Read South Giziga JOB 28 Bible Online

JOB 28 - South Giziga bible

JOB 28

¹Gisiŋ, li maloko ɓiri bara ti raˀa na, yo li mabunam ɓiri tapasl tapasl ara na, ada.

²Ɓiri ho gar na, a loko di a ruwuy, ɓiri gaza wuywuyo, a bo ti vu ɗugur muluwuslaŋ.

³Mizli a jam daliivu ngi pusluɗa li, a wunjuloko ɗugur ar mijileŋ ngi ruwuy mira kiɗo mi wãˀa, ɗugur muɗum ɗumoy sesẽŋ ar luvuŋ ngi li cifi ngi mizli mumucahaya.

⁴Mizli mili ɓirihey a ruwuyo, a gurom butum gor gor ti ruwuyo, ɓa ngi cuh ti ra, kileŋ avu walahaya, mbur a cuh ti kẽh gu ta, a roko law law ti zeweɗ, tindraŋ tindraŋ ar vigiɗeye, kileŋ avu mizli.

⁵Hirwuy, gwat ngi zum mabo ti vaˀa na, huroˀ naŋ, kaɓa vu a zuma le hor hor ti diga.

⁶Mandazlay naŋhaya, i li ngi ɗugur mupuɗaw ngilngil, yo murɓuk ngi ɓiri tapasl tapasl, naŋ ara ma.

⁷Ɗiyuw muzuma useˀhey, a sinaka jiviɗ naŋ ta, kilkandaŋ a ɗuv hiri ɗaˀ ava ta.

⁸Gwat miji vu ngi ɓuhoyo, a cohom ɗaˀ ti kẽh ta, yo mobor a lih sar ɗaˀ ti kẽh ta.

⁹Amma mizli ara buslaka gidigil muwãhaya, ara laka muwã, hã asi virzi naŋ.

¹⁰A gurom jiviɗ ngi cuh ar mandazlaya koh kini koh kini, gwat mupuɗaw puɗaway gar na, mbur a pura taŋ le ti hiri naŋ.

¹¹A hisikaka miviɗiviɗi ngi yamaya le ngbasl ngbasl, a boko ti gwat muɗum ɗumoy zleˀe na, cay ar li babara.

¹²Amma sinmijileŋ na, a lumaka amaka? Lesle, hay naŋ amaka?

¹³Mizli titiraˀahaya, a sinaka cikili ngi lesle ta, yo naŋ anta ar li ngi mizli misi ti siifahaya ta.

¹⁴Mijileŋ ngi yam a ɓi: «N'anta avu ya aka ta.» Yo mubuliy kwana a ɓi: «N'anta a hay ɗu ta.»

¹⁵Lesle, mbur a mbiɗa ti ɓiri tapasl tapasl mipal naŋ kine gu ta, ko ɓiri bara weˀ weˀ haɗa kwana, anta hiɗika hiɗak ta.

¹⁶Ɓiri hirnga mileɗeɗe, anta ndilaŋ ti cikili ta, ko ɗugur mupuɗaw kakayak kakayak, malla ko ɗugur mupuɗaw ngil ngil kwana, anta ndilakaŋ ti cikili ta.

¹⁷Ko ɓiri tapasl tapasl, ko dorogal, anta ndilakaŋ ti cikili ta, ko ɓiri tapasl tapasl pal naŋ kine, mbaf tutuŋ kwana, a hiɗika hiɗak ta.

¹⁸Ɗugur bara mupuɗaw ati ɗugur ɗoro kwana, i ɓaka ɓi taŋ ɗaˀ le avu mi ta. Zuwen sipi sinmijileŋ, a funa sipi virzle hiripaatu na le.

¹⁹Ɗugur mu puɗaw tapasl tapasl ngi Etiyopi, a ndilaŋ ti cikili ta, ko ɓiri tapasl tapasl mipal naŋ kine kwana, a ndilaŋ ta.

²⁰Na sinmijileŋ vuna, a so ti damaka? A lumaka lesl amaka?

²¹N'ada ɗum, mizli misi ti siifahay gar anta puraka ta, ɗiyuwoy maslikiɗam a muŋ, anta puraka ta.

²²Muc ati li cifi ngi mizli mumucahay a ɓam: «Gisiŋ, slimiɗ naŋ mazil na, i cinaka le ɗaˀa.»

²³Amma Buymisemuŋ a sla wala ngi jiviɗ ngi sinmijileŋ maso ti raˀa le, li ngi sinmijileŋ misi ara na, i naŋ pal naŋ misina.

²⁴Asi hiri nga naŋ a pur sesẽŋ a hur hirwuy mira kiɗo mi, yo a singila gwat misi asi gazlavaya gar.

²⁵Asi mike na, i naŋ muvula gidaŋ weˀe da himiɗe, i naŋ misla li mbaŋŋa da jileŋ ngi yama.

²⁶A ga ti naŋ misla maakway da vuŋ ɓa a gi weˀe, I naŋ mika jiviɗ da wucuɗ waɗ da ndisl ngi vuŋ.

²⁷Ti di nah so na, Buymisemuŋ a pura sinmijileŋ le, yo a hĩyã le, a sla wala nah, waɗ a wunjula wunjal wunjal.

²⁸Dar a ɓa mburo: «Sinmijileŋ i zluwun ti ya Bumbulvuŋ. Lesle kwana, i kirih kileŋ avu gi malambaˀa!»