Read South Giziga JOB 12 Bible Online

JOB 12 - South Giziga bible

JOB 12

¹Akẽh na, Jop a zla a ɓi:

²Gisiŋ, ka ki si na gwataya le gar, yo sinmijileŋ a sa kiɗ mi avu ka.

³Na ya kwana, ya ti wuluk kaɓa ka vuna ya, yi mbur ngi si sar ɗik ta. Misina kiluwa ɓi kahana ta i waka?

⁴Yi tila mi da Buymisemuŋ zleˀe na, ti njaha hiri, a sa mbiɗiy di, yo yi tiri le yi mbur, ngama ɗuwoy masingiram ar ya. Mbur mijeŋŋe, mikaslsla jak na, joˀ mizli a singiram araŋ.

⁵Mizli misi ar wuyahaya, a wulkam ani: ‹Mbur mibi ti jiŋ ta na, hirsukum di hiris le!› A gam slra ti wuluk taŋ misenna vur mizli sar muba taŋ le.

⁶Mufuyo vuhoyo, a roko zuy zuy a hay taŋhaya, mizli majiginam mi avu Buymisemuŋ, a roko setette, ko mizli misi gidaŋ nga taŋ i kuli kwana, naŋ kanah ya.

⁷Na, inga cufuɗa gwat misãmihey ɗi, a sa bugukuw si na gwat, cufuɗa ɗiyuwoy maslikiɗam a muŋ, a sa dubunukuw gwata.

⁸Kiɗam slir ati hirwuyo, a sa buguw si na gwat, yo ati kilif ngir mubuliyeye, a sa slufukuw ɓi.

⁹Miga gwat tayna gar i gidaŋ ngi Bumbulvuŋ, gwat loŋ asi taŋ misina ta na, anta.

¹⁰Musuɗuk ngi gwat misi titiri gar na, naŋ asi haŋ naŋ, siifa ngi mbur titira gar na, naŋ asi haŋ naŋ.

¹¹Mizli a ɓam na: «Slimiɗe, a cine mingiɓi kuyyo, kaɓa irne matitila gwat ngi zumo ndummo na ya.

¹²Mizli migam gal le na, sinmijileŋ naŋ avu taŋ, yo mizli mizikam le haɗa na, lesle kwana, naŋ avu taŋ.»

¹³Dambalaka na, sinmijileŋ ati gidaŋ, taŋ avu Buymisemuŋ, kuti waɗ lesle, taŋ avu naŋ ma.

¹⁴Gwat Buymisemuŋ muwaha le na, anta sa ndiraka hiri naŋ a muŋ ta, naŋ migica mburo le ar dangay na, anta sa pulakaŋ ta.

¹⁵Da a cica vuŋ le na, naɓa i kwalay, da a pulo vuŋ le ma na, a hiriya gwat ngi ruwuyo pay.

¹⁶Gidaŋ ati si na gi gwata, taŋ avu naŋ, mbur miziza le ati mbur miziza vu gar na, inga naŋhay.

¹⁷Buymisemuŋ a ga ɓa mizli madiɗa ngi ngomnahay a laˀam kiŋ kiŋ lambaˀ, yo a ga ɓa migi kiitahay a bam hirngaŋ.

¹⁸A cuko gidaŋ ngi buy madiɗa miwi mizli, a juwa taŋ zana ngi dangayay hirlak hirlak a virzi.

¹⁹A ga ɓa masayay a laˀam kiŋ kiŋ lambaˀ, mizli mujoˀjoˀ, gidaŋ gidaŋ ar li taŋhaya, a putukuso taŋ avra.

²⁰A gica mi da mizli misina miheye, a ga ɓa midigilahay a slaka wala ngi ɓi ta.

²¹A hirsa mizli micawwahaya putuk wãˀ, a pusuka zeweɗ ngi juwa vu ngi mizli migi gwat ti gidaŋhaya, mbak taŋ col kine.

²²Luvuŋ mititim titim ngir butumoyo, a tiri di ngbay ar li babaraŋ, yo luvuŋ ngir li ngi mizli mumucahaya, a tiri di njahha.

²³A ska sukwi ngi mizli, yo a ngizla taŋ ma, a pula ɓa sukwi ngi mizli a jam, hirwuy zlar, a ja taŋ ng'ar li mekelem.

²⁴A ga ɓa buy ngi mizli a ndiram manja wuluk, a pula taŋ zlaɗ a laˀam kiŋ kiŋ lambaˀ nga wuzlaɓuhoy.

²⁵Mizli a ram digi tiɗim tiɗim ar luvuŋ, li minjahha neˀ le anta ra ta, joˀ Buymisemuŋ a ziza taŋ kaɓa mizli muwam le ti mbaazla.