Read South Giziga JOB 29 Bible Online

JOB 29 - South Giziga bible

JOB 29

¹Akẽh na, Jop a zla a ɓi ma:

²Kay! kiya mucohomoy zleˀe, yo hin tayna misi Buymisemuŋ maki slimiɗ ar ya zleˀe na, mamiy taŋ a muŋ i waka?

³Ti di daliivu naŋ maga li zleˀe ciɗak ciɗak a hirnga ɗu, yo ti duvuɗ na, i ru ar li minjahha naŋ.

⁴Ti ya misi zleˀe ar hin ngi gawla ɗu aruŋ, Buymisemuŋ i ngama ɗu, majiginiy haya.

⁵Ti Misi Gidaŋ wãˀ, naŋ da zleˀe ati ya aruŋ, yo ziri mizile ɗuwoyo ndah ndah a hirnga ɗu.

⁶Ti ya mabun zleˀe ti wursla kaɓa ti yam a mizaw, ti mal maɓul ar li ɗuc naŋ ka yam ar zlazlar.

⁷Da ya mira bi nga mizlingre ngi walahaya, yo da ya micifi le njiɗaŋ ar li ngi luuma na,

⁸gawlahay misi akẽh mupurikiy le keɗ na, a sumuɗom kuyaˀ, midigilahaya, a slikiɗam yom.

⁹Mizli mugop gopoy a taˀaka mi siriw, haŋ avu mi avu mi.

¹⁰Buyoy a ɓam haɗa haɗa mata, irne taŋ a ngbuˀ a balama ngbaˀ ngbaˀ.

¹¹Mizli macinaka mingiɓi ɗu, a ɓikiy: Yawwa! Mupur ɗuwoy gar, a gam sedewo mezle ar ya.

¹²Asi mbur misi murga mira widi: gawla kilawa, waɗ mutuhu misi mikila widi naŋ anta na, i ra lahaŋ,.

¹³Mizli migweˀ ngi mucoyo, ara ɗuwulikiy mi, yo i ra ga ɓa wudigahay a mumulom.

¹⁴Gi jeŋŋe na, i ka ɓaˀ avu vu, i zana ɗu. Ar deɗe ngi godo ati gwat ngi tuwuɗa hirnga ɗu, i gi mezle ɗu.

¹⁵Dangaraya, yi tiri hiri taŋ le, yo kilbeɗeheye, yi tiri sar taŋ le.

¹⁶Yi cine ngi misi murgahay, gwat migi le avu mbur mulak na, i ka virzi naŋ.

¹⁷Mbur migi gwat mijeŋ ta na, i ngilaŋ sliŋ le, yo i tiɓa gwat mingik avu mi naŋ le.

¹⁸I ɓi ti kwacay ɗu zleˀe: «I sa muc daˀ ar hay ɗu, i sa gi vi mbeˀ mbeˀ kaɓa ɗiyuw fenikse .

¹⁹I dira dimbasla le kaŋ kaŋ kaɓa widis mikaˀ a mi yam, mihaŋ ɗuwoyo, kap ti duvuɗo, wulngar yororo.

²⁰I sa luuma dudok ɗu misi zleˀe na a muŋ, yo gidaŋ ɗu, a sa so naŋ nga naŋ nga naŋ kaɓa lek mingirɗa le kpaŋ kpaŋ.»

²¹Ti nah na zleˀe, mizli ara cinaka mingiɓi ɗu, ara kutukom. Da ya mira wuɗ i ɓa wuluk ɗu na, mizli a taˀaka mi siriw.

²²Da ya miɓa ɓi ɗu le na, mbur masla anta, mingiɓi ɗu, a ci cineˀe a slimiɗ taŋ.

²³A kutukukiy kaɓa makutukom vuŋ, kaɓa mbur muro ti may ngi yam ngi vuŋ malasar, ɓa a gic nga balama.

²⁴Ya mira singira taŋ mur mur na, ko anta tiɓaka ta, ara purikiy avu hiri ɓa i ga taŋ mezle.

²⁵I ki ɓaˀ a mbuŋ taŋ, i biga taŋ jiviɗe, y'ada a wuzla taŋ kaɓa buy a wuzla soje naŋhay, kaɓa mbur mitikina mizli misi mevel taŋ misli le, ɓa a taˀaka tuwuyo.