Read South Giziga JOB 17 Bible Online

JOB 17 - South Giziga bible

JOB 17

¹I ra musuwun fiɗek fiɗek, siifa ɗu a wuɗ a kiɗ mi gweˀe, a laka vigiɗ ngi dik ɗu le si!

²Mizli masingiram ar ya na, a roko gun hirnga ɗu takwa? Jigina mi taŋ na, ara tikiy hinje.

³Aw Buymisemuŋ ɗu, i ka vuna macici ar ya tehhe a muŋ! Da i ka ta na, macici ar ya i waka?

⁴Ki tika wuluk mezle ngi ngama ɗuwoyo le gisiŋ gisiŋ, yo ma na, ko k'anta sa pula taŋ jiviɗ ɓa a lumam bugawla ta.

⁵Taŋ kaɓa mbur mizila ngama naŋhay le nga wunka gwata, dambalaka ziri naŋhay a roko hiri lawwa ya.

⁶A tiram ti ya le, ɓa mizli a kiɗam ti ya mambaˀa, a sa tufukiy tazlay nga hiri.

⁷Bonoy a giy hiri le ngirliy, hirzlik ngi vu ɗuwoy i musuɗuk naŋ ngataraŋ.

⁸Mizli mikaslslahay masa purikiy na, a sa cicam ngirkik ngirkik, yo mizli micam ar ɓi ta na, a sa jam mevel ar mizli malambaˀhaya.

⁹Amma anja mbur mijeŋŋe a hurdum ti gwat ngi gi naŋ hirdam, yo mbur muzuɓa haŋ naŋ ngi gi malambaˀ ta na, anja a ndir zlak kanah.

¹⁰Amma kumo, ngama ɗuwoy, moko, soko ceke! Yi wa na, y'anta sa lum mbur misi sinmijileŋ a wuzla kumo loŋ ta.

¹¹Hin ngi siifa ɗu a cuh le, slra ya maga maga gar na, a hiryi le, waɗ gwat ngi si mevel ɗu.

¹²Ngama ɗuwoy a waka na, duvuɗ i papasa, yo a ɓam li a wuɗ a wun gweˀe, dambalaka i duvuɗ maji ti ji.

¹³Yi njih hiri gu asi mi aruŋ maka? Hay ɗu i li cifi ngi mizli mumucahay. Yi ɗiya li hin ɗu le ar luvuŋ.

¹⁴I ɓa zivi ɗu na: «Ka ki baha!» Yo mumuyuŋ muhumbuɗa vu, i ɓaŋ: «Aw maha ɗu, aw sukum ɗu mongosoŋ!»

¹⁵Njaha hiri ɗu tuwa, a gi mbrike? Njaha hiri ɗu tuwa, mbur mapura gu ada aruŋ kwa?

¹⁶Njaha hiri ɗu a sa pi sar ɓaˀ asi ya nga hur li cifi mikiɗa mi naŋ ndok wãˀ ngi mizli mumucahay, i sa cam le cuw ndra ng'ar murɓuku.