Read South Giziga JOB 23 Bible Online

JOB 23 - South Giziga bible

JOB 23

¹Akẽh na, Jop a zla a ɓi:

²Hã dana kwana, i ra slikiɗ ɓi avu Buymisemuŋ, yo i ra tuwuy aruŋ na si. Na bonoy Buymisemuŋ mupulo di ar ya na, a finiy gidaŋ ɗu le ngbaŋ.

³Kay! Da i si na li Buymisemuŋ misi ara na le zleˀe na, anja i ndil sesẽŋ avu janga naŋ ngi buyo.

⁴I sa ɓaŋ ɓi ɗu a mbuŋ naŋ, yo i sa lum ɓi ngi ngila mihey haɗa.

⁵Da a sa ɓiy mbrike na, anja i sa cinaŋ di, yo i sa sla wala ngi ɓi naŋ masa ɓiy di na.

⁶A sa mbiɗiy di ti himaˀ kwa? Kanah ta! Ko mbri, a sa jika slimiɗ asi ɓi ɗu.

⁷Akẽh na, Buymisemuŋ a sa sina, maslufaŋ ɓi na, i ya mbur mikaslsla, yo mbele naŋ migi kiita ɗu na, i sa lih ngi wãˀ.

⁸Amma da i ru ng'asi pas ngi miprik kwana, naŋ anta a diga ta, da i ru ng'asi pas ngi pastaˀa, i lumaŋ ta.

⁹A ro welele ti slra tir vay muŋ kwa mbrike na, i si na gu ta. A ro ɗum tir vay ruwuy kwa, y'anta pura ta.

¹⁰Naŋ, a si na jiviɗ ya maru ti raˀa le ngbaŋ, da a ci le a kwacay ɗu kwana, i sa bo cakar kaɓa ɓiri tapasl tapasl mipal naŋ kine micaka le ngi pur ar vu.

¹¹I ja baraf naŋ le cirre, i ra sipa jiviɗ naŋ, ko i ngizli ta.

¹²Ɓimuɗuva naŋ mubo ti balam naŋ na, ko i ngizli ava ta. Ɓiɓi micica naŋ, yi ja le a mevel ɗu fineˀ ɓi ɗuwoyo.

¹³Amma naŋ, wuluk nga naŋ purla si. Mambiɗaŋ di gu i waka? Gwat naŋ hĩhĩy le na, a ga si.

¹⁴Gwat naŋ mujuwa a mevele ngi giy di na, a sa ga gbaˀa, yo a juw ɓi mekelemey le haɗi ka misenna vuna ma.

¹⁵Deŋ naŋ mamuɗiy didak na, vurˀe. Da i ra wuluk haɗi na, zluwun a giy ti naŋ haɗi.

¹⁶Buymisemuŋ a hĩhĩyiy tumo vu ngir mevel ɗu le, Misi gidaŋ wãˀa, a giy gwat ngi muɗa didak le.

¹⁷Asi ko ti duvuɗ miji, yo ko ti luvuŋ mitimbiɗim ar ya kwana, migiy ɓa i taˀa mi na i nah ta.