Read South Giziga JOB 14 Bible Online

JOB 14 - South Giziga bible

JOB 14

¹Mbur titira i ngwas miyaŋ, naŋ anta zik haɗa ta, yo naŋ ti bonoy haɗa.

²A gil kaɓa mufuyuku, a dirba nah a ɓutu, a kiɗ mi kutum kaɓa susuɗuk mazik ta.

³Buymisemuŋ ɗu, anja ka maɗuva hiri taˀ na, ar naŋ, yo ka maɗiɗi ng'ar kiita a mbuŋ ɗik na, i ya vuna!

⁴Mabo ti gwat manja dili tir gwat misi dili i waka? Ko mbur anta.

⁵Na zle, ki sla maakway ngi hin ngi mbur titira le, ki slufa kiya naŋ le, yo maakway ka mislaŋ di na, a tuwuɗa gu ta ndiɗaˀ.

⁶Pur hiri ng'ar li mekelem, anja mbak ɓa a pul vu neˀe, yo ɓa a mumul kaɓa mbur migi slra ngi dala mamumulo musuka vu naŋ.

⁷Asi ko widis kwana, naŋ da ti njaha hiri, ko da a ngumaka le kwana, a ɗiɗi a muŋ, naŋ anta pula ɗiɗi mbak le ta.

⁸Ko da dambasl naŋhay a gam magala le a ruwuyo, ko da dirngbizliŋ naŋ a muc le ti ruwuyo kwana,

⁹naŋ mizãˀã yama le ŋzeˀ si na, a ɗiɗi, a ga mihaŋ naŋhaya kiɗiw kiɗiw, kaɓa widis meciɗek aruŋ.

¹⁰Amma da mbur bugawla a muc le na, gidaŋ naŋ a kiɗ mi le. Da mbur a muc le na, naŋ da aruŋ ma kwa?

¹¹Yam ngir mubuliy a sa si kããk, mizaway a sa hisikam ngbasl ngbasl.

¹²Naŋ kine, mizli ngi ruwuyoyo, t'anta sa slikiɗam mata. Ti muŋ misi naŋ da aruŋ na, t'anta sa slikiɗam ta, t'anta sa puɗukam tir hinje taŋ ta.

¹³ˀEy! da ki ngum zleˀe na, ɗumiy ɗum ar li cifi ngi mizli mumucahay, ɓa ki ciy kulaˀ asi gwat, hã ka mitisla mevele le, yo ki sliy hin, ɓa a dirba nah na, ki wuluk keŋ ar ya a muŋ!

¹⁴Na, da mbur titira a muc le na, a mo ti siifa gu aruŋ makwa? Da kine zleˀe na, ar hin ngi slra ɗu mitakˀay le hana na, y'ada ti njaha hiri, hã da mizli mekelemey misa soko mbiɗikiy le.

¹⁵Da ka misa ziliy le na, dar i sa ziluw mi, kisa wuɗ pur ɗu, ya mbur, ka migiy ti haŋ ɗike.

¹⁶Ani wurenna, sar ɗu ya maɗuva taˀ taˀ gar na, ki ra slufaŋ, tumbuŋ, k'anta sa ki slimiɗ ar mungra ɗuwoyo mata.

¹⁷Sli himaˀ ɗu na, kisa ca kulaˀ ar gabal, waɗ mi naŋ ngiriɗ ngiriɗ, kisa sirita mungra ɗu madiɗa sirit ti gwat babaraŋ.

¹⁸Dambalaka, muwã a mbizli, a wuh meɗmeɗ ngbaŋ, mandazlay muwã a kirih ng'ar li mekeleme gu.

¹⁹Yam a zuma ɗuguro gu, naŋ majuruf na, a la hirwuyo jileŋ, Ka kwana Buymisemuŋ, njaha hiri ngi mburo, ki hiriyaŋ di le ya.

²⁰Ki zlumburaŋ a ruwuy, a cuh gwaɗ naŋ, ki hiriyaŋ hiri ndoɓoɓ, dar ki ɓulaŋ a ru.

²¹Ada ɗuvaka hirnga da ziri naŋhaya kwa mbrike na, naŋ a si na ta. A ra burɗaka taŋ kwa mbrike na, naŋ a sla wala nah ta.

²²I naŋ pal naŋ masi bonoy ti vu majaŋ, I naŋ pal naŋ matuwuy ti hiryi naŋ.