Read South Giziga JOB 18 Bible Online

JOB 18 - South Giziga bible

JOB 18

¹Akẽh na, Bildat mbur Suha a zla a ɓi:

²Ki sa taˀaka mi hã ti vunaka? Wulkam ɗagay, a dirba nah, i sa ɓam ɓi.

³Mbak Jop vuna a gi ti ndra kaɓa gwat misãmihey sukwa? Ki pura ndra kaɓa ndr'i gilaway vur mike?

⁴Ka Jop mahiriya vu ɗik ti mevel ngataraŋ, ki wa na, ɓa mizli a pulaka hirwuyo njoŋ asi ka, yo ɓa mandazlay muwãhay a kiraham ng'ar li mekelem vur ka sukwa?

⁵Haˀaw, li minjahha ngi mbur misi moˀore a sa kiɗ mi, yo irne vu ngir liwis naŋ anta sa pusluɗa li mata.

⁶Li minjahha ngi hay naŋ ara gi mbuˀ mbuˀ, yo lampe mitaˀ ngi hirnga naŋ, a sa mucu.

⁷Naŋ maru zleˀe ɓurok ɓurok na, a sa ru zuvuˀ zuvuˀ, yo masa zlumburaŋ tehhe a muŋ na, i gwat naŋ mujuwa ngi gi zleˀe na.

⁸Asi mike na, a sa ca saray ar gadaŋ, a diɗi, a sa ca saray ar zuva ngi ji vu.

⁹Ngamngam a sa jaŋ avu duɓuk sara, zeweɗ misi mokor a sa ngirɗa ŋkəhk.

¹⁰Zeweɗ masa ngirɗaŋ vuna, a ro dak dak a ruwuy, a lakaŋ denges le a jiviɗe ɓa a diɗ ng'araŋ.

¹¹Zluwun ara gaŋ ti gwatay ti ka ti ka gar, zluwun a ro ɓaˀ asi sara.

¹²May a sa vaŋ haŋ ti naŋ migidaŋ gidaŋ ti vu naŋ. Bonoy a slurup di le slirap.

¹³Jiji a sa sluɓaŋ kuturkuyo sliɓeˀ sliɓeˀ. Doflo a sa zumaŋ haŋhay ati saraya.

¹⁴A sa bam di avra tir guɗuk, naŋ mapul vu ara na, a ram di ng'avu buy ngi mizli mumucahay.

¹⁵Mbur a sa hin ar hay naŋ zuy, asi inga naŋ mata, a sa pam baruudu ar guva naŋ.

¹⁶A sa tiri i widis misi dimbasl naŋhay mizãˀãm le ti ruwuyo, ti muŋ, mihaŋ naŋhay a sa muˀulom.

¹⁷Anta sa wulkakaŋ keŋ asi ruwuyo mata, anta sa zilaka slimiɗ naŋ a jiviɗeye mata.

¹⁸A sa hizigiɗaka tir li minjahha ng'ar luvuŋ, a sa susuymokoŋ tisi ruwuy hana.

¹⁹A wuzla mizli naŋhaya, tizer naŋ malla sukwi naŋ anta sa ndir ta, ko mbur masa ndir ti siifa anta loŋ a hay naŋ ta.

²⁰Gwat masa gi ava na, hã a sa zuma hirnga da mizli ngi si pas ngi pastaˀhaya, a sa ga mizli misi tisi pas ngi miprikeye kuyta wãˀ.

²¹Mizli a sa ɓam: «Mbur malambaˀ ati mizli ngi hay naŋhaya, gwat mindiraŋ na sey hana, i li misi misinaka Buymisemuŋ ara ta!»