Ko a mbiɗa hirnga da Bumbulvuŋ neˀ le ta.