Read South Giziga JOB 24 Bible Online

JOB 24 - South Giziga bible

JOB 24

¹Misi Gidaŋ wãˀa, a sla hin ngi ga kiita da mizli sleˀ le ta vur mike? Anja ani mizli miteŋteŋ naŋhay a sa puraka hin naŋ tayna takwa!

²Mizli ara kiraham maakway ngi guvahay, a hulom ginew ngi mizli, a jiginaka taŋ.

³Mizli mekelemey a tiɓam zungu ngi mutuhuhoy, yo sey majikam sla ɓa a vulaka taŋ duvuso i ngwas wudigahay.

⁴Mbur muvuso maru a jiviɗe, a pakaŋ haŋ avra, misi murga ngi si ruwuyoy gar na, a ram ti ɗum ruh ruh.

⁵Misi murgahaya, taŋ kaɓa zungu ngi ɓuhoy a wuzlaɓuh, mizli tayna a bam nga ɓuh ti li, ɓa ngi ru ti sipi gwat ngi zum, a lumoko gwat ngi zum da ziri taŋhaya sey a ɓuh.

⁶A slam giziŋ ngi zumo ar guva, yo a ngilam yi ngi gudubun ngi mbur misi moˀore.

⁷A hinam ti duvuɗo gulndiŋ gulndiŋ kine, asi murga zana. Da himiɗ ara ga taŋ kwana, borgo ngi sirit anta.

⁸Vuŋ malasar magi a muwã, a kiɗa taŋ limbrim, hay taŋhay misi anta tuwa na, a gumbaˀam ti gidigil muwãhay.

⁹A purtaka mutuhu purut a mi ɗuwa ngi mumuŋ si, mbur misi murga, sey a jik gwat jak le ɓa a vulakaŋ duvuso.

¹⁰A gaka ɓa mbur misi murga aru tigi gulndiŋ kine, manja zana, yo ɓa mizli muroko ti maya, a jijiram maslapa ngi daw.

¹¹A ɗucom mal ngi tutumbur ar jarne ngi mizli mekelemey muguno le ti zluɓo, yo a ɗucom yi ngi gudubun ar li ɗuc naŋ ngbaŋ, amma t'anta titilaka ta.

¹²Ar walahaya, mizli ara tuwam, misi waˀahay ara niˀicam, a wuɗam ɓa mbur a kilo widi taŋ, amma Buymisemuŋ, a ro slimiɗ disl disl avu gwat mukuyta wãˀ tayna!

¹³Mizli magaka taŋ gwat tayna vuna, anta wuɗam li minjahha ta, a sinaka jiviɗ minjahha vuna ta, a ram ɗaˀ ar jiviɗ nah ta.

¹⁴Mbur magi mungra madiɗa na, a slikiɗ ti li, a kiɗa misi murga ati misi viya vagay vagay, yo ti duvuɗo ma na, a hul.

¹⁵Mbur migi madama kwana, a wuɗ anja pas a diɗ kutum. A ɓi: «I sa ru, ko mbur a puriy ta.» Joˀ a sirit zana sirit a mihiri.

¹⁶Ti duvuɗo, a ci ngi hay mizli ti gidaŋ. Ti papasa, a roko miviŋ giceˀ giceˀ a hirnga, anta puraka pasa keɗ le ta.

¹⁷Mizli tayna, li mawuno, avu taŋ na, i duvuɗ maji ti ji. Asi mivivuhoyo, a sirikaka gwat ngi gi ti duvuɗo le.

¹⁸Amma kumo ki ɓam na: «Mbur misi moˀore, yam a kil di kutum capappa, mizli ngi si ruwuyoy ara nisaka guva naŋhaya, naŋ anta sa zuɓa jiviɗ ngi ru ng'ar guva ngi gudubuno mata.

¹⁹Ti li mumuˀul le waɗ ti kwalay na, yam mapo buk buko, a luwusl, naŋ kine, mizli migi mungrahay gar na, li cifi ngi mizli mumucahaya, a nda taŋ ya.

²⁰Mumuŋ taŋhay a puyukom taŋ hirnga, amma mumuyuŋ a lum gwat ngi zum mundum le. Ko mizli anta sa wulkaka taŋ keŋ mata. Malambaˀ taŋ na, a ngil le kaɓa widisi.»

²¹Naŋ kine, mizli tayna a gaka bonoy le da ngwas dirlayaya, yo anta gaka mezle da wudigahaya ta ma.

²²Dar Buymisemuŋ a ɓula mizli migi gwat ti gidaŋhaya, da naŋ mislikiɗ le na, mbur misi moˀore, naŋ anta njih hiri asi siifa mata.

²³Na Buymisemuŋ vuna, a pula taŋ le mbak a gam ka taŋ mawuɗam ngbaŋ, dambalaka ara jiɗa gwat ngi gi taŋ.

²⁴Mizli malambaˀhaya, cici taŋ gak na, anta zik ta si, a dirba nah, t'anta mata, a ndilam kaɓa gwat mungumahay le, a sa futuɗaka taŋ kaɓa daw.

²⁵Naŋ kanah gisiŋ takwa? Maɓiy i slir i waka? Mavuvuyo mingiɓi ɗu mukoloŋ koloŋ na i waka?