Read South Giziga JOB 10 Bible Online

JOB 10 - South Giziga bible

JOB 10

¹Siifa anta giy kuy mata, y'anta sa pula tuwa ɓi ɗu ta, i sa ɓa ɓi magiriy a mevel na muduba.

²I sa ɓa Buymisemuŋ na: ki gi ti ya kaɓa mbur migi malambaˀ le ta, gwat ka mambiɗiy hirnga vurˀe na, bigiy di.

³Ka maguzuvuriy, ka mahirsa gwat ka miga ti haŋ ɗike, yo ka mapula misi moˀorehey, a gaka gwat taŋ majuwaka le ngi gi na, ada cǝruw hiri kwa?

⁴Hiri ɗike, naŋ kaɓa ngi mizli titirahay kwa? Pura hiri ɗike, naŋ kaɓa ngi mbur kwa?

⁵Siifa ɗike, naŋ degweleˀ kaɓa ngi ndra mizli vuna ya kwa? Vi ɗike, a kiɗ mi kutum kaɓa ngi ndra mizli vuna ya kwa?

⁶Ka mawuɗ sey ki si na mungra ɗu madiɗa, yo ka maka virzi ngi mungra ɗu na vur mike?

⁷Yi gi gwat malambaˀ ta, yo mbur masa tiɓiy tisi haŋ ɗik anta na, ki si na le ngbaŋ takwa?

⁸Mindiriy, yo mukutumiy i haŋ ɗiki, haŋ beɗ beɗ avu ya, ti ka ti ka gar ma na, ani ki wuɗ ki ziziy maso!

⁹Inga wulka keŋ ɗi: ki ndiriy zleˀe ka mandiram gwat ti hohoy, ani wurenna ki wuɗ tiri ti ya murɓuk a muŋ.

¹⁰Ki zluriy zleˀe nga kwacay maha kaɓa mazlurom ɗuwa, a dirba nah, ki hindirikiy kaɓa ɗuwa mahindirik takwa?

¹¹Ki sirtiy meficek waɗ kuturkuy sirit, ki ndiriy na, tesleye joɓ joɓ waɗ dimbaslaya kilek kilek.

¹²Ki vuliy siifa waɗ gidaŋ, yo ki ki slimiɗ ar ya, ɓa i musuwun kuy kuy.

¹³Dambalaka ɓi ada ɗum a mevel ɗike, ɓi ka magijuwa a kwacay ɗik zleˀe na, ya vuna i si na le, n'ani:

¹⁴Da i ra gi mungra na, ki wuɗ ɓa ki jiy kasl ara, yo ɓa k'anta puliy malambaˀ ɗu teˀ ko pal ta.

¹⁵Da i gi malambaˀ le na, kay, naɓa i bonoy avu ya! Da ko ya jeŋŋe kwana, i ru hirnga kaˀ a muŋ gu ta, mesem a kiɗiy le ɓurusl, bonoy a wiy le duwlak.

¹⁶Da yi zuɓa hirnga le paɗ na, naɓa ki gidiɗiy ka dirlengeŋ. Joˀ ki giy bonoy ti cekene ɗik madiɗahay na mbak le ta.

¹⁷Ki zliy ngi kiɗa vu, aseˀeŋ aseˀeŋ, ki slikiɗ mevel ti gidaŋ ti gidaŋ ng'ar ya, yo sojehey ngay taˀ taˀ a diɗoko vu kpis ngi kiɗ ɗu vagay.

¹⁸Ki bo ti ya ti kwacay maha vuna ngi mike? Anja yi muc le pam zleˀe na, ko mbur mupuriy anta.

¹⁹Anja a yikiy cak pam zleˀe na tewle, kaɓa mbur ada zleˀe ta si.

²⁰Hin ngi siifa ɗu a ndir haɗa aruŋ kwa? Anja ka Buymisemuŋ, pula kiɗa vu ɗik ati ya, puliy mbak kwaɗay, ɓa i pul vu neˀe,

²¹ɓa i sa ru ng'ar hirwuy ngi luvuŋ ati ngi li titira ngi muco, hirwuy misi y'anta sa mo mata na.

²²Hirwuy misi li mawuno i luvuŋ titira, a diga i li mitimbiɗim ngi mizli mumucahay anta mbak le ta si, yo li minjahha, i duvuɗ mitimbiɗim.