Read South Giziga JOB 27 Bible Online

JOB 27 - South Giziga bible

JOB 27

¹Akẽh na, Jop a sipa mingiɓi naŋ nga mbuŋ ava ma, a ɓi:

²I hudum ti slimiɗ ngi Buymisemuŋ misi ti siifa mangum giy kiita ɗu ta na, ti Misi Gidaŋ wãˀ, migiy gwat ngi hiryiy mevel na.

³Da ya mira musuwun aruŋ, yo da musuwun ngi Buymisemuŋ ada fur fur a hutuŋ ɗu aruŋ na,

⁴i hudum le, ko y'anta sa bo ti ɓi malambaˀ ti balam ɗu ta, yo irne ɗu anta sa bo ti ɓi ngi gi gilaw da mbur ta.

⁵Da i ɓukum le, ki zluɓaka ta na, kite i gi malambaˀ madiɗa le! Ya na, y'anta ci ar ɓi ta, hã pam.

⁶Y'ada deŋ gidaŋ gidaŋ, ɓa gwat ngi gi ɗu a ndir jeŋŋe, ko y'anta hĩhĩy ta! Wuluk ngir mevel ɗu, anta mbiɗiy hirnga vur siifa ɗu ta.

⁷Anja a gam ti mesene ɗu kaɓa magam ti mbur misi moˀore na ya, yo mbur mazlir ti ya ta, a gam di kaɓa mbur migi malambaˀ na ya!

⁸«Buymisemuŋ a wuɗ a zuɓa siifa ngi mbur miziriɗa mi, na a njih hiri ngi mi aruŋ maka» na, kum anta ɓam kahana takwa?

⁹Ti bonoy masa luuma mbur misi moˀore gurjik na, Buymisemuŋ a sa cinaŋ widi naŋ kwa?

¹⁰Da a pur misi Gidaŋ wãˀa le zleˀe kuy na, anja a zilaŋ le ko ar pas wanaka gar.

¹¹Yi wuɗ i bugukum gidaŋ ngi Buymisemuŋ, ko y'anta sa ɗumukum wuluk nga naŋ ta.

¹²Ani kum gar kumo, ki puraka le ti hiri kum, na ki ɓam ɓi ngatara lambaˀ vur mike?

¹³Gwat masa gi avu mbur misi moˀore, Buymisemuŋ miwaŋ di vu, yo zlili ngi mbur maga gwat naŋ ti gidaŋ, Misi gidaŋ wãˀ masa vulaŋ di na, n'ani:

¹⁴Mbur misi moˀore, da ko a yi ziri le haɗa kwana, i maslalam masa zuma taŋ, yo dideˀ naŋhay anta sa lumam gwat ngi zumo ta.

¹⁵Ziri naŋhay masa ndiram ti siifa, i mozorbono masa ngizla taŋ, yo ngwas naŋ wudigahaya, anta sa tuwaka taŋ gu ta.

¹⁶Mbur misi moˀore nah, ko da a cikila dala zikitiŋ ka muyuŋ, ko da a cikila zana bac bac zikitiŋ ka hohoy tekeɗe kwana,

¹⁷a cikila ɓula, amma masa ka taŋ i mbur mijeŋŋe, yo dala kwana, masa zuma i mbur mikaslsla.

¹⁸Mbur malambaˀa, a ɗiyahaya i hay migidaŋ ta, hay naŋ kaɓa guɗuk mbur miɗiya le ngi jigina li.

¹⁹A muc ar zlili ɓula, na a kiɗ mi le, da a wuna hiri wun na, ko mi tekeɗe anta.

²⁰Zluwun a so lumaŋ gurjik kaɓa mekepel, ar duvuɗ purla si na, musuure a zuɓa le faw.

²¹Burkataŋ ngi si pas ngi miprik a vaŋ kac, a cuh di wuk, himiɗ a vaŋ ngam baɗ a hay naŋ.

²²Buymisemuŋ a mulaŋ ti luvuto, manja ircece, a tum vu ngi kil ti luvuto.

²³Mizli mupuraka naŋ mira zizi tuwa le na, a ɓam: yawwa! Keɗ keɗ li naŋ micifi ara zleˀe na, mizli a fuyukom deŋ ar naŋ.