Read South Giziga JOB 30 Bible Online

JOB 30 - South Giziga bible

JOB 30

¹Ani wurenna, i tiri le, ɓa ziri ndra migam mendele geˀ le ta kwana, a singiram ar ya. Cine taŋhaya zleˀe, yi pura taŋ a ndilaka ngi ci nga wuzla kiri ngi si ginew ngir gezleŋ ɗuwoyo ta.

²Gidaŋ ngi hirbazla taŋ na, a giy mi gu geˀ ka? Na zle, gidaŋ taŋ gar a wi mi le.

³Bonoy ati may a hĩhĩya taŋ le, a ram ti sipi gwat ngi zum ar li papala, li midaŋ daŋ, micay kine.

⁴A ram ti ngila lar milemmehey ar siziɓey, yo a humbuɗam dimbasl ngi widisey.

⁵Mizli a ɓulaka taŋ ti wuzla mizli avra, a wudam asi taŋ kaɓa i muhuloy.

⁶A hinam a ciki hurjijiŋhey, ar vigiɗey a ruwuy waɗ ar butumoy.

⁷A tuwam ka slahay ar kalafay, a cikilam huluk aka, huluk aka asi hadaway.

⁸Taŋ kaɓa mibi hirngahay, a gi vu kuyta wãˀ ngi ca taŋ slimiɗe, a ɓulaka taŋ tisi ruwuyo ti ganday.

⁹Ani wurenna i tiri le, ara zlikiy dimisi, ara kiɗam ti ya mambaˀa.

¹⁰A purikiy kuy avu hiri ta, a kilam ti ya. A tufukiy tazlay nga hiri ka ɓi ngi sefel.

¹¹Asi Buymisemuŋ a kusluriy lek ɗu le, a zlumburiy le a ruwuy, gwat malambaˀ ɓa a gikiy di ta na anta.

¹²A soko hoyo hoyo a ciki ɗu, a kiɗikiy sar ɓa i diɗ, a jiginam mi avu ya ɓa a zizikiy.

¹³A dislaka jiviɗ ɗu ngi ci ng'ar li muguno ti moholo, yo a gaka gwata cek ngi zizi ɗu, t'anta ti may ɓa mbur a jina taŋ ta.

¹⁴A cam ngi hay tir mifiliw, a cam slirkiɗ slirkiɗ tisi gwat migirɓaŋ girɓaŋhaya.

¹⁵Zluwun a giy le haɗa, zluwun a kil ti wuya ɗu faw kaɓa himiɗ makil ti gwata. Cifi ɗu ar ndumo, a susuyum le kaɓa gazlavay.

¹⁶Wurenna, siifa ɗu ara kiɗ mi, hin ngi bonoy a jiy le dirmasl.

¹⁷Ti duvuɗo, bonoy a ci avu ya, hã avu tesl, vu ngi ji anta tiˀiy teˀ le ta.

¹⁸Buymisemuŋ a zuɓ himaˀ, a jiy kutumos avu zana, a ngirɗiy ˀaya le ŋkəhk kaɓa zana misi ˀay ngbuk.

¹⁹A hizigiy le ng'ar ndileɓ, y'ani i tiri murɓuk le, i tiri fucu le.

²⁰Buymisemuŋ ɗu, i ra tiluw mi, na k'anta ziliy mi ta ma, i cici le deŋ a mbuŋ ɗike, amma k'anta ɗuvo hiri ng'ar ya ta ma.

²¹Ki tiri le avu ya ki mbur makiɗ vu vagay, joˀ ki guzuvuriy ti gidaŋ ɗiki.

²²Ki viy le ngam, ki ra kil ti ya ti himiɗ faka kaka, yo burkataŋ ngi vuŋ ara buɗisliy hirnga.

²³Yi si na le: ki ru ti ya na, ng'ar mucu, ng'ar li mizli misi ti siifahay gar mara zliram a diga.

²⁴Ani da gwat a funa mburo le na, a tila haŋ da mburo takwa? Yo da bonoy a lumaŋ le na, a zil vu: gawla kilawa takwa?

²⁵Ani yi tuwuy le asi mizli misi ar bonoyo ngbaŋ takwa? Ya mupur mbur misi murga le keɗ na, a giy a mevele kuy ta ngbaŋ ta kwa?

²⁶Da ya mira njih hiri asi wuya na, masa lumiy na, i bonoy jaka. Yi kutuk di i li minjahha, amma i luvuŋ maso sirtiy jaka.

²⁷Mevel ɗu naŋ anta ar haya ta, hin ngi bonoy a ndilo le avu ya.

²⁸I ro digi tiɗam tiɗam, papas anta avu ya ta. A wuzla mizli kwana, i slikiɗ deŋ, i widi si.

²⁹Widi a tiri ti ya sukum ngi sunduhoy le, yo a ci ti ya le a wuzla kurekey.

³⁰Kuturkuy vu ɗu ara lus, yo ara sufut bik bik nga ruwuy, gamba a buliy vu le ciɓak avu vu, hã avu tesley.

³¹Kiɗa gujuvur ɗu a jam haŋ le na, sey ati tuwuy ngi vagay, ˀay ngi bozloro ɗu kwana, a jam haŋ le na, sey ati ˀay ngi mizli mutuwuyoy.