Read South Giziga JOB 3 Bible Online

JOB 3 - South Giziga bible

JOB 3

¹A dirba nah na, Jop a wuna mi, a nisa hin ngi yi naŋ.

²Jop a zla a ɓi:

³Kay! Hin miyikiy tapasa ati duvuɗ miɓi: «Mbur a kicuw le a kwacaya» na, anja a susuymom.

⁴Anja hin nah, a tiri luvuŋ! Anja Buymisemuŋ a slufo di paɗ a muŋ a wuzla hineye ta! Anja li a gi njahha angi nah neˀ ta.

⁵Anja luvuŋ ati li mitimbiɗim ngi muco, a tiɓa gwat naŋ a muŋ, anja gazlavay mititim titim a ndir araŋ, ko i papas kwana, anja pas a ci ar luvuŋ.

⁶Anja luvuŋ mukuyta wãˀ a gi ti duvuɗ nah, anja a slufakaŋ slaf le a wuzla hin ngi viheye ta, anja a ci a wuzla hin ngi kiyahaya ta!

⁷Haˀaw, anja duvuɗ nah, a ndir i dirlay kine, anja a cinam salalay angi duvuɗ naŋ ta ndiɗaˀ.

⁸Anja misi cucuk, minisa hiney, yo misi gidaŋ ngi zila ngoŋngoŋhoy, a ɓam: duvuɗ nah, i duvuɗ ngi jubuɗu.

⁹Anja luvuŋ a sirta bangay naŋ ngi wuna li, anja a gir gar ngatara ngi kutuko li mawuno! Anja a pura li mawun njahha na keɗ le ta ndiɗaˀ!

¹⁰Asi i naŋ mupuliy, ɓa i bawa ti kwacay maha, yo i naŋ mupuliy, ɓa i sa bonoy mukuyta wãˀ dana ani na.

¹¹Na zle, i muco zle a kwacay ta vur mike? Anja ya mubo put si na, tiɗeˀ hiri zleˀe ta vur mike?

¹²A cifikiy joˀ le ar sara vur mike? Maha a vuliy ɗuwa taˀ le vur mike?

¹³Anja ani, i ro tup, dana teˀ teˀ ar vigiɗ zleˀe takwa? Dar i hinje, hiri ara ciriy ti musuka vu

¹⁴ati buyoy, mizli micawwa ngi si ruwuyoy, waɗ mizli mandiraka diŋhey a muŋ da taŋ na.

¹⁵Malla anja ani i ro a wuzla yarmahay misi ti ɓiri tapasl tapaslay, mizli misi hay taŋhay ndus ndus ti ɓiri barahay na.

¹⁶Malla, anja y'anta, kaɓa zuŋ mipaka le ti pi, kaɓa ziri mupuraka pasa keɗ le ta na.

¹⁷A ruwuy a diga na, misi moˀorehey, a pulaka gi bonoy da mizli le, mizli migiram le, gidaŋ taŋ mitiki le na, ara musukam vu.

¹⁸Ko dangayay gar kwana, ara pulam vu, t'anta cinam ˀay ngi mizli muguzuvura vuhoyo mata.

¹⁹Mizli mizlewey ati mizli madiɗahay gar na, taŋ a diga purla, yo mbur beke a lum hirnga naŋ le avu buy naŋ.

²⁰Buymisemuŋ a ga li njahha da mizli muroko ar gire vur mike? Yo a vula siifa da mizli misi didak ara muɗa taŋ na vur mike?

²¹A ra kutukoko muco ti yam ar gojogoɗ, amma muc anta wuɗ taŋ ta, a sipaka muco hirdam hirdam, kaɓa mbur masipi zlili.

²²Da a roko ar vigiɗ zleˀe na, anja mumul a kiɗa taŋ le ɓaˀ ɓaˀ, anja ara jiɗam mececẽleŋ.

²³Mbur misina aru nga maka ta si na, Bumbulvuŋ a vulaŋ siifa vur mike? Yo ma na, a jiginaŋ, gun hirnga naŋ ka gezleŋ!

²⁴Ar deɗe ngi ɗaf ɗu na, i ya mahislik ti tuwuy na tewle, tuwuy ɗu a zuɓ paɗ paɗ kaɓa mekepel.

²⁵Gwat magiy zluwuno, mandilo avu ya i nah jaka, gwat mamuɗiy didaka, malumiy i nah cummo.

²⁶Cifi setete, zuy ati musuka vu anta avu ya ta. amma sey lik tewle.