Read South Giziga JOB 31 Bible Online

JOB 31 - South Giziga bible

JOB 31

¹Ani i tika hiri ɗu, zuŋ diili mungbuˀo na, y'anta pura ngi hiyĩ ta.

²Asi da kanah ta na, lum ɗu Buymisemuŋ masa giy di paɗ ti muŋ na, i mike? Mi nga ya ar gwat, Misi gidaŋ wãˀ masa sliniy di baɗ a muŋ i mike?

³Asi mike na, bonoy a sipi di i misi moˀorehey, yo hiryi madiɗahaya, a gam avu mizli migi gwat malambaˀhay takwa?

⁴Buymisemuŋ vuna, naŋ anta pura joˀ ɗu takwa? Yo ya maɗuva sar taˀ taˀ gar na, naŋ anta slufa ta kwa?

⁵Ani i gi gwatay le ti slir, yo yi wus vu le ngi ru ti gi gilaw da mizli sukwa?

⁶Anja Buymisemuŋ a wiy ar kilo mezleŋ, naɓa a sa si na kaslsla ɗu.

⁷Da yi ngizli le ɗaˀ avu jiviɗ mezleŋ, da mevel ɗu a kil le ɗaˀ asi gwat hiri ɗu hĩhĩy le, yo da haŋ ɗu a ci le ɗaˀ ar dili na,

⁸naɓa gwat ya mazliga na, anja i mbur mekelem mazuma, yo gwat mapuso ar guva ɗu na, anja mizli a muɗaka taŋ avra!

⁹Da i pula mevel ɗu le ɗaˀ da ngwas, a tikiniy le, yo da i kutuk ngwas ngi midigwi ɗu le ɗaˀ gumbaˀ avu miviŋ na,

¹⁰anja ngwas ɗu a yaˀa dawa vur mbur mekelem, yo anja mizli mekelemey a hinam di.

¹¹Asi nah na, i gwat ngi mesem mukuyta wãˀ, i mungra madiɗa, ɓa migi kiita a kutiy ti bonoy aseˀe.

¹²Mungra ɗu i vu mazumiy kam kam, hã zizeˀ hirnga ɗu wãˀ, yo a zuma gwat ngi lum ɗu ger ger wãˀ.

¹³Migi slra ngi hay ɗuwoyo, mizile malla mongoso, taŋ musoko ti tuwuy taŋ le a mbuŋ ɗu, da yi burɗa taŋ ɓi nah le na,

¹⁴ti Buymisemuŋ masa giy kiita na, i sa gi mbrike? Ti naŋ masa cufuɗiy na, i sa mbiɗaŋ di mbrike?

¹⁵Naŋ mukicuwiy a kwacay maha na, miga taŋ i naŋ vuna ta walkwa? I naŋ Buymisemuŋ mupurla nah mukicuwa ndra a kwacay mumuŋ ndraˀahaya.

¹⁶Mbur misi murga mucufuɗ gwat le na, ɓa i zlikaŋ kwa? Yo ngwas wudiga misi hiri lawwa ng'avi ya na, i pulaŋ sungulyom sukwa?

¹⁷I zum ɗaf le ɗaˀ pal ɗu manja i vula mutuhu kwa?

¹⁸Zle ti ya misi ti zuŋ na, i gila mutuhu kaɓa yi cine jaka, yo diga miyikiy cak si na, mabiga jiviɗ da wudiga i ya.

¹⁹Mbur migeˀ ircece manja zana, mbur misi murga manja gwat ngi sirit avu vu, i pul le ɗaˀ kwa?

²⁰Ya jak na, i vula taŋ zana le ngi sirit avu vu, zana mija ti ngwic ngi tumuŋ ɗuwoy, ɓa a ga taŋ gippe, a gikiy sise aseˀe ta kwa?

²¹Da yi zuɓ haŋ le ɗaˀ ng'ar mutuhu, vur ya misina le, migi kiitahay a sa ram ti mi tisi ya na,

²²anja pepesl ɗu a pusluh puslah avu dumvu ɗu, yo anja haŋ ɗu a ngil pasl ar mutukul haŋ.

²³Kay, zluwun ara giy ti kuti ngi bonoy Buymisemuŋ magiy di na, i cici a mbuŋ naŋ buyo gu ta.

²⁴I pula mevel ɗu le ɗaˀ asi ɓiri tapasl tapasl kwa? Ɓa i ɓi vur ɓiri mupuɗawa: «Ya vur ka» na, i wuluk le ɗaˀ kwa? Ndiɗaˀa.

²⁵Vur zlili ɗu mihaɗa, yo vur gwat mihaɗa ya muluma ti haŋ ɗu na, i mumul le vurˀe ɗaˀ kwa?

²⁶Ti ya mupura li minjahha ngi pasa, yo kiya mapusluɗa li njahha na le gar na,

²⁷i pula tikin a so ti yaŋŋa a mevel ɗu ɗaˀ ta. Malla taŋ kaɓa i kulihey, ɓa i huruk huruk a mbuŋ taŋ na, i pura taŋ kanah ɗaˀ ta.

²⁸Da i ga le zleˀe kanah na, anja i mungra madiɗa ɓa migi kiita ɗu a kutiy kuti ngi bonoy, kite i si na Buymuŋ ta.

²⁹Mesene ɗu, da ɓi mulumaŋ le na, i mumul le ɗaˀ aseˀe kwa? I jiɗ mececẽleŋ le ɗaˀ asi hiryi mulumaŋ le kwa?

³⁰Yi tika mi ɗu le, ɓa a gi mungra ta, yi ɗuwulaŋ mi ɓa a muco ta!

³¹Ko mizli ngi hay ɗuwoy kwana, a gam sedewo gu: «Mbur mimbi ti useˀ a hay ɗu ta na, i waka?»

³²Mulak ɗu, a hin ɗaˀ avra ta ndiɗaˀ, miviŋ ɗuwoyo t'ada baŋ baŋ ndrehhe vur mulakaya.

³³I ɗumo mungra ɗu le ɗaˀ kaɓa mbur titira kwa? I ɗumo malambaˀ ɗu le ɗaˀ ɗum a mevel ɗu kwa?

³⁴Yi zluwun ɗaˀ ti hiri ngi zigiduwo ta, yo mizli masa singiram ar ya na, a giy zluwun ɗaˀ ta, ɓa i ɗumo is lek, malla ɓa ko i bo avra gu ta na, i zluwun di ɗaˀ ta ma.

³⁵Aw ma, i sa lumo mbur macina mingiɓi ɗu na amaka? Mingiɓi ɗu ngi dirba wãˀ i nah. Anja mambiɗiy di i Misi gidaŋ wãˀ! Na ɓi ngi widi mbur mazlir ti ya ta mutoho ar ya na,

³⁶yawwa, i sa jijira ɓaˀ ar gagalaˀay ɗu, i sa tuwuɗa njiv a hirnga kaɓa loppol.

³⁷Haˀaw, sar ɗu ya muɗuva le taˀ taˀ gar na, i sa slufa ɓi nah da Buymisemuŋ, i sa ru nga mbuŋ naŋ kaɓa yarma!

³⁸Ani guvahay a wudam ti ya le ɗaˀ, malla dodor taŋhay a tuwam ti ya le ɗaˀ kwa?

³⁹I zuma gwat ngi migam taŋhaya le ɗaˀ ngatara, manja i wurka kwa? I gi gwat mijeŋ ta le avu buy taŋhaya ɗaˀ kwa?

⁴⁰Da naŋ kanah na, anja mapusawa i hadaw, ar deɗe ngi dawa, yo ar deɗe ngi daw giziŋ, i mazayvrik mapusawa. Mingiɓi nga ya Jop a kiɗ mi aka.