Read South Giziga JOB 16 Bible Online

JOB 16 - South Giziga bible

JOB 16

¹Dar Jop a zla a ɓi:

²Mingiɓi misi kahana, i cin le is mbeˀ mbeˀ si, kum gar kum i mizli ngi tisla meveley, amma kum anta ngi pula girey ta.

³Kum ɓikiy: «Mingiɓi ɗik hana misi pulaˀvra naŋ anta na, a sa kiɗ mi ti vunaka?» Yo ma na: «Magiruw i mi ɓa ki mbiɗa ndra mingiɓi kahana na ka?»

⁴Da misi ar li ɗu i kum zleˀe na, anja yi ɓi kaɓa kum vuna gu ya. Anja i sa vuɗ ɓi koloŋ koloŋ ngi mbuɗukum hirnga, dar i sa hir hirnga deŋ ar kum.

⁵Anja i sa vulukum gidaŋ ti mingiɓi ɗu, yo i sa ɓi ko mbak le ta ngi tislukum mevel.

⁶Amma da ya mira ɓi na, vu ngi ji anta puliy mbak le ta, yo da i taˀa mi le na, a sa puliy vurˀe sukwa?

⁷Ani wurenna, Buymisemuŋ a tikiy gidaŋ ɗu le si, a ngizla mizli ngi ciki ɗuwoyo le pay.

⁸Naŋ migiy kucurpoˀ na, maga sedewo ɗu i nah, mabiga i gi mungra le na, i ya mizih ngiyam na.

⁹Haˀaw, Buymisemuŋ muro ti mevel fõh fõh na, a jiy kaɓa gwat miji vu, a humbuɗ sliŋ ng'ar ya, naŋ mesene ɗu na, ara ziziriy ziziri ziziri.

¹⁰Mizli, mi wun wun ng'ar ya, a ɓikiy ɓi ngi hiryiy mevel, a cikiy babarva, a zikiy var var, a jumom jom jom ng'ar ya.

¹¹Buymisemuŋ a puliy mbak da ziri a gam ti ya jalaɓi, a hizigiɗiy ŋzloh ng'asi haŋ ngi mizli malambaˀhay.

¹²I ra pul vu zleˀe, amma Buymisemuŋ a zlumburiy a ruwuy. A jiy kaw asi ˀay, a buɗisliy buɗusl, a ciciy deŋ, ɓa a wi haŋ ti luvut naŋ avu ya.

¹³Luvut naŋ a ndilo ti ka ti ka gar. Buymisemuŋ a sliniy ɗugur duba ɗuwoyo le gor njoŋ gor njoŋ, manja ircece, dar meɗelek ɗu a ɓulo yererere nga ruwuy.

¹⁴A slikiɗo badam ng'ar ya, kaɓa mbur migi vurum, a giy waˀa aseˀe aseˀe.

¹⁵I ki zana ngi vagay ɓaˀ a vu vu, waɗ midibiɗ durus da ruwuy.

¹⁶I ro hiri twis twis ti tuwuy, yo hiri ngirliy ka ngi mbur mawuɗa mucu.

¹⁷Haŋ ɗu a ci ngi gi gwat ngi moˀore ɗaˀ ta mayse, yo i ra dir dibiɗ ti mevel purla ngbaŋ.

¹⁸Haya hirwuy ɗu, pumbus ɗu maɓul na, ki dika ta, yo anja widi ɗu a cin ndrehhe na si.

¹⁹Zle dana, migi sedewo ɗu ada a muŋ, mbur macici ar ya ada ar birngiŋ.

²⁰Ngama ɗuwoy ara singiram ar ya, amma ya matuwuy nga ya na, ng'avu Buymisemuŋ.

²¹Anja sedewo ɗu a cik vu ar ya a mbuŋ Buymisemuŋ, kaɓa mbur macik vu a hirnga cala.

²²Asi hin ngi siifa ɗu i muslufa le slaf slaf le, dar i sa zuɓ jiviɗ, y'anta sa mo mata.