Read South Giziga JOB 11 Bible Online

JOB 11 - South Giziga bible

JOB 11

¹Akẽh na, Sofar mbur Naˀama, a ɓa Jopo na:

²Ɓi ka miɓa taˀ taˀ na, a ndir manja a mbuɗukuw di sukwa? Mabiga mingiɓi ngi mburo naŋ kaslsla na, i si na mi kwa?

³Mingiɓi ɗik mukoloŋ koloŋ na, a pula mizli mi haɓak sukwa? Ki singir ar mizli, manja a pukuw mesem sukwa?

⁴Ki tum vu, ki ɓi na: «Mingiɓi ɗu naŋ kaslsla, yo Buymisemuŋ i sedewo ɗu, ya manja dili!»

⁵Kay! Da Buymisemuŋ a ɓi ɗaˀ zleˀe, da a wuna mi ɓa a mbuɗuw di zleˀe na,

⁶sin naŋ mijileŋ, misi mufuna lesl ndra na, da a buguw gwat muɗum ngi raˀa zleˀe na, anja kisa sina, Buymisemuŋ ada sluw mungra ɗikeye cah avra.

⁷Ki wa na, ki si na wuluk ngi Buymisemuŋ gu kwa? Misi gidaŋ wãˀ, hereweɗ anta ava neˀ le ta na, ki si na jileŋ naŋ gu kwa?

⁸Wuluk nga naŋ kileŋ, a funa kileŋ ngi birngiŋ ngi muŋ le, kisa gi mbri ska? Naŋ jileŋ fineˀ li cifi ngi mizli mumucahay, kisa sin mi ara ka?

⁹Naŋ sliprik, a funa si gazlavay kurzluˀo le, yo naŋ firndiw, fineˀ mubuliye ma.

¹⁰Da Buymisemuŋ ara ja mbur muzluɓ ɓi le, a kaŋ ar dangay, yo a zila ng'ar kiita na, mbur masa ngum ta ada kwa?

¹¹Asi Buymisemuŋ a si na mizli kesefeye le, manja a ji lesl kaw le kwana, a pura gwat malambaˀ ngi mburo.

¹²Amma mbur migira le kupuyah ti wuluk na, lesl anta, yo mbur titira gar, diga yi naŋ cak na, i zingaˀ ngi zungu ngi ɓuh.

¹³Ka so na, pula mevel ɗike da Buymisemuŋ, yo hila haŋ ɗike hoc ng'avaŋ, ki tumbuloŋ.

¹⁴Da ki zuɓa haŋ ɗike le, ki gi di malambaˀ le zleˀe na, zliɗa malambaˀ tayna kileŋ, yo anja gi moˀore a ndir a hay ɗike ta.

¹⁵Dar kisa ru digi hirnga kaˀ a muŋ, manja gwat zlep le avu ka, kisa cici zlak gidaŋ gidaŋ, ko k'anta sa zluwun mata.

¹⁶Asi k'anta sa wulka bonoy ɗike mata, kisa wulka ɓi nah kaɓa yam mucuh le.

¹⁷Hin ngi siifa ɗik a sa gi kwal, fineˀ wuzla papasa, luvuŋ a sa tiri njahha kaɓa li mawun.

¹⁸kisa si na gisiŋ, njaha hiri ada, ka masa pura gwat gar ara cuh kuy kuy tuwa na, kisa hinje ti zuy.

¹⁹Ka mira musuk vu na, ko mbur masa guw ngaˀ anta, mizli haɗi a sa hunumukuw jaka.

²⁰Amma misi moˀoreheye, gidaŋ ngi hiri taŋ a sa tiki, ko t'anta sa lumam li ɗumo ta. Njaha hiri nga taŋ, i mucu.