Read South Giziga JOB 26 Bible Online

JOB 26 - South Giziga bible

JOB 26

¹Akẽh na, Jop a zla a ɓi:

²Yawwa! Ki si na jina mbur hĩhĩy le, yo ki si na laha mbur manja gidaŋ le!

³Ki si na vula kuti le da mbur manja sinmijileŋ, yo ki ra vula si na gi gwat ɗik da mizli ɓaˀ li!

⁴Na ka maɓa mi mukoloŋ koloŋ hana vuna da waka? Ɓi mabo ti balam ɗik hana na, manjukuw di vuna i waka?

⁵Mizli mumucahay ara jijikam a duba jileŋ ngi yam, waɗ ar li nga taŋ vuna.

⁶Avu Buymisemuŋ, li cifi ngi mizli mumucahaya, naŋ ngurɗaɗ ar li babaraŋ, yo ko gwat mitikaŋ hiri ngi pura butum mijileŋhey anta.

⁷Li vay muŋ, miciya mbilir manja ar gwat na, i naŋ, yo a luwa hirwuyo law lambaˀ avu gwat ta si.

⁸A wi vu ti yama fin fin ar gazlavay, ko dudok naŋ anta nduzo gazlavaya ta.

⁹A ɗumo hiri ngi janga naŋ ngi buyo ɗum, ti gazlavay sirit araŋ.

¹⁰A tuh gwat le guduwrakka a hirnga yama, waɗ ar maakway ngi li minjahha ati ngi luvuŋ.

¹¹Da Buymisemuŋ ara buc na, ɓamtal ngi jaha muŋhoy a wusam, yo a zluwunam.

¹²Gidaŋ ngi Buymisemuŋ a wucaha mubuliye le wucah, lesl naŋ a njirsla Rahapa le, gwat misãmi mukuwa.

¹³Buymisemuŋ a musuwun fir na, a kil ti gwat ngi muŋhoyo pay, a nduzo kaw makile ti haŋ naŋ.

¹⁴Da tayna gar i gwat memeɗehey ngi si slra naŋ miga taŋ, yo ndra macinaka ˀay taŋ na kwana, i neˀneˀ lambaˀ si na, na gwat madiɗahay mindizl ndizl, naŋ miga taŋ tayna, masla wala taŋ gu i waka?