Read South Giziga JOB 32 Bible Online

JOB 32 - South Giziga bible

JOB 32

¹Elifat, Bildat waɗ Sofara, a pulaka Jopo, a ɓakaŋ mata, asi Jop a pura vu naŋ, naŋ i mbur mijeŋŋe.

²Amma Elihu, mangal ngi Barakel, mbur Bus, muy ngi Rama, a ji mevel ar Jopo, asi Jop mapura vu naŋ jeŋŋe fineˀ Buymisemuŋ na.

³Yo a ji mevel le ar ngama naŋhay mimakir na ma, asi a sinaka ɓa a mbiɗaka da Jopo kini ta, a puraka kaɓa migi malambaˀ i Buymisemuŋ.

⁴Elihu miɓi zleˀe t'aruŋ na, asi ngama ngi Jopoy a funakaŋ le ti vi.

⁵Amma naŋ mupura mizli mimakirey tuwa, misinaka a mbiɗaka kini mata na, a ji mevel.

⁶Akẽh na, Elihu mangal ngi Barakel, mbur Buso, a zla a ɓi: Ya yi gawla aruŋ, kum i midigilahay. Ya muzluwun, yo didak mumuɗiy ngi mbuɗukum ɓi ngi sin ɗu na vurˀe.

⁷I ɓi le ti kwacay ɗu: «Mbak mizli micawwahay a ɓam, taŋ misi vi haɗahay na, masa dubunaka sinmijileŋ da mizli i taŋ.»

⁸Dambalaka na, mburo, magaŋ ɓa a ndir ti lesl na, i musuwun misi a hur naŋ, i ˀUf ngi Misi Gidaŋ wãˀ.

⁹I vi mihaɗa maga ɓa mburo naŋ ti sinmijileŋ ta, yo midigilahay anta slaka wala ngi gwat mijeŋŋe ta.

¹⁰Vurˀe, y'ani i ɓukum: «Cinikiy mingiɓi ɗu, i sa bugukum sin ɗu ya.»

¹¹Pura, i cine mingiɓi kum miɓaka na le, i jika slimiɗe le ngi cine wuluk kumo, hã ti ka mikiɗa mi ngi wunjula ɓi nah na.

¹²I cine mingiɓi kumo le cin cin kuy kuy, amma ko mbur mimbiɗa da Jop anta asi kumo ta, ko mbur misina mbiɗaŋ hirnga asi mingiɓi naŋ anta.

¹³Ki ɓam: «I lumaka sinmijileŋ le, yo mapaŋ hirnga gu, sey i Buymisemuŋ pal naŋ, i mbur ta» na, ki ɓam ta.

¹⁴Mingiɓi ngi Jopo, a ɓa da ya ta, yo ya masa mbiɗaŋ di na, ti mingiɓi kum ta ma.

¹⁵Ani a tikukum le, ko ki ɓam gu mata, ki sinaka mingiɓi kini mata.

¹⁶I kutukukum le gar ngataraŋ, n'ani kum anta ɓam mata, yo ki roko lek lek, kum anta mbiɗikiy di ta.

¹⁷Da kine na, masa mbiɗa mingiɓi i ya muduba so, ya kwana, i sa bo ti sin ɗu vuna ya.

¹⁸Asi mingiɓi ada ndus a kwacay ɗu, yo membezleŋ ngi vu ɗu a giy ɓi ɓi.

¹⁹A mbiy kwacaya le kaɓa mbaazla mawuɗ a ngil ng'avra, kaɓa kwenekwene nawayahay mawuɗ a nduzom ti mbaazla.

²⁰Mbak i ɓi, ɓa mevel a tisli, i wuna mi, ɓa i sa mbiɗa mingiɓi ɗu.

²¹Y'anta sa ɓi tisi mbur ko loŋ ta, yo y'anta sa ɓi mi mideɗek tisi mbur ko loŋ ta ma.

²²Na zle, i si na ɓi mi mideɗek vuna ta, da i si na ɓi mi mideɗeke le zleˀe na, anja mbur migi ɗu a zuɓiy le kutum zlezle si.