Read South Giziga JOB 15 Bible Online

JOB 15 - South Giziga bible

JOB 15

¹Akẽh na, Elifas mbur Temaŋ a zla, a ɓa Jopo:

²Mbur misi sinmijileŋ kaɓa ka, mingiɓi maɓakaŋ di na, a mbiɗa manja pulaˀvra naŋ kwa? A ɓi, a ɓi suweˀ lambaˀ ta takwa?

³A juɓ ɓi joɓ joɓ ngatara si kwa? A ɓi ɓi koloŋ koloŋ lambaˀ si kwa?

⁴Ani, ki hiriya zluwun ɗik ti Buymisemuŋ le, yo ɓi ngi wuluk kuy kuy a mbuŋ naŋ na, ki susuymo le ma.

⁵Mabo ti balam ɗike, i ɓi ngi mungra madiɗa, yo mi ngi kwala ɗike, ka kaw di i wer ngi gi gilaw da mizli.

⁶Mujuw ti kiita i mingiɓi ɗiki, i ya ta, mambuɗuw hirnga, i irne ɗik vuna tehhe a muŋ.

⁷Ki wa vu ɗike kaɓa Adamu, mbur micikiɗeffe na kwa? A yukuw dumbuŋ ar muwãhaya kwa?

⁸Ɓi miɓaka ar li ngilawuy ngi Buymisemuŋ na, k'ada, ki cine le, yo ki lum sinmijileŋ le da ka pal ɗik anga kwa?

⁹Gwat ka misina, ɓa ndr'i sinaka ta na, i mike? Gwat ka misla wala naŋ, ɓa ndr'i slaka wala nah ta na, i mike?

¹⁰Pura, a wuzla ndra, mizli micawwahay, midigilahay ada, mekelemey a funaka cine ɗike le ti vi.

¹¹Buymisemuŋ matikinuw, ɓa ki taˀa tuwuyo, yo ndra maɓukuw ti ˀay mezle na, naŋ preˀ kwa?

¹²Bonoy a guw ji mevel vur mike? Ki pura ndra ti hiri malambaˀ vur mike?

¹³Asi ki ra wuluk wuluk malambaˀ angi Buymisemuŋ, yo ki ɓi suweˀ si.

¹⁴Mbur titira i mi, ɓa a pura vu naŋ kaɓa naŋ manja dili na ka? Mbur, ngwas miya ma na, a ɓi naŋ jeŋŋe mbrike?

¹⁵Buymisemuŋ, ko naŋ anta pula mevele da modro naŋhay vuna ta, yo ko muŋ vuna ma, naŋ ti dili a mbuŋ Buymisemuŋ.

¹⁶Sokkota mbur titira mizãˀã le, mihirya le, magi ti gwat malambaˀa kaɓa a si di i yam na ma kwa?

¹⁷Inga ciniy di ɗi, i wuɗ i dubunuw gwata. Gwat ya misingila na, i wuɗ i supuw ɓi nah.

¹⁸I wuɗ i dubunuw gwat ngi misi sinmijileŋheye cek ceke, sirik taŋ mulumoko di avu dideˀ taŋhay,

¹⁹Buymisemuŋ muvula hirwuy na da taŋ, naɓa ko mbur mulak loŋ mici a wuzla taŋ anta aruŋ.

²⁰Pura ɗi: Mbur misi moˀore, ar hin ngi siifa naŋ gar na, ara sin bonoy. Yo mbur maga gwat naŋ ti gidaŋ haɗa le na, vi naŋ i misla maakway naŋ le.

²¹A ra cin ˀay magi zluwun haɗa, Naŋ muro zuy zuy na, mihirya gwat a sa zlaŋ ngi kiɗa vu takwa?

²²A wa kaɓa naŋ anta sa bi gu tir luvuŋ mata, asi maslalam ara kutukoŋ tehhe.

²³A liˀi kiŋ kiŋ ngi sipi gwat ngi zumo, amma ara lum amaka? A si na le, gwat makutukoŋ na, i mucu.

²⁴Ndrehhe na, zluwun ara gaŋ ti bonoy waɗ ti lika ɓi, bonoy ati like, ara jiɗam bir bir ng'ar naŋ kaɓa buy madiɗa mujuw vu le ngi vurum.

²⁵Hana i gwat magi avu mbur muzuɓa haŋ le ng'ar Buymisemuŋ, a sli himaˀ le avu Buymisemuŋ Misi Gidaŋ wãˀa.

²⁶Hirnga dir a ruwuy, a kil taˀ dibiɗ ng'ar Buymisemuŋ, ɗum ti mbaray naŋhay maslinam tahaya.

²⁷A zlumbur le, kwala tukuk, virzi a diga a diga.

²⁸A cifi ar walahay muzumahay le, ar hay misi mizli anta ar taŋ mata, muroko gweˀ ngi mbizli.

²⁹Amma mbur nah, naŋ anta sa gi zlili ta, zlili naŋ anta sa zik ta, lum naŋ anta sa sik asi ruwuyo mata.

³⁰N'anta sa lih tir luvuŋ gu ta, naŋ kaɓa widis, vu muwura mihaŋ naŋhaya le, joˀ Buymisemuŋ a sa ˀufo himiɗ fir, a kil di kileŋ.

³¹Naŋ magi gilaw da mizli na, anja a pula vu naŋ mbak vurˀe ta, asi a sa wurkakaŋ ti gilaw naŋ maga da mizli vuna ya.

³²Ɓa hã a sa muc tikeˀe na, naɓa gwat hana a gi le, mihaŋ naŋhay anta sa ɗiɗam ɗiɗeˀ le mata.

³³A sa pa yi naŋ magala kine, kaɓa gudubun mapa yi naŋ, yo a sa pa mufuyuk naŋ, kaɓa tutumbur.

³⁴Haˀaw, sukwi ngi mizli miziriɗa miheye, a gam dirlay, vu a sa zuma hay ngi mbur misi may gwata.

³⁵Mbur makicuw ɓi malambaˀa, a yi bonoy, yo ɓi naŋ mujuwa a kwacay naŋ na, a sa tikin di i naŋ vuna tehhe a muŋ.