Read South Giziga JOB 13 Bible Online

JOB 13 - South Giziga bible

JOB 13

¹Haˀaw, gwat tayna cek na, i pura taŋ le ti hiri ɗu, slimiɗ ɗu a cine le, yo i sla wala taŋ le.

²Gwat kum misinaka le na, ya kwana, i si na le ya. Yi gilaw fineˀ kumo ta.

³Amma ya na, ya mawuɗ i ɓi na, i ɓa da Buymisemuŋ Misi Gidaŋ wãˀ, ya mawuɗ i cik vu na, a mbuŋ naŋ.

⁴Kumo na, ki ɗumoko ɓi mikaslsla a hur slir kum na, kum cek na, kum i mumbulo vuhoy gisiŋ ta.

⁵Masa tuˀukum mi lek na, i waka? Da ki taˀaka mi le na, naɓa ki tiram misi sinmijileŋhey le.

⁶Inga cinaka ya macik vu na, yo jikam slimiɗ, ɓa ki cinaka ya maɓi ngi laha hirnga ɗu na.

⁷Kum maɓam ɓi mijeŋ ta na, ki waka kaɓa ki jinam di i Buymisemuŋ kwa? Kum magam slir na, ki waka kaɓa ki cikam vu na aseˀe kwa?

⁸Kum ti seˀe gisiŋ sukwani? Kum majinam is na, asi Buymisemuŋ sukwani?

⁹Naŋ kuy avu kumo, ɓa a pura jileŋ ngi mevel kumo kwa? Ki gam dungur ti naŋ, kaɓa magam dungur ti mbur kwa?

¹⁰Da a sa luuma le, a mevel kumo, kum anta ti seˀe ta na, a sa mbuɗukum hirnga gisiŋ gisiŋ zleˀe si!

¹¹Kpak nga naŋ buy na, ki zluwunam di ta mbrike? Naŋ magi zluwun na, zluwun naŋ a jukum ta mbrike?

¹²Mi kum mukoloŋ koloŋ misi purlahha nah na, naŋ kaɓa fucu turliŋ tewle, yo wuluk kumo, naŋ kaɓa mohol ngi hohoy.

¹³Taˀaka mi! Pulikiy mbakka. Masa ɓi i ya muduba! Da i mi masa giy kana zuy!

¹⁴I juw vu le vur gwat gar, ko da i muc kwana zuy.

¹⁵A sa kiɗiy gisiŋ zleˀe si. Y'anta njih hiri ar gwat neˀ le mata. Amma, i sa cik vu asi hirnga ɗu a mbuŋ naŋ.

¹⁶Na zle masa lihiy gu na, i jiviɗ nah vuna, asi mbur miɓi mi cuw cuwo, ko pal masa ndil a mbuŋ naŋ anta.

¹⁷Cinaka, cinaka mingiɓi ɗu kuy kuy, anja pulaˀvra ngi ɓi ɗu na, a ci a slimiɗ kumo.

¹⁸Puraka ɗi: i juw vu le ngi cika vu a hirnga ɗu, i si na le, ko i gi gwat ta.

¹⁹Mawuɗ widi ti ya i waka? Asi da i zluɓ ɓi le na, i tiɓa le ɓa i taˀa mi, yo ɓa i mucu.

²⁰Aw Buymisemuŋ ɗu, lihiy avu gwatay cuw, ɓa y'anta sa ɗum kileŋ avu ka mata.

²¹I gwatay ani: Zuɓa haŋ ɗik mihirasl ar ya na avra. Ki giy zluwun ɓa a muɗiy didak ta.

²²A dirba nah, ziliy, ɓa i sa mbuɗuw di, malla ta na, yi sa ɓuw, joˀ kisa mbiɗiy di.

²³I gi mungra madiɗa, yo i zluɓ ɓi is kiteka? Ya mislikiɗ ɓi, yo ya muzluɓ ɓi na, inga bigiy taŋ.

²⁴Ki mbiɗiy duba, yo ki puriy ka mesene ɗik vur mike?

²⁵Ki wuɗ gidiɗa kalaf, himiɗ makil di kwa? Ki wuɗ ki kil ɓaˀ asi giziŋ muˀulo kwa?

²⁶Ani, ki tuh ɓi mutuwaˀ le haɗa a hirnga ɗu, mungra ya mugo taŋ zle ti zuŋ kwana, ki slufa taŋ le.

²⁷Ki wuɗ ki ciy dambla gizl a saraya, yo gwat ngi gi ɗu gar na, ki ra jiɗaŋ, hã li ngi sar ɗu mitaˀ a ruwuyo kwana, ki wa weˀ le na si?

²⁸Na, dumvu ngi mbur titira vuna a zum tif tif kaɓa dum mohoɗohoɗo ngbaŋ, njukuɓ kaɓa zana tiler muzuma le.