Read South Giziga JOB 21 Bible Online

JOB 21 - South Giziga bible

JOB 21

¹Akẽh na, Jop a zla a ɓi:

²Cinaka mingiɓi ɗu, cinaka kuy kuy. kum masa tikinikiy, ɓa i taˀa tuwuyo na, kahana sukwa?

³Ɓusikiy, pulikiy jiviɗ i ɓi. A dirba nah na, ki wuɗam le kisa singiram ar ya so.

⁴Ya matuwuy na, ti mbur titira kwa? Ya maɓusa ɓi gu mata na, i ngatara kwa?

⁵Inga mbuɗoko hiri, purikiy keɗ keɗe. Hã a sa zumukum hirnga, yo haŋ tiɗeˀ a mi.

⁶Ya vuna, da ya muwulka gwat magi avu ya na le wuluk wuluk na, a zluwuniy, yo i jijik kir kir.

⁷Misi moˀoreheye, t'ada ar siifa aruŋ vur mike? A gam midigila, yo a lumam gidaŋ nga mbuŋ nga mbuŋ vur mike?

⁸A ra puraka tizer taŋ, taŋ bummaˀ arleˀe, yo dideˀ taŋhay ara gilam mur taŋ.

⁹A roko zuy zuy a hay taŋhaya, ko zluwun anta. Buymisemuŋ anta kiɗa taŋ ti ganday naŋ ta.

¹⁰Gusoŋ taŋhay ara cufaka madiyahaya, ara yam, ko madiya sla taŋhay anta pam ziri ti pi ta.

¹¹A pulaka ziri taŋhay a zluzluɓam ritititi kaɓa ziri ginewey, ziri memeɗe taŋhay a ɓurgam ka taŋ mawuɗam.

¹²A zlam dimis asi badak waɗ asi gujuvur ma, a mumulom asi tuwuy ngi bozloro.

¹³A kiɗaka mi ngi siifa taŋ ar wuya, amma neˀ na, a cam ti zuy ng'ar li cifi ngi mizli mumucahay.

¹⁴A ɓaka Buymisemuŋ le zleˀe ngbaŋ: «Pula ndra mbakka, ɓi ngi sipa jiviɗ ɗik na, anta cira ndra hiri ta.

¹⁵Misi Gidaŋ wãˀ vuna, a ndila le, ɓa i tiram beke naŋhay kwa? Da i ra tumbulokoŋ vuna na, i lumam mi vurˀe ka?»

¹⁶Dambalaka taŋ misi ar wuya vuna, i gidaŋ taŋ ta takwa? Anja i gi ka migi mungra madiɗa tayna ta!

¹⁷Migi mungra madiɗahaya, ndr'ada i puraka siifa taŋ a kiɗ mi kutum kwa? Mendere ada gi avu taŋ kwa? Buymisemuŋ ada zuɓ himaˀ ar taŋ, a hiriya taŋ gwataya kwa?

¹⁸Dambalaka mizli ada ɓam: «Anja himiɗ a kil taŋ kaɓa haslaɓ, kaɓa cici burkataŋ makil di.»

¹⁹Ki ɓam: Buymisemuŋ, a ga bonoy da ziri ngi mizli tayna ar deɗe ngi cine taŋhaya. Anja a ga bonoyo da cine taŋhay vuna, ɓa a titilaka jak ayɗi?

²⁰Anja misi moˀorehey a puraka bonoyo ti hiri taŋ, yo a titilaka himaˀ ngi Misi gidaŋ wãˀa.

²¹Asi mike na, da siifa taŋ a kiɗ mi le na, ɓi ngi ziri taŋhay a ca taŋ le aruŋ kwa?

²²Mburo, a dubuna si na gi gwat da Buymisemuŋ gu kwa? Mawa modro ngi muŋhoy vuna i naŋ.

²³Mbur mekeleme na, a muc ti naŋ muro ti gidaŋ naŋ kine aruŋ, naŋ muro mumul kuy kuy wãˀ, yo naŋ muro zuy zuy aruŋ,

²⁴virzi a diga a diga, tesleye zliw zliw ti muzuzur.

²⁵Amma mbur numuŋ, a muc pam ti mevel, a titila wuya titileˀ le ta.

²⁶Amma taŋ tayna gar, a dikaka taŋ nga ruwuy, joˀ mumuyuŋ a ji ar taŋ sirit.

²⁷Haˀaw! wuluk kum mawulkam, ati ɓi misi a mevel kum, kum maɓaka ar ya gar na, i si na le kuy kuy.

²⁸Asi ki ra ɓam: «Hay ngi mbur magi gwat ti gidaŋ na, naŋ amaka? Hay, mufuyovuhoy mahinam ara zleˀe na, naŋ amaka?»

²⁹Mulakay macohom na, ki cufuɗaka taŋ ta kwa? Yo mingiɓi, taŋ maɓukum di na, kum anta tiɓaka ta kwa?

³⁰Tapas hin ngi mendere na, mbur misi moˀore a sa bi njiraŋ a diga. Tapas hin ngi Buymisemuŋ masa zuɓ himaˀ fõh fõh na, a sa ɗumokoŋ ɗum.

³¹Masa njikaŋ mungra naŋhay tuwa i waka? Masa maŋ ti malambaˀ naŋ miga na, i waka?

³²Da naŋ mumuc le na, a sa ki saka vagay naŋ hiɗim hiɗim nga mi zivi, a jiginaka zivi naŋ.

³³Zigiduw hiɗim hiɗim, tilɓiŋ tilɓiŋ maram aseˀe, mizli maram a mbuŋ, a slufam ta. Tokoro gweje gweje ngir sozo sek sek nga hirnga naŋ ti zayãˀa.

³⁴Ki tikinikiy ngi taˀa tuwuyo, ki giram vu kum ngi mike? I himiɗ lambaˀa. Ɓi kum mambiɗikiy di na, i slir ngataraŋ.