Read South Giziga JOB 20 Bible Online

JOB 20 - South Giziga bible

JOB 20

¹Sofar mbur Naˀama, a zla a ɓa Jopo na:

²Pura, ya mawuluk cuw cuw na, a giy ɓi ɓi, yo jom ti naŋ magiy a mevele vekeɗ vekeɗ,

³ya macin mambiɗikiy hirnga, misi a zikiy ti zi tuwa, amma wuluk ɗu ara fiy ɓi ngi sa mbiɗa mingiɓi.

⁴Ki si na ta kwa Jop? Diga zlezle, ti mucufaka mbur titira asi ruwuy na,

⁵luuma bugawla ngi mbur misi moˀore anta zik ta, yo cira hiri ngi mbur maziriɗ mi na, anta zik ta ma.

⁶Ko da mbur malambaˀ a gil sesẽŋ a dadala muŋ, ko da hirnga naŋ a wusa gazlavaya vrek vrek tekeɗe kwana,

⁷a sa susuyum ngi wãˀ kaɓa zay naŋ matoho di, yo mizli mupur naŋhay zleˀe a sa ɓam: «Naŋ amaka?»

⁸A sa kiɗ mi kaɓa musuwun ti duvuɗu, anta sa lumakaŋ mata, a sa susuyum kaɓa pura gwat ar musuwun ti duvuɗu.

⁹Hiri mapura zleˀe na, anta sa pura mata, ko hay naŋ kwana, anta sa puraka mata.

¹⁰Zlili nga naŋ, naŋ muluma ti haŋ naŋ na, sey ziri naŋhay a wurkam di misi murgahay.

¹¹Tesl naŋ zleˀe selek kaɓa ngi mbur gawla, amma a sa dikakaŋ jom ati naŋ.

¹²Gi malambaˀa naŋ deɗek a balam naŋ, a ndir di kulaˀ asi irne.

¹³ara suɓoŋ, mbak le ta, a ndir di kulaˀ a balama kwana,

¹⁴gwat ngi zum naŋ nah vuna, a sa zĩˀĩ a kwacaya, yo a sa tiri muwuŋ ngi kwecesle.

¹⁵Zlili naŋ mitiɓa avu mizli tuwa na, sey a vunoho di. Buymisemuŋ a sa curkuslo di ti kwacay naŋ avra.

¹⁶Dambalaka naŋ masuɓ zleˀe na, i muwuŋ ngi kwecesl, sliŋ naŋ misi ka ngi kwecesl na, a sa kiɗaŋ vagay.

¹⁷Zlazlar, mizaw, mekepel ngi mam ati ngi ɗuwa na, mbur malambaˀa, anta sa pura mata.

¹⁸Zlili naŋ muluma na, a sa mo di cek, manja a titila titileˀ le, ko gar ti yam naŋ muluma ti terere naŋ gar na, anta sa pulaŋ gir ta.

¹⁹Asi a burɗa misi murgahaya le, yo a pula taŋ le zlaɗ lambaˀ, ɓa a ndira taŋ haya jak na, a tiɓa avu taŋ ti tiɓi.

²⁰Vur kwacay naŋ mambi ti zlili ta tuwa na, ko gwat naŋ masa lum loŋ angi zlili naŋ anta.

²¹Yo vur may gwat naŋ tuwa na, mbur malih manja a zumaŋ kuɗaˀ le na, anta, yo ma na, mumul naŋ anta sa zik ta na, vurˀe.

²²Gwat ava ka zay ngbaŋ, amma naŋ ar bonoy na si, mizli misi viyahay gar a sa ndilam vu kǝrǝm ar naŋ.

²³Ti naŋ muro ar li nuro gwat nga kwacay na, Buymisemuŋ a sa po himaˀ naŋ ng'ar naŋ. Himaˀ naŋ a sa po ng'ar naŋ ar deɗe ngi ɗaf naŋ.

²⁴Da ara kil ti kiɗ ngi vurumo tekeɗe kwana, lek ngi ɓiri gaza a sa slinaŋ gor njoŋ.

²⁵A muɗa luvut mabo gor njoŋ ti duba tuwa, naŋ mumuɗo di le muroh tir mevele si na, zluwun ti muc a siritaŋ sirit.

²⁶Gwat makutuko mbur malambaˀa, i luvuŋ, vu misi i mbur mubula ta, a sa zumaŋ kap, yo a sa zlizlira gwatay mindiram a hay naŋ kap.

²⁷Mungra madiɗa, naŋ miga na, muŋ a sa njiko di, yo hirwuyo kwana, a sa cici lak lak ng'ar naŋ ya.

²⁸Tapas Buymisemuŋ masa slikiɗ himaˀ na, mekepel a sa fuca zlili naŋ fec fec leɗeɗ ava.

²⁹Gwat Buymisemuŋ mawi di vu vur mbur misi moˀore, yo mi nga naŋ Buymisemuŋ ɓi micica vur naŋ na, i hana so.