Read South Giziga JOB 22 Bible Online

JOB 22 - South Giziga bible

JOB 22

¹Akẽh na, Elifas mbur Temaŋ, a zla a ɓa Jopo na:

²Mbur titira a pula gir gu da Buymisemuŋ kwa? Mbur misi sinmijileŋ a pul gir na da hirnga naŋ tehhe a muŋ takwa!

³Ko da gwat ngi gi ɗike jeŋŋe kwana, ada cira hiri da Misi Gidaŋ wãˀa kwa? Da ko k'anta zluɓ ɓi ar gwat ngi gi ɗike ta tekeɗe na, a pulaŋ gir mike?

⁴Da naŋ mira cik vu asi ka, yo ara guw kiita na, ki wa na, a zluwun ti ka ti zluwun kwa?

⁵A guw di na, asi moˀore avu ka haɗa jaka, mungra madiɗahay ka miga taŋ na, a slufam ta.

⁶Gbiŋ lambaˀ si na, ki cufuɗa sukum ɗikeye ɓa a jikam gwat avu ka, yo ki tiɓa taŋ zanahaya, hã mbak taŋ gulndiŋ gulndiŋ kine.

⁷Mbur yam magaŋ haɗa na, ki vulaŋ yama ta, yo mbur may majaŋ na, ko ɗaf ɓuluˀ tekeɗe, ki vulaŋ ta.

⁸Mizli migidaŋhaya, ki pula taŋ mbak a tiɓaka li avu mizli, dar muhuhumo vuhoy a pam ar li tayna.

⁹Ki ɓula wudigahaya, haŋ kavbar kavbar kine, yo ki burɗa mutuhuhoyo.

¹⁰Gadaŋ mikaˀ kaˀ gun hirnga ɗik, yo zluwun maguw gurjik ti gwatay na, vurˀe.

¹¹Mbak duvuɗ a ji ti ka, k'anta pur mata, yo yam micik a nduw le.

¹²Buymisemuŋ naŋ anta ar birngiŋ a muŋ ta kwa? Inga pura wurzlaŋhay mikileŋ kileŋ a muŋ na ɗi!

¹³Dar ka ki ɓi na: «Buymisemuŋ a sin mike? Baɗ a duba gazlavay titira hana, a go ndra kiita gu kwa?

¹⁴Gazlavay a siritaŋ hiri le ngbulum, naŋ anta pur ta, a pur nga naŋ gun gun a muŋ a diga tewle.»

¹⁵Ki wuɗ sipi jiviɗ misi zleˀe, misi moˀorehey masipaka na kwa?

¹⁶Taŋ a micam le daf si, kaɓa dalam mekepel mimbizla le leɗeɗe.

¹⁷Taŋ a ɓaka Buymisemuŋ zleˀe na: «Inga pula ndra mbakka!» Naŋ Misi gidaŋ wãˀa, a ga taŋ mi gu ka kini.

¹⁸Miga ɓa hay taŋhay i zlili pal naŋ na, i naŋ vuna ngbaŋ takwa! Anja i cuh kileŋ avu gidiɓi ngi migi mungra madiɗa tayna.

¹⁹Mizli mijeŋŋehey misa puraka taŋ le na, a sa mumulom, mbur miteŋteŋ a sa singir ar taŋ,

²⁰a sa ɓi: «Puraka ɗi, a zizaka mizli mazliram ti ndra ta tuwa le, vu a zuma gwat ngi lum taŋhaya le kap!»

²¹Ka ɗiya ɓi ɗik ati Buymisemuŋ so, ɓa ki ndir zuy zuy. Naɓa kisa ndir ar wuya ɗik a muŋ.

²²Tuɓa gwat naŋ madubunuw di ti haŋ naŋ na, yo ja mingiɓi naŋ na a mevel ɗike.

²³Da ki ra mo ng'avu Misi Gidaŋ wãˀa, yo gwat mijeŋ ta gar, da ki ra kiraha kileŋ avu ka na, a sa ɗiyuw.

²⁴Hiziga ɓiri tapasl tapasl ɗik a ruwuy, yo ɓiri tapasl tapasl ngi Ofire, hiziga ar ɗuguroy a mizaw.

²⁵Masa tiri ɓiri tapasl tapasl ɗik, waɗ ɓiri bara ɗike, i Misi Gidaŋ wãˀ.

²⁶Dar kisa lum mumul ɗik avu Misi Gidaŋ wãˀa, yo kisa zuɓa hirnga paɗ a muŋ ng'avu Buymisemuŋ.

²⁷Da ka misa tumbuloŋ le na, a sa cinuw di, akẽh na, ɓi micica tuwa na, kisa ga gu muduba.

²⁸Da ki juw ɓi le a mevel ɗike na, ɓi nah a sa gi, yo jiviɗ ka maru ti raˀa, a sa pur kaɗaŋ kaɗaŋ.

²⁹Da mizli mekelemey a sa hĩhĩyam le kwana, kisa ɓa taŋ: «Slikiɗam!» Asi Buymisemuŋ ara laha mizli muluɓ luɓoyo.

³⁰Ko mbur migi gwat le kwana, a lahaŋ si, gisiŋ mbur nah na, a sa lih mbele haŋ ɗik mici ar dili ta na.