Read South Giziga JOB 19 Bible Online

JOB 19 - South Giziga bible

JOB 19

¹Dar Jop a zla a ɓi:

²Ki gikiy bonoy, ki gikiy bonoy, yo ki hiryikiy, ki hiryikiy ti mingiɓi kum na, hã ti vunaka?

³Ki zikiy ani is kuruˀ si. Mesem a gukum ngi guzuvur ɗu ta mbrike?

⁴Ko da i zluɓ ɓi le gisiŋ tekeɗe kwana, ɓi nah a hirnga ɗu.

⁵Da ko ki wuɗam mikiy ya nga ruwuy, ɓa kumo ki gam ɗongor, ti kum mambiɗikiy hirnga, asi ya mapi mesem na kwana,

⁶sinaka sin le, i Buymisemuŋ miga ɓa i zluɓ ɓi vuna, yo i naŋ miciy ar kwar naŋ.

⁷Da i ra widi vur maguzuvurikiy na kwana, mbur mambiɗiy di anta. Da ko i ra zil vu ɓa mbur a kilo widi ɗu ma, mbur masa giy kiita ɗu anta.

⁸Buymisemuŋ a tika jiviɗe le ɓa i cuh ta, yo a go luvuŋ le ar jiviɗ ya ma cuh ti raˀa.

⁹A kurtiy dudok ɗu le kurut avra, a cukiy loppol ngi hirnga ɗu le cok avra.

¹⁰A ra huriy hor hor ti ka ti ka gar, ya na sar sluloŋ tir vigiɗi. Njaha hiri ɗu gar na, a muɗa le muroh, kaɓa mamuɗam widisi.

¹¹A slikiɗ mevel le ka vu ng'ar ya, a gi ti ya mesene naŋ le.

¹²Mingizla vu naŋhay ara ndiloko hiɗim hiɗim arleˀe, ara ngiroko jiviɗ bir sesẽŋ ng'avi ya, yo ara pam sar gun guɗuk ɗu.

¹³Buymisemuŋ a ɓula sukum ɗuwoyo le kileŋ avu ya, muy ɗuwoyo, a gam kaɓa i mulakay avu ya.

¹⁴Mizli migweˀ ngi vi yahay a sumuɗom le, misin ɗuwoy a puyukom ti ya hirnga le.

¹⁵Mizli mipam sar a hay ɗu, yo ngwas migi slra ngi hay ɗuwoyo, a purikiy kaɓa mulak, yi tiri le avu taŋ ka mbur manja sin.

¹⁶I zila gawla ɗu le na, a ziliy mi ta, ko da i ra tumbuloŋ kwana, i ngataraŋ.

¹⁷Musuwun ngi balam ɗu a zĩˀĩ avu ngwas ɗu kuy ta wãˀ, yo ziri ngi kwacay ɗuwoyo, a purikiy kuy mata wãˀ.

¹⁸Ko ziri memeɗehey kwana, ara hirsikiy, da ya mislikiɗ le na, a ɓikiy cococo.

¹⁹Yeme ɗuwoy anta purikiy kuy mata wãˀ, ko mizli ya mawuɗ taŋ kwana, a mbiɗam le hirik ng'ar ya.

²⁰I ndir sek i tesl waɗ kuturkuy cap tewle, sliŋ sek avra.

²¹Kum ngama ɗuwoy, inga purikiy ircece, purikiy ircece, asi i Buymisemuŋ mija haŋ avu ya.

²²Ki sipikiy nder nder ka Buymisemuŋ vuna ma na, vur mike? Kum magikiy bonoy na, a mbukum t'aruŋ kwa?

²³Eyˀeh! Anja i wuɗ le haɗa ɓa a tohoko mingiɓi ɗu na ti tuhu, yo a tohoko toh toh ar ɗerewol zleˀe!

²⁴A ciɗaka ceɗ ceɗ ti milngama, yo peˀ peˀ titira ti ndifri, waɗ nguɗ nguɗ avu mandazlay muwã, ɓa a ndir ngi wãˀa.

²⁵Ya na, i si na le kuy kuy, mimbiɗi hirnga ɗu naŋ da ti siifa, yo ar kiɗa mi naŋ na, a sa cici zlak a ruwuyo.

²⁶A dirba kuturkuy ngi vu ɗu hana mizĩˀĩ le so na, dar ya ti vu ɗu, i sa pura Buymisemuŋ ti hiri ɗu.

²⁷Gisiŋ, i ya masa pura ti hiri ɗu. Naŋ na, i ya masa puraŋ ti hiri ɗu, anta i mbur mekelem ta. A ra giy vekeɗ vekeɗ a mevel ɗu.

²⁸Da ki ra ɓam: «I guzuvuraka Jopo mbri mbri, ɓa i kupakaŋ ɓi ngi jaŋ ti kiita ka?» na,

²⁹na sey ki zluwunam, asi maslalam a sa kiɗ di tehhe i kum vuna, asi mike, kum minder nder asi ya na, ki ndilaka le ngi luuma muco. Akẽh kisa sinaka, Buymisemuŋ ada sa gukum kiita.